Dutronome 8 - Bislama Bible Revised 2012

Gudfala kantri ya we ol laen blong Isrel bambae oli holem i blong olgeta

1Nao Moses i talem se, “Olgeta. Olgeta loa ya we mi mi stap givim long yufala naoia, bambae yufala i mas obei long olgeta oltaem, nao bambae yufala i save laef, yufala i save kam plante, mo yufala i save holem kantri ya we Hae God i bin promes* long ol bubu blong yumi bifo, se bambae i givim long yumi.

2Hae God i God blong yumi, mo oltaem yufala i mas tingbaot taem ya bifo we hem i stap lidim yumi foti yia long longfala rod ya we yumi kamtru long draeples. Hem i mekem yumi kasem hadtaem blong traem yumi, mo blong faenemaot tingting blong yumi, se yumi save obei long ol tok blong hem no nogat.

3Mat 4.4; Luk 4.4Hem i mekem we yumi gat hadtaem blong kasem kakae, mo hem i givim kakae ya mana* long yumi blong yumi kakae. Be kakae ya, yumi ya wetem ol bubu blong yumi bifo, neva yumi luk. Hem i mekem olsem blong tijim yumi we kakae nomo i no save mekem man i laef. Evri tok we hem i talem, hemia nao i save mekem man i laef.

4Long ol foti yia ya we yumi stap wokbaot, ol klos blong yumi oli no brobrok, mo leg blong yumi i no soa.

5I gud yufala i save we hem i save stretem yufala, mo hem i save givim panis long yufala, stret olsem wan papa we i stap tijim ol pikinini blong hem.

6Nao from samting ya, yufala i mas mekem ol samting ya we hem i talem finis long yufala, yufala i mas folemgud ol loa blong hem, mo oltaem yufala i mas tinghevi long hem.

7Hae God i God blong yumi, mo hem nao bambae i tekem yufala i go long gudfala kantri ya we i gat ol reva mo springwota long hem, mo i gat ol springwota i stap ron insaed long graon, we oli stap kamkamaot bigwan long ol krik long medel blong ol hil.

8Long kantri ya, i gat ol gudfala graon blong planem wit,* mo bale,* mo grep,* mo figtri,* mo grenadin,* mo olif, mo i gat plante sugabag tu i stap long hem.

9Mo taem yufala i stap long ples ya, bambae yufala i no save sot long kakae, mo bambae yufala i no save trabol long ol narafala samting tu. I gat ol ston i stap long graon we yufala i save wokem aean long hem, mo bambae yufala i save digim graon long ol hil blong tekem bras long hem.

10Olgeta kakae we yufala i wantem, bambae yufala i save kasem, nao taem yufala i stap long ples ya, oltaem bambae yufala i stap talem tangkiu long Hae God from gudfala kantri ya we hem i givim long yufala.”

Olgeta oli no mas fogetem Hae God

11 Hos 13.5,6 Nao Moses i talem se, “Hae God i God blong yumi, mo oltaem, bambae yufala i mas lukaot gud blong yufala i no fogetem hem. Yufala i mas obei long olgeta loa ya blong hem, we mi mi stap givim long yufala tede.

12Nao taem yufala i stap kasem plante kakae olsem we yufala i wantem, mo yufala i wokem ol gudgudfala haos blong yufala blong stap long hem,

13mo yufala i gat plante gol mo silva blong yufala, mo ol buluk mo sipsip blong yufala wetem olgeta narafala samting blong yufala oli kam plante,

14be bambae yufala i no mas flas from. Bambae yufala i no mas fogetem Hae God. Hem i God blong yumi, mo hem i sevem yumi. Hem i tekemaot yumi finis long Ijip, long ples we yumi stap wok slef* long hem bifo.

15Oltaem hem i stap lidim yumi, nao yumi pastru long bigfala draeples ya we i nogud olgeta. Long ples ya, i gat ol snek mo skopion, we taem oli kakae man, man i ded from. Mo taem yumi stap long draeples ya we i no gat wota nating long hem, be hem i mekem wota i kamaot long wan bigfala ston, i ron i kam blong yumi dring.

16Mo taem yumi stap long draeples ya, hem i givim kakae ya mana* long yumi blong yumi kakae. Be bifo, mifala ya, neva mifala i kakae. Hem i mekem we yumi gat hadtaem, from we i wantem traem yumi, blong biaen, sipos yumi stanap strong, bambae hem i save blesem yumi long plante gudgudfala samting.

17Nao from samting ya, yufala i no mas tingting samtaem, se yufala nao i strong, yufala i gat paoa, nao yufala nomo i mekem yufala i kam rijman.

18Hae God i God blong yumi, mo bambae yufala i no mas foget we hem nomo i stap givim paoa long yumi, mo hem nao i stap mekem yumi kam rijman. Hem i stap mekem olsem from we i stap holemstrong yet promes* ya we hem i mekem wetem ol bubu blong yumi bifo.

19Mi mi talem stret long yufala naoia. Hae God i God blong yumi, mo sipos yufala i no moa tingbaot hem, nao yufala i girap, yufala i go mekem wosip long ol narafala god mo yufala i stap mekem ol samting we ol narafala god ya oli wantem, hem bambae i kilim yufala evriwan i ded.

20Taem yufala i stap go insaed long kantri ya, Hae God bambae i stap kilim ol man blong kantri ya evriwan i ded. Be sipos yufala i no obei long hem, hem bambae i kilim yufala evriwan tu i ded long sem fasin.”