Sam 96 - Bislama Bible Revised 2012

Hae God i Hae King, mo hem i rulum olgeta man(1 Kronikel 16.23-33)(Tok i go long ol man.)

1!Olgeta man long wol!

!Yumi sing long Hae God!

!Yumi wokem wan niufala singsing!

!Yumi sing blong presem hem!

2!Yumi sing long Hae God!

!Yumi leftemap nem blong hem!

Evri dei bambae yumi talemaot gud nius ya

we hem i sevem yumi.

3Bambae yumi talemaot paoa blong hem

long ol man blong ol narafala kantri.

Bambae yumi talemaot ol bigbigfala wok blong hem

long fes blong olgeta man.

4Hae God i hae we i hae,

mo yumi mas presem hem,

yumi mas leftemap nem blong hem.

Hem i hae moa long ol narafala god,

mo i stret blong yumi ona moa long hem,

i winim we yumi ona long ol narafala god.

5Olgeta god ya

blong ol man blong ol narafala kantri

oli giaman god nomo,

oli no save mekem wan samting,

be Hae God ya,

hem i mekem skae

wetem olgeta samting we i stap long hem.

6Bigfala laet i stap saen raonabaot long hem

i soemaot we hem i King,

nem blong hem i hae we i hae.

Olgeta samting long haos* blong hem

oli soemaot we paoa blong hem i bigfala tumas,

mo we hem i gud we i gud.

7 Sam 29.1,2 !Olgeta man long wol,

yumi presem Hae God!

Yumi leftemap nem blong hem

from ol gudgudfala samting blong

hem mo from paoa blong hem.

8!Nem blong hem i hae we i hae!

!Yumi presem hem!

Yumi tekem presen blong yumi,

yumi kam long haos blong hem,

yumi givim long hem.

9!Hae God ya i tabu we i tabu!

!Yumi mas bodaon long fes blong hem,

yumi mas wosipim hem!

!I gud yumi tinghevi long hem,

yumi ona gud long hem!

10Yumi mas talemaot long olgeta man

blong ol narafala kantri se,

“!Hae God, hem i King!

Hem i putum wol ya

i stanap strong long ples blong hem,

mo i no save muf.

Hem bambae i jajem olgeta man

long stret fasin.”

11Skae mo graon.

!Yutufala i harem gud,

yutufala i glad!

Solwota.

!Yu wetem evri samting we i stap long yu,

yufala i mekem bigfala noes!

12-13Ol garen.

!Yufala wetem evri samting we i stap long yufala,

yufala i glad!

Taem Hae God i kam blong rul

long olgeta man long wol ya,

olgeta tri long bus bambae oli glad,

oli stap singsingaot blong presem hem.

Long taem ya,

bambae hem i rulum olgeta man blong wol

long stret fasin,

mo bambae hem i jajem

olgeta man blong ol narafala kantri

ong trutok blong hem.