Dutronome 25 - Bislama Bible Revised 2012

1“Samtaem maet i gat tu man ples blong yufala i pas long kot blong stretem wan trabol blong tufala, nao jaj i talem se wan i stret, mo narawan i mas kasem panis.

2Sipos jaj i talem se panis blong narawan ya, oli mas wipim hem, man ya i mas ledaon long graon we fes blong hem i godaon, nao stret long fes blong jaj, oli mas wipim hem long baksaed blong hem. Mo taem jaj i makem hamas wip bambae oli givim long man ya, hem i mas skelem long trabol we man ya i mekem.

32 Kor 11.24Hem i save givim foti wip nomo long man ya, be i no save ova long foti. Sipos i ova long foti, bambae i spolem hem tumas, long fes blong ol man.

4 1 Kor 9.9; 1 Tim 5.18 “Sipos yufala i tekem buluk i kam blong i purumpurumbut long hed blong wit blong kilimaot ol sid blong wit ya, be bambae yufala i no mas fasem maot blong hem, yufala i mas letem hem i kakae sam long ol wit ya.”

Fasin we man i mas mekem long wido blong brata blong hem

5 Mat 22.24; Mak 12.19; Luk 20.28 Nao Moses i talem se, “Olgeta. Sipos i gat tu brata i stap long wan ples, nao wan long tufala i ded, be hem i no gat pikinini boe blong hem, ale, wido blong hem bambae i no mas mared long man blong narafala famle, brata blong man ya we i ded bambae i mas tekem hem.

6Nao fas pikinini boe we tufala i gat, bambae tufala i mas kaontem olsem pikinini blong man ya we i ded, blong nem blong hem bambae i no save lus long ples blong yufala.

7Rut 4.7,8Be sipos brata blong man ya i no wantem tekem wido ya, wido ya bambae i mas go luk ol lida blong ples ya, mo i mas talemaot long olgeta se, ‘Brata blong man blong mi i no save tekem mi olsem we Loa blong Hae God i talem. Hem i no wantem mekem we nem blong brata blong hem bambae i stap olwe long ples ya blong yumi.’

8Nao ol lida long ples ya bambae oli mas singaot man ya i kam, blong oli tok long hem. Be sipos hem i talem bakegen se i no wantem,

9ale, long fes blong olgeta, wido ya bambae i mas go tekemaot sandel blong man ya, mo i mas spet long fes blong hem, mo i mas talem long hem se, ‘Hemia nao prapa fasin blong mekem long yu, from we yu yu no wantem we nem blong brata blong yu i stap olwe long ples ya.’

10Nao olbaot long kantri blong yufala, bambae yufala evriwan i mas makemgud olgeta we oli kamaot biaen long man ya, mo yufala i mas singaot olgeta se, ‘Ol laen* blong man ya we woman i pulumaot sandel blong hem, i spet long fes blong hem.’ ”

Ol narafala loa

11Nao Moses i talem se, “Sipos i gat tu man i stap faet, nao woman blong narawan i wantem givhan long man blong hem, nao i kam holem narafala man ya long samting blong hem blong stopem hem,

12bambae yufala i mas katemaot han blong woman ya, we yufala i no gat sore long hem.

13-14 Lev 19.35,36 “Sipos yufala i stap wokem bisnes, long stoa no long weples, mo yufala i stap skelem ol kakae wetem ol narafala samting we ol man oli stap pem, bambae yufala i no mas yusum skel no mesa we i blong ravem man.

15Yufala i mas yusum skel ya we i tru, we man i save trastem. Hae God i God blong yumi, mo sipos yufala i stap yusum stret skel olsem, bambae yufala i save stap longtaem long kantri ya we hem bambae i givim long yufala.

16Be hem i no laekem nating ol man we oli stap ravem man, i agens long olgeta.”

Ol laen blong Isrel, bambae oli mas kilim ol laen blong Amalek oli ded

17 Eks 17.8-14; 1 Saml 15.2-9 Nao Moses i talem se, “Bambae yufala i no mas fogetem samting ya we ol laen* blong Amalek oli mekem long yumi bifo, taem we yumi aot long Ijip, yumi stap kam long ples ya.

18Long taem ya, olgeta oli no fraet long God nating, nao nating we yumi taed tumas, yumi no moa gat paoa blong faet, be oli kam biaen long yumi, oli holem ol man blong yumi we oli stap wokbaot sloslo i kam biaen, mo oli kilim olgeta i ded.

19Be Hae God i God blong yumi, mo long taem ya we hem bambae i givim kantri ya long yufala, mo yufala i stap gud long hem, mo ol enemi ya blong yufala we oli stap raonabaot long yufala oli no moa save mekem trabol long yufala, ale, long taem ya, bambae yufala i mas go kilimaot olgeta laen blong Amalek ya. Bambae yufala i mas finisimgud olgeta, blong bambae i no moa gat man i save tingbaot olgeta bakegen. Bambae yufala i no mas fogetem samting ya.”