Jeremaea 17 - Bislama Bible Revised 2012

Ol sin blong ol man Juda, mo panis we bambae oli kasem

1Nao Profet Jeremaea i talemaot we Hae God i talem se, “Ol man Juda.* Ol sin blong yufala i stap long tingting blong yufala, mo long ol hon* blong ol olta blong yufala, stret olsem we man i katem pija long wan wud, no i raetemdaon long pen we oli wokem long aean, we poen blong hem, oli wokem long ston ya daeman,* we i strong we i strong.

2Ol man ples blong yufala oli stap mekem sakrefaes long ol olta blong woman god ya Asera.* Ol olta ya oli stanemap olgeta wetem ol pija blong god ya, aninit long ol tri we oli gat gudfala sed, mo antap long ol hil,

3mo antap long ol bigbigfala hil long ol open ples. Bambae mi mi mekem we ol enemi blong yufala oli kam tekemaot ol gudgudfala samting blong yufala wetem ol samting we oli mekem yufala i rijman, oli karem i blong olgeta. Bambae mi mi mekem olsem, blong panisim yufala from ol sin blong yufala, we yufala i stap mekem long olgeta ples long kantri ya.

4Bambae yufala i mas lego ol graon ya, we mi mi bin givim long ol bubu blong yufala bifo, nao bambae mi mekem yufala i go wok blong ol enemi blong yufala, long wan kantri we yufala i no save nating. Bambae mi mekem olsem, from we mi mi kros tumas long yufala, mo kros blong mi bambae i stap gogo i no save finis.”

Ol narafala toktok we Hae God i talemaot

5Mo bakegen Profet Jeremaea i talemaot we Hae God i talem se,

“Man we i tanem baksaed long mi,

mo oltaem i stap trastem man,

i putum tingting blong hem

long paoa blong man nomo,

mi bambae mi jajem hem,

se hem i mas ded.

6Man olsem, hem i olsem wan smol tri

long draeples,

we i stap gru long ples blong sol,

we i no gat wan samting i save gru long hem.

Man olsem,

hem i no save kasem wan gudfala samting nating

long laef blong hem.

7“Be man we i trastem mi,

mo i putum tingting blong hem i stap strong long mi,

mi bambae mi blesem hem.

8 ”

Profet Jeremaea i prea blong Hae God i givhan long hem

14Nao Profet Jeremaea i prea bakegen, i talem se, “Hae God. Mi mi harem nogud tumas, plis yu givhan long mi, yu mekem mi mi kam gud bakegen. Plis yu sevem mi, blong mi save stap gud, from we oltaem mi stap presem yu nomo.

15“Ol man oli stap talem long mi se, ‘?Wehem ol panis ya we Hae God i talemaot se bambae oli kam kasem mifala? !I gud hem i gohed i mekem ol samting ya naoia!’

16“Be Hae God, yu yu savegud we mi mi no wantem blong yu yu spolem olgeta, mo neva mi askem long yu blong yu letem trabol i kam kasem olgeta. Olgeta samting we mi mi talem, be yu yu save evriwan.

17Taem trabol i kam kasem mi, yu nomo yu ples blong haed blong mi. Plis yu no mekem mi mi fraet.

18Hae God, plis yu mekem olgeta ya we oli stap ronem mi, oli sem from fasin ya we oli stap mekem, be plis yu livim mi mi stap, yu no spolem mi wetem olgeta. Plis yu mekem olgeta ya oli fraet we i fraet, be yu no letem mi mi fraet olsem olgeta. Plis yu letem bigfala trabol i kam spolem olgeta, we i flatemgud olgeta.”

Fasin blong holem Sabat dei

19Nao profet i talemaot we Hae God i talem long hem se, “Jeremaea, yu go stanap long doa* ya long bigfala stonwol blong taon ya Jerusalem* we nem blong hem, ‘Doa blong Ol Man’, we oltaem ol king blong Juda* oli stap pas long hem, nao yu talemaot ol tok blong mi long ples ya, mo long ol narafala doa blong bigfala stonwol blong taon ya.”

20Nao hem i go talemaot we Hae God i talem se, “King. Yu wetem ol haeman blong yu, mo yufala ya we i stap long Jerusalem, wetem yufala ya blong ol narafala ples long Juda, yufala evriwan we i stap kam insaed long ol doa ya, yufala i mas lesin long ol tok we mi mi talem long yufala.

21-22Neh 13.15-22

Eks 20.8-10; Dut 5.12-14Sipos yufala i wantem stap laef, be yufala i mas holem Sabat* dei i tabu, stret olsem we mi mi bin talem long ol bubu blong yufala bifo. Long dei ya, yufala i no mas wok. Yufala i no mas karem ol hevi samting blong yufala, mo taem yufala i kam insaed long ol doa blong stonwol blong taon ya, yufala i no mas karem hevi samting. Mo long dei ya, yufala i no mas kamaot long ol haos blong yufala, we yufala i karem hevi samting.

23Bifo, ol bubu blong yufala oli no lesin long tok blong mi, mo oli no harem mi nating. Oli mekem stronghed, mo oli no save obei long mi, mo oli no rere nating blong lanem ol samting we mi mi stap tijim olgeta long hem.

24“Yufala i mas obei long ol tok blong mi. Taem yufala i kam insaed long ol doa blong stonwol blong taon ya long Sabat dei, be yufala i no mas karem hevi samting. Yufala i mas holem dei ya i tabu, mo yufala i no mas mekem wok long hem.

25Sipos yufala i obei long tok ya blong mi, yu wetem ol haeman blong yu, mo ol king we bambae oli kamaot biaen long yu, bambae yufala i save gohed blong kam insaed long ol doa blong stonwol blong taon ya, mo bambae yufala i karem sem paoa we King Deved bifo i gat. Yufala wetem ol narafala man long Jerusalem, mo ol narafala ples long Juda, bambae yufala i save gohed blong ron long ol kat blong yufala, mo long ol hos. Mo bigfala taon ya Jerusalem, oltaem nomo bambae i fulap long ol man, gogo i no save finis.

26Ol man bambae oli kam long Jerusalem blong mekem wosip long mi. Bambae oli aot long ol taon blong Juda, mo long ol vilej klosap long Jerusalem, mo long distrik ya Benjamin,* mo long botom blong ol hil, mo long ples blong hil, mo long Juda long saot, oli kam. Mo taem oli kam long haos* blong mi, bambae oli karem ol anamol blong mekem sakrefaes ya we oli bonem i bon evriwan, mo ol narafala sakrefaes, mo presen long kakae blong garen,* mo insens,* mo ol presen blong talem tangkiu long mi.

27Yufala i mas obei long mi, mo yufala i mas holem Sabat dei i tabu. Bambae yufala i no mas karem hevi samting i kam insaed long Jerusalem long dei ya. Sipos yufala i no obei long ol tok ya blong mi, bambae bigfala faea i kam bonem taon ya Jerusalem, wetem ol bigfala doa blong stonwol blong hem, mo ol haos blong king, mo faea ya bambae i no gat man i save kilim i ded.”