Jajes 12 - Bislama Bible Revised 2012

Ol laen blong Efrem oli kros long Jeftaha

1Nao ol laen* blong Efrem* oli mekemrere blong kamkros long Jodan Reva, oli kam long vilej ya Jafon. Nao oli talem long Jeftaha se, “?From wanem yufala i gohed, yufala i go long ples blong ol man Amon blong mekem faet long olgeta, be yufala i no kam singaot mifala fastaem, blong mifala i kam joen wetem yufala? Naoia, bambae mifala i bonem haos ya blong yu, mo yu tu bambae yu bon wetem.”

2Be Jeftaha i talem long olgeta se, “No, be mi wetem ol man ya blong mi, mifala i rao bigwan long ol man Amon ya. Mo mi singaot yufala, be yufala i no wantem kam sevem mifala.

3Nao taem mi luk we yufala i no save kam givhan, mi gohed, mi letem laef blong mi, mi go long ples blong olgeta blong mekem faet long olgeta, mo Hae God i mekem we mi mi winim olgeta. ?Nao from wanem yufala i wantem kam mekem faet long mi bakegen?”

4Nao Jeftaha i tekem olgeta man Gilead oli kam wanples, nao oli faet long ol laen ya blong Efrem, mo oli winim olgeta. Oli spolemgud olgeta ya, from we oli bin talem se, “Yufala ol man Gilead ya, fastaem yufala i stap long distrik blong mifala, mo long distrik blong Manase,* be yufala i man blong ronwe long faet.”

5Nao ol man Gilead ya oli go blokemgud ol rod ya we i blong gokros long Jodan Reva, blong ol laen blong Efrem oli no save gokros bakegen blong ronwe. Nao taem wan man long laen ya i ronwe, mo i kam askem long ol man Gilead blong oli letem hem i gokros, olgeta ya oli askem long hem se, “?Yu yu laen blong Efrem?” Mo sipos hem i talem se, “No,”

6oli talem long hem se, “Ale, yu traem talem tok ya ‘Jibolet’.” Be sipos hem i talem se, “Sibolet” from we ol laen ya oli no save talem se, “Jibolet”, ale oli holem hem, oli kilim hem i ded. Be man we i talem i stret, oli no holem hem. Mo long taem ya, oli kilim foti tu taosen man long laen blong Efrem oli ded.

7Jeftaha ya, hem i lida blong ol laen blong Isrel* sikis yia, gogo hem i ded. Nao oli berem hem long Gilead, long vilej blong hem.

Ibsan mo Elon mo Abdon

8Nao biaen long Jeftaha, Ibsan we i wan man Betlehem long distrik ya Sebulun,* hem i kam lida blong ol laen* blong Isrel.*

9Hem i gat sikisti pikinini blong hem, toti boe, mo toti gel. Mo hem i mekem we ol dota ya blong hem oli go mared* long ol narafala famle long laen blong hem, mo i tekem ol gel blong ol narafala famle long laen blong hem oli kam mared long ol boe blong hem. Hem i lidim olgeta seven yia,

10nao hem i ded, mo oli berem hem distrik blong hem, long taon ya Betlehem.

11Biaen long Ibsan, Elon, we i laen blong Sebulun, hem i kam lida blong olgeta, mo i lidim olgeta ten yia.

12Nao hem i ded, mo oli berem hem long distrik ya Sebulun, long taon ya Aealon.

13Biaen long Elon, Abdon we papa blong hem Hilel, hem i kam lida blong olgeta. Hem i man Piraton,

14mo i gat foti pikinini boe blong hem, mo toti smol bubu boe blong hem. Olgeta ya evriwan oli gat dongki blong olgeta we oli stap wokbaot long olgeta. Man ya i lidim ol laen blong Isrel eit yia,

15Nao hem i ded, mo oli berem hem long vilej blong hem long Piraton, long distrik ya Efrem,* long ples blong hil we fastaem i blong ol laen blong Amalek.