Sam 10 - Bislama Bible Revised 2012

Prea we man i mekem blong Hae God i mekem stret fasin i stanap(Tok i go long Hae God.)

1Hae God.

?From wanem yu stap longwe tumas?

?From wanem yu stap haed

taem we mifala i stap long trabol?

2Ol man nogud oli flas tumas,

nao oli stap ronem ol puaman.

Plis yu letem ol trap we oli mekem

i kasem olgeta bakegen.

3Hae God.

Man nogud i stap tok flas

from ol samting nogud we hem i wantem.

Man we i wantem kasem evri samting,

hem i tanem baksaed long yu,

mo i stap tok nogud long yu.

4Man nogud i no kea long yu nating,

hem i flas tumas,

nao long tingting blong hem

i stap talem se, “I no gat God i stap.”

5Hem i stap win oltaem nomo,

long olgeta wok blong hem.

Hem i no save luksave mak blong

laef we yu yu putum.

Hem i stap tok nogud long ol enemi blong hem,

i stap laf long olgeta.

6Hem i stap talem se,

“Bambae mi mi no save lus.

Neva bambae mi mi kasem trabol.”

7 Rom 3.14 Man olsem, maot blong hem i nogud.

Oltaem hem i stap tok nogud long man,

i stap giaman,

i stap tok blong mekem man i fraet.

Hem i kwik blong sakem ol rabis tok,

we i blong spolem man nomo.

8Hem i stap haed long ol vilej,

i stap wet long ol man

we oli no mekem samting nogud,

blong i kilim olgeta oli ded.

9Hem i stap haed long ples blong hem,

i stap wet olsem wan laeon.

Hem i stap wet nomo long ol puaman,

i stap kasem olgeta long trap blong hem,

nao i pulum olgeta i gowe.

10Hem i gat paoa,

nao hem i stap smasemgud olgeta

we oli no strong,

i stap flatemgud olgeta.

11Long tingting blong hem,

hem i stap talem se,

“!God i no kea!

!Hem i satem ae blong hem finis!

!Neva bambae hem i luk mi!”

12Hae God,

yu kam,

yu panisim ol man nogud ya.

Plis yu tingbaot olgeta

we oli stap harem nogud.

13?Olsem wanem yu stap letem man nogud

i lukluk rabis long yu?

?Weswe hem i stap talem se,

“God i no save panisim mi”?

14Be yu yu luk ol samting ya finis,

yu save olgeta we oli stap trabol,

mo we oli harem nogud,

mo oltaem yu yu rere

blong givhan long olgeta.

Man we i no strong,

hem i stap putum laef blong hem

long han blong yu,

mo oltaem yu stap givhan long olgeta

we oli no gat man

blong givhan long olgeta.

15Plis yu brekemdaon paoa blong ol man nogud,

yu panisim olgeta

from ol samting nogud we oli mekem,

gogo oli no save mekem bakegen.

16Hae God, yu yu King,

mo bambae yu stap rul oltaem nomo,

gogo i no save finis.

Olgeta we oli stap mekem wosip long ol narafala god,

bambae oli finis,

bambae oli lus olgeta

we i no moa gat wan i stap

long graon ya blong yu.

17Hae God,

mi mi save

se yu bambae yu lesin long ol man blong yu

we ol man oli stap spolem olgeta,

mo bambae yu mekem tingting blong olgeta

i strong bakegen.

18Yu bambae yu harem krae blong olgeta ya

wetem ol pikinini we papa blong olgeta i ded.

Bambae yu givhan long olgeta,

yu jajem olgeta long stret fasin,

blong olgeta ya we oli man nomo

bambae oli no moa save mekem olgeta

oli fraet bakegen.