Josua 22 - Bislama Bible Revised 2012

Olgeta we oli gat graon long narasaed Jodan Reva long is, oli gohom

1Nao Josua i singaot ol soldia blong laen* blong Ruben,* wetem olgeta blong laen blong Gad,* mo olgeta blong haf blong laen blong Manase* we oli stap long narasaed Jodan Reva long is, blong oli kam luk hem.

2Nam 32.20-32; Jos 1.12-15Nao hem i talem long olgeta se, “Naoia, yufala i finisimgud olgeta samting ya we Moses, man blong wok blong Hae God, i bin talem long yufala se yufala i mas mekem. Mo yufala i obei tu long olgeta tok we mi mi putum.

3Long ol yia ya we oli pas finis, nating we yumi stap longtaem tumas, be neva yufala i ronwe long ol narafala brata ya blong yumi. Hae God i God blong yumi, mo oltaem, yufala i stap obei gud long ol tok blong hem.

4Naoia hem i mekem ol narafala brata ya blong yumi oli stap gud finis long graon blong olgeta, stret olsem we hem i promes* bifo. Mo i gud yufala i gobak long ples blong yufala, long graon ya we yufala i holem finis long narasaed Jodan Reva, we Moses i givim finis long yufala bifo.

5Taem yufala i go, yufala i no mas foget blong obei long ol tok ya we Moses i putum long yumi, we hem i talem se Hae God i God blong yumi, mo yumi mas lavem hem long olgeta tingting blong yumi. Yumi mas mekem ol samting we hem i wantem, mo yumi mas obei long ol tok we hem i putum. Tingting blong yumi i mas stap strong long hem oltaem, mo long olgeta laef blong yumi, yumi mas mekem ol wok blong hem long gladhat blong yumi.”

6-8Nao hem i blesem olgeta, mo i talem se, “Yufala i save gohom. Naoia yufala i kam rijman finis, yufala i gat plante anamol, mo plante silva, mo gol, mo bras, mo aean, mo plante klos tu. Yufala i mas tekem ol samting ya we yufala i winim long ol enemi blong yumi, yufala i seraot i go long ol laen blong yufala.” Mo taem hem i givim tok ya finis long olgeta, hem i letem olgeta oli gohom.

Bifo, Moses i givim graon long haf blong ol laen ya blong Manase, mo graon ya i stap long bigfala ples ya Basan long narasaed Jodan Reva long is. Be biaen, Josua i givim graon long narahaf blong laen ya, long narasaed Jodan Reva saed i kam long wes, long sem ples we ol narafala laen oli stap long hem.

9Nao ol soldia ya blong laen blong Ruben, wetem olgeta blong laen blong Gad, mo olgeta blong laen ya blong Manase oli gobak long ples blong olgeta. Oli livim ol narafala brata ya blong olgeta oli stap long Silo, long kantri ya Kenan,* nao oli aot, oli gobak long ples blong olgeta long bigfala ples ya Gilead, long graon ya we oli tekem finis, olsem we Hae God i talem long Moses bifo.

Olgeta ya we oli stap gohom oli mekem wan olta blong witnes

10Nao ol soldia ya blong distrik ya Ruben,* wetem olgeta blong distrik ya Gad* mo olgeta blong distrik ya Is Manase* oli go kasem ples ya Gelilot, we i stap long kantri ya Kenan,* klosap long Jodan Reva saed i kam. Mo taem oli stap long ples ya yet, oli putumap wan olta we i bigwan we i bigwan, klosap long reva ya, mo taem ol man raonabaot oli luk, oli sapraes tumas long hem.

11Nao taem Josua olgeta oli harem ripot blong samting ya, oli talem se, “!E olgeta! !Yufala i harem samting ya! Naoia olgeta ya we oli go longwe, oli putumap wan olta finis long Gelilot, long Jodan Reva, saed i kam long kantri ya blong yumi.”

12Mo taem oli harem nius ya, olgeta evriwan oli kam wanples long Silo, nao oli mekemrere blong go mekem faet long ol narafala brata ya blong olgeta we graon blong olgeta i stap long narasaed Jodan Reva long is.

13Be fastaem, oli sanem pris* ya Finehas i go long Gilead blong i go luk ol narafala brata ya blong olgeta. Finehas ya, papa blong hem Eleasara we i Hae Pris.*

14Mo ten lida blong ol laen* ya blong olgeta we oli stap long saed blong Jodan Reva long wes, oli go wetem hem. Olgeta ya wanwan oli hed blong ol famle blong olgeta tu.

15Oli go long Gilead, oli go luk ol brata ya blong olgeta long ples ya,

16Dut 12.13,14nao oli tok long olgeta long nem blong olgeta man blong Hae God. Oli talem se, “?From wanem yufala i mekem samting ya? Yumi evriwan i laen blong Isrel,* mo Hae God i God blong yumi, be yufala i mekem wan samting we i nogud tumas long fes blong hem. Fasin ya we yufala i mekem, we yufala i putumap olta ya we i blong yufala nomo, hem i soemaot we yufala i girap agens long hem ya. !Naoia yufala i gowe long hem finis!

17Nam 25.1-9?Yufala i fogetem finis taem ya we yumi stap long Peoro, we hem i panisim yumi from ol sin blong yumi? Yumi man blong hem, be hem i panisim yumi long wan sik we i kasem yumi evriwan wantaem nomo. Mo yumi stap harem nogud yet from samting ya. ?Olsem wanem? ?Ol sin ya we yumi mekem, oli no naf yet?

18?Weswe? ?Bambae yufala i satem sora blong yufala, yufala i no moa wantem folem hem bakegen? Sipos yufala i girap, yufala i agens long hem tede, be tumora bambae hem i panisim yumi evriwan ya.

19Sipos yufala i ting se graon blong yufala i no klin long fes blong hem, nao yufala i no save mekem wosip long hem long ples ya, i moa gud yufala i kam long graon ya we i blong Hae God, long ples we i gat Haos Tapolen blong hem i stap long hem finis. I gud yufala i tekem sam graon long graon ya blong mifala. !Olta blong Hae God i stap finis! Be taem yufala i putumap narafala olta ya bakegen, yufala i agens long Hae God, mo yufala i mekem olsem we yumi evriwan i agens long hem.

20Jos 7.1-26?Yufala i fogetem finis fasin blong man ya Akan we i laen blong Seraha? Hae God i talem se yumi mas bonem olgeta samting evriwan long taon ya Jeriko, blong givim olgeta i go long hem, be man ya i no wantem obei long hem. Nao long fasin ya, hem i mekem we yumi evriwan i kasem panis. Mo i no hem nomo we i ded from sin ya blong hem, plante narafala man tu oli ded.”

21Be ol brata blong olgeta oli talem se,

22“!God i gat olgeta paoa! !Hem nomo i Hae God! !God i gat olgeta paoa! !Hem nomo i Hae God! Hem i save from wanem mifala i mekem samting ya. !Mo yufala tu i mas save! Sipos mifala i girap agens long Hae God, mo mifala i no moa bilif long hem, i nogud mifala i stap. !Yufala i mas kilim mifala!

23Mo sipos mifala i brekem tok blong hem, nao mifala i putumap wan olta blong mekem wosip long hem long fasin blong mifala nomo, nao mifala i stap bonem anamol long olta ya, no mifala i stap bonem kakae blong garen* long hem, no mifala i stap kilim anamol we mifala i bonem haf blong mekem wosip long hem, mo mifala i kakae haf blong soemaot we mifala i fren gud wetem hem, i gud hem i panisim mifala.

24Be mifala i no mekem olsem. Mifala i mekem from we mifala i fraet se samtaem, ol laen blong yufala bambae oli save tok long ol laen blong mifala se, ‘Mifala i laen blong Isrel, mo Hae God i God blong mifala. ?From wanem yufala i stap mekem wosip long hem? !Yufala i no gat raet blong mekem olsem!

25Hem i putum Jodan Reva finis blong i mak blong ol graon blong yumi blong seraot yumi. Yufala i no gat raet blong mekem wosip long Hae God.’ Nao long fasin ya, samtaem, maet ol laen blong yufala bambae oli blokem ol laen blong mifala, blong oli no moa save mekem wosip long hem.

26Samting ya nao i mekem we mifala i putumap olta ya. Be i no olta blong bonem anamol blong mekem sakrefaes long Hae God, mo i no blong bonem ol narafala presen blong givim i go long hem.

27Mifala i putumap, blong bambae hem i wan saen long ol man blong mifala, mo long ol man blong yufala, mo long olgeta we bambae oli kamaot biaen long yumi. Olta ya i blong soemaot we yumi evriwan i stap go long Haos Tapolen ya blong Hae God nomo blong mit wetem hem, mo blong mekem wosip long hem. Long Haos Tapolen ya nomo, yumi evriwan i stap mekem wosip long ol sakrefaes ya we yumi kilim anamol, yumi bonem i bon evriwan, mo yumi bonem ol narafala presen blong givim i go long hem, mo yumi mekem ol sakrefaes we yumi kilim anamol, nao yumi bonem haf blong mekem wosip long hem, mo yumi kakae haf blong soemaot we yumi stap fren gud wetem hem. Olta ya i stap blong bambae ol laen blong yufala oli no save talem long ol laen blong mifala se, ‘Yufala i no gat raet blong mekem wosip long Hae God.’

28Tingting blong mifala i olsem. Mifala i ting se sipos ol laen blong yufala oli tok olsem, bambae ol laen blong mifala oli save talem se, ‘!Be yufala i luk! Ol bubu blong mifala bifo oli putumap olta ya, stret olsem Olta ya blong Hae God. Be i no blong bonem anamol long hem blong mekem wosip long hem, mo i no blong mekem sakrefaes. Hemia i wan witnes nomo long yumi evriwan.’

29Mifala i no save girap agens long Hae God. Mifala i no save lego fasin ya we mifala i stap holem, blong bambae mifala i no moa biaen long hem. Mifala i no putumap Olta ya blong bonem anamol blong mekem wosip, no blong bonem ol kakae blong garen no blong mekem sakrefaes long hem. Hae God i God blong yumi, mo Olta blong hem i stap finis long fran blong Haos Tapolen ya blong hem. !Mifala i no save stanemap wan narafala olta blong hem bakegen!”

30-31Nao pris ya Finehas wetem ol ten lida ya oli haremsave ol samting ya we ol brata blong olgeta oli talem, mo oli glad tumas long hem. Nao hem i talem se, “Naoia mifala i save we Hae God i stap wetem yumi. Fasin we yufala i mekem i soemaot we yufala i no traem blong mekem wan samting blong girap agens long hem, yufala i mekem nomo blong bambae hem i no givim panis long yumi evriwan.”

32Nao hem wetem ol narafala lida ya oli aot long olgeta ya we oli stap long Gilead, nao oli gobak long Kenan, long ples ya we Josua olgeta oli stap long hem, nao oli mekem ripot long ol samting ya.

33Nao Josua olgeta oli glad tumas, oli stap presem God, mo oli no moa stap tokbaot blong oli go mekem faet blong spolem distrik ya Ruben, mo distrik ya Gad we ol brata ya blong olgeta oli stap long hem.

34Mo olgeta blong tufala distrik ya Ruben mo Gad, oli talem se, “Olta ya bambae i stap. Hem i wan witnes long yumi evriwan we Hae God, hem i God.” Nao oli putum nem blong olta ya se “Witnes”.