Jona 1 - Bislama Bible Revised 2012

Profet Jona i traem ronwe long Hae God

1 2 King 14.25 Nao Hae God i toktok long Profet Jona, we papa blong hem Amitae, i talem se,

2“Jona. Yu girap, yu go long bigfala taon ya Nineve, yu tok long olgeta, from we mi luk se fasin blong olgeta i nogud we i nogud.”

3Be profet i no wantem, nao hem i girap, i traem ronwe long Hae God, i tekem narafala rod olgeta, i go long wan ples klosap long solwota, nem blong hem Jopa. Nao hem i faenem wan sip we i stap rere blong aot blong go long kantri ya Spen. Hem i pem pasis blong hem, nao i jam long sip ya wetem olgeta, blong i ronwe long Hae God. Mo taem sip ya i aot, hem i godaon long damblo, i slip.

4Be Hae God i mekem bigfala win i blu, i mekem solwota i raf we i raf we klosap sip ya i brok.

5Nao ol boskru oli fraet tumas, mo olgeta evriwan oli stap prea long ol god blong olgeta blong oli givhan long olgeta, wan i prea long god blong hem, wan i prea long god blong hem. Mo oli sakem ol kago i go long solwota from we sip ya i fulap tumas. Be Profet Jona i stap long damblo, i slip we i slip.

6Nao kapten i faenem hem, mo i tok long hem, i talem se, “!Ei! ?From wanem yu stap slip olsem? !Yu girap! Yu prea long god blong yu blong i givhan long yumi. Maet hem i save sore long yumi, i sevem yumi.”

7Nao ol boskru oli stap taltalem long olgeta se, “I gud yumi sakem ol spesel ston* blong faenemaot se hu i stamba blong trabol ya we i kasem yumi.” Nao oli mekem olsem, mo nem blong Profet Jona i kamaot.

8Nao oli tok long hem, oli talem se, “!Ei! !Yu talemaot long mifala! ?Trabol ya i fol blong hu? ?Yu kam ya blong mekem wanem? ?Yu blong wanem kantri? ?Yu laen blong hu?”

9Nao hem i talem se, “Mi mi wan Hibru* ya, mo Hae God i God blong mi. Hem i stap long heven, mo hem nao i mekem graon mo solwota. Mi mi stap mekem wosip long hem.

10Mi mi man blong hem, be mi stap ronwe long hem.”

Nao taem ol boskru oli harem samting ya, oli fraet we i fraet. Nao oli talem long hem se, “!Man! !Yu yu mekem i nogud tumas ya! ?Olsem wanem nao?”

11Be hariken i stap kam strong moa, nao olgeta oli askem long hem se, “?Bambae mifala i mekem olsem wanem long yu blong win ya i godaon, mo solwota i kwaet?”

12Mo hem i talem se, “Yufala i karem mi, yufala i sakem mi i go long solwota, nao bambae solwota i kwaet. Mi mi save se mi mekem wan samting we i nogud we i nogud, nao hariken ya i kam kasem yumi from.”

13Be ol boskru oli no wantem mekem olsem, nao oli traehad blong pul i gobak long soa, be oli no save go, from we si i kam bigwan tumas, mo win i stap kam strong moa.

14Nao oli prea long Hae God, oli talem se, “Hae God. Sipos man ya blong yu i ded, be plis yu no panisim mifala, yu no mekem we mifala i ded from. Yu nomo yu wokem ol samting ya. Hemia i bisnes blong yu nomo. Plis yu no putum long mifala.”

15Nao oli karem Profet Jona, oli sakem hem i go long solwota, mo wantaem nomo, solwota i kwaet.

16Mo taem ol boskru oli luk samting ya oli fraet tumas long Hae God, nao oli tekem wan anamol, oli mekem sakrefaes long hem blong mekem wosip long Hae God, mo oli promes se bambae oli kam man blong hem.

17 Mat 12.40 Be Hae God i sanem wan bigfala fis i kam, i solemdaon Profet Jona, mo hem i stap insaed long bel blong fis ya, tri dei mo tri naet.