Jeremaea 14 - Bislama Bible Revised 2012

Bigfala draetaem we i kam kasem olgeta

1Nao Hae God i toktok long Profet Jeremaea from bigfala draetaem ya we i kamtru.

2Hem i talem se,

“Jeremaea.

Naoia, olbaot long Juda,*

olgeta man oli stap harem nogud.

Ol man long ol taon blong yufala

oli slak we i slak.

Olgeta oli stap ledaon olbaot long graon

we oli harem nogud tumas.

Mo long Jerusalem,*

olgeta i stap krae i kam long mi,

blong mi mi givhan long olgeta.

3Ol rijman oli stap traem sanem

ol man blong wok blong olgeta

oli go long ol wel blong kasem wota,

be taem oli go,

i no gat wota nating long ol wel ya.

Nao oli karem ol emti botel i kambak,

we tingting blong olgeta i foldaon olgeta,

nao oli sem gud,

mo oli kavremap fes blong olgeta from.

4I no moa gat ren olbaot long kantri ya,

mo ples i drae we i drae,

nao ol man blong wok long garen

oli harem nogud tumas,

oli kavremap fes blong olgeta from.

5Nating we anamol ya dia*

i jes bonem pikinini blong hem,

be i lego pikinini ya

i stap long open ples,

from we i no moa gat gras blong hem i kakae.

6Ol wael dongki

oli stap stanap antap long hil,

we oli stap pulum win olsem wael dog,

blong oli save smelem kakae.

Ae blong olgeta i stap kam nogud,

from we i no moa gat kakae.

7Ol man blong mi oli stap krae i kam long mi,

oli stap talem se,

‘Hae God.

Nating we ol sin blong mifala oli stap soemaot

we mifala i man nogud,

be plis, yu sore long mifala,

yu givhan long mifala

olsem we yu yu promes.

Plante taem,

mifala i tanem baksaed long yu,

mifala i mekem sin agens long yu.

8Be oltaem,

yu nomo yu stap sevem mifala,

yu stap tekemaot mifala long ol trabol,

mo mifala i save putum

tingting blong mifala i stap long yu nomo.

?From wanem yu kam olsem wan strenja

long ples blong mifala,

no olsem wan man blong wokbaot,

we i kam stap wan naet nomo,

nao long nekis dei, i aot i go?

9?From wanem yu yu olsem man

we i sek long enemi blong hem,

no wan soldia we i no gat paoa blong sevem ol man?

Hae God,

mifala i man blong yu nomo,

mo mifala i savegud

we yu yu stap wetem mifala.

Plis yu no lego mifala.’ ”

10Nao profet i talemaot we Hae God i talem se, “Jeremaea. Ol man ya oli wantem tumas blong ronwe long mi, mo oli no wantem lego fasin ya blong olgeta. Nao from ol samting ya, mi mi no glad nating long olgeta. Oltaem, bambae mi stap tingbaot ol rabis fasin ya blong olgeta, mo bambae mi panisim olgeta from ol sin blong olgeta.

11“Bambae yu no mas prea long mi, blong mi givhan long olgeta.

12Nating we oli livim kakae blong mekem wosip long mi, mo oli krae i kam long mi blong mi givhan long olgeta, be bambae mi no save harem olgeta. Mo sipos oli kilim ol anamol, oli bonem blong mekem sakrefaes we i blong bonem i bon evriwan, mo oli tekem ol presen long kakae blong garen,* oli givim i kam long mi, be bambae mi no save glad long olgeta. Bambae mi kilim olgeta oli ded long faet, mo long hanggri, mo long bigfala sik we bambae i kasem olgeta.”

13Nao profet i talem se, “Hae God. Yu yu Masta* blong mi, mo yu yu save we ol profet oli stap talemaot long ol man, se bambae i no moa gat faet, mo bambae i no moa gat hadtaem blong kasem kakae, from we yu yu mekem wan promes finis, se oltaem bambae mifala i gat pis long ples blong mifala, mo bambae mifala i stap gud.”

14Be Hae God i talem se, “Ol profet ya oli stap yusum nem blong mi, be oli giaman nomo. Mi mi no sanem olgeta i kam, mo mi no givim tok long olgeta blong oli kam talemaot. Mo ol vison* ya we oli stap tokbaot long yufala, mi mi no soemaot long olgeta nating. Ol samting ya we oli stap talem se bambae i kamtru, hemia i tingting blong olgeta nomo, mo i no save givhan long yufala.

15Ol profet ya, mi mi no sanem olgeta, be oli kam, oli stap yusum nem blong mi, oli talem se bambae i no gat faet long ples blong yufala, mo bambae i no gat hadtaem tu blong kasem kakae. Nao from samting ya, mi bambae mi talemaot long yu ol samting we bambae mi mekem long olgeta. Bambae mi mekem olgeta oli ded long faet, mo bambae oli hanggri gogo oli ded from.

16Mo ol man we ol profet ya oli stap talemaot ol samting ya long olgeta, bambae mi kilim olgeta tu oli ded long sem fasin nomo. Bambae ol enemi oli sakem ol ded bodi blong olgeta i stap olbaot long ol rod blong taon ya Jerusalem, mo bambae i no moa gat man i stap blong berem olgeta. Olgeta wetem ol woman blong olgeta, mo ol pikinini blong olgeta, bambae olgeta evriwan oli ded long sem fasin ya nomo. Bambae mi panisim olgeta, from ol samting nogud we oli stap mekem.”

17Nao profet i harem nogud tumas, mo Hae God i talem long hem blong i go talemaot samting ya long ol man. Nao hem i talemaot long olgeta se,

“Olgeta.

Mi mi harem nogud tumas,

nao mi krae we mi krae.

Long dei mo long naet,

wota blong ae blong mi i stap ron bigwan.

Mi stap krae olwe nomo,

we mi no save spel,

from we ol man blong mi

oli karekil we i nogud olgeta,

mo oli stap harem nogud tumas.

18Taem mi stap goaot long open ples,

mi luk ol ded bodi blong ol man blong mi

we oli ded long taem blong faet.

Mo taem mi go insaed long ol taon,

mi luk ol man

we oli stap hanggri gogo,

klosap oli ded from.

Ol profet mo ol pris*

oli stap mekem ol wok blong olgeta,

be oli no save nating

wanem we oli stap mekem.”

Ol man oli krae i go long Hae God

19Nao ol man oli krae i go long Hae God, oli talem se,

“?Hae God, olsem wanem?

?Yu yu lego mifala ol man Juda,*

we yu lego mifala olgeta?

Mifala ol man Saeon,*

be yu yu no moa lavem mifala nao.

?From wanem yu panisimgud mifala,

we mifala i no save kam gud bakegen?

Fastaem,

mifala i putum tingting blong mifala

i stap strong long yu,

se yu bambae yu mekem mifala i gat pis,

mo yu mekem mifala i gud bakegen.

Be kam kasem naoia,

i no gat wan gudfala samting nating

i kamtru long mifala,

bigfala trabol nomo

i stap spolem mifala.

20Mifala i mekem i nogud agens long yu,

be naoia mifala i kam talemaot

ol sin ya blong mifala long yu,

mo mifala i talemaot tu

ol sin blong ol bubu blong mifala bifo.

21Plis yu no fogetem promes* ya

we yu mekem wetem olgeta,

mo yu no tanem baksaed long mifala.

Taon ya Jerusalem* i ples blong yu,

mo yu yu stap long hem,

yu stap rul long olgeta man long wol.

Plis yu no letem nem blong ples ya

i kam nogud long fes blong ol man.

22Ol giaman god blong ol man blong ol narafala kantri

oli no save sanem ren i kam long mifala.

Skae tu

i no save sanem ren i kam long mifala.

Hae God,

yu nomo yu God blong mifala.

Mifala i putum tingting blong mifala

i stap long yu nomo,

from we yu nomo

yu stap mekem olgeta samting ya

long mifala.”