1-2Nao Hae God i talem long Moses se, “Moses. Taem yufala i wokem Haos Tapolen ya blong mi we bambae yufala i stap kam long hem blong mit wetem mi, bambae yufala i mas wokem ol gudfala kaliko blong hem, blong flasem. Man we i gat gudhan blong wivim kaliko we i gat pija long hem, bambae i tekem gudfala tred ya linen* we i waet, mo tred we i blu, mo tred we i pepol, mo tred we i red, nao i wivim ol kaliko we i gat ol pija blong jerubim* olbaot long hem. Nao bambae yufala i joenem ol kaliko ya blong somap ten pis kaliko we longfala blong olgeta wanwan i kasem twelef meta, mo bigfala blong olgeta wanwan i kasem tu meta.
3Taem yufala i somap ol ten pis ya finis, bambae yufala i somap olgeta bakegen, blong joenem olgeta blong mekem tu pis, we tufala i bigwan, we bambae i gat faef pis long wan, faef pis long wan.
4-5Mo bambae yufala i tekem kaliko we i blu, yufala i wokem ol rop long hem, nao yufala i wokem hol long ol rop ya, we huk i save holem, nao bambae yufala i somap ol rop ya long saed blong tu bigfala pis kaliko ya, we fifti rop i go long saed blong wan, fifti rop i go long saed blong wan.
6Nao bambae yufala i wokem fifti huk long gol we oli gat huk long tu en, blong joenem tu bigfala pis kaliko ya i kam wanples.
7“Mo bambae yufala i somap wan tapolen bakegen, blong putum antap long gudfala kaliko ya. Bambae yufala i tekem ol tapolen ya we oli wokem long hea blong nani, yufala i somap leven pis long hem
8we longfala blong olgeta wanwan i kasem totin meta, mo bigfala blong olgeta wanwan i kasem tu meta.
9Taem yufala i somap ol leven pis ya finis, bambae yufala i somap olgeta bakegen, blong joenem olgeta long tu pis we tufala i bigwan, we bambae i gat faef pis long wan, sikis pis long wan. Mo bambae yufala i benem namba sikis haf blong seken kaliko ya, blong i hang dabol long fran blong Haos Tapolen ya.
10Mo bambae yufala i tekem sam moa kaliko bakegen, yufala i wokem rop long hem, mo yufala i wokem hol long ol rop ya, nao yufala i somap ol rop ya long saed blong tu bigfala pis tapolen ya, we fifti rop i go long saed blong wan, fifti rop i go long saed blong wan.
11Nao bambae yufala i wokem fifti huk long bras we oli gat huk long tu en, blong joenem tu bigfala pis tapolen ya i kam wan bigfala tapolen blong kavremap haos ya.
12Taem yufala i pulum tapolen ya, haf blong hem bambae i hang long baksaed blong haos ya blong blokem ples ya.
13Long tufala saed blong haos ya, bambae tapolen ya i longfala moa, i bitim fas kaliko samwe long haf meta wan saed, haf meta wan saed, mo bambae i hang olsem blong blokem tufala saed blong haos ya.
14“Mo bambae yufala i somap tu bigfala tapolen bakegen, blong kavremap haos ya tu taem moa. Wan bambae yufala i wokem long skin blong man sipsip we oli wokem i red, mo narawan, bambae yufala i wokem long nambawan leta ya we oli wokem long skin blong sikao.
15“Mo bambae yufala i wokem ol frem* blong wol blong haos ya long wud ya kasis.*
16Ol frem ya, longfala blong ol pos blong olgeta bambae i kasem fo meta, mo longfala blong ol rel blong olgeta bambae i kasem klosap seventi sentemeta.
17Mo long en blong ol frem ya daon, bambae yufala i mas wokem we evriwan oli gat tu wud i godaon, blong go insaed long ol spesel stamba blong olgeta, we bambae oli stanap long olgeta. Olgeta frem ya evriwan oli mas gat tu wud olsem blong stanap long ol stamba ya.
18Mo bambae yufala i wokem twanti frem olsem blong putum long saed blong haos ya saed i go long saot,
19mo bambae yufala i wokem foti stamba long silva blong putum tutu aninit long ol frem ya, we ol wud ya bambae oli go insaed long olgeta.
20Mo bambae yufala i wokem twanti frem bakegen, blong putum long saed blong haos ya saed i go long not,
21wetem foti stamba bakegen long silva, blong putum tutu aninit long olgeta.
22Nao bambae yufala i mas wokem sikis frem bakegen, blong go long bak blong haos ya, we hemia saed blong hem long wes,
23wetem tu spesel frem bakegen, blong go long tufala kona blong hem long bak.
24Tufala frem ya long kona, tufala i mas joen gud olwe long frem blong wol long saed, mo long frem blong wol long bak, i stat daon, i go kasem antap. Tufala frem ya, bambae yufala i wokem, blong tufala i save holemtaet tufala kona ya.
25Long fasin ya, bambae yufala i wokem eit frem bakegen, mo sikistin stamba blong olgeta we bambae yufala i wokem long silva blong putum tutu aninit long olgeta.
26“Mo bambae yufala i wokem fiftin strap long wud ya kasis, we faef i blong holemtaet ol frem long wan saed blong haos ya,
27faef i blong holemtaet ol frem long narasaed blong hem, mo faef i blong holemtaet ol frem long bak blong hem.
28Long trifala wol ya, strap we i blong holemtaet ol frem long medel, bambae i stat long wan en blong wol, i go kasem narafala en blong hem.
29Wud blong ol frem ya wetem wud blong ol strap, bambae yufala i blokem long gol, mo bambae yufala i wokem ol ring long gol, yufala i hangem long ol frem, blong ol strap ya oli gotru long olgeta blong holemtaet ol frem ya.
30Bambae yufala i mas stanemap Haos Tapolen ya, stret long plan ya we mi stap talem long yu naoia, antap long hil ya.
31“Mo bambae yufala i somap wan bigfala kaliko bakegen, we i blong brekem rum ya long tu haf. Man we i gat gudhan blong wivim kaliko we i gat pija long hem, bambae i tekem gudfala tred ya linen* we i waet, wetem tred we i blu mo tred we i pepol mo tred we i red, nao i wivim ol kaliko we i gat ol pija blong jerubim* olbaot long olgeta, nao bambae yufala i somap olgeta blong wokem bigfala kaliko ya.
32Mo bambae yufala i wokem fo pos long wud ya kasis we yufala i blokem wud blong olgeta long gol, mo bambae yufala i wokem fo spesel stamba blong olgeta long silva, we ol pos ya oli save fit gud long olgeta, mo yufala i wokem ol huk long gol, yufala i hangem olgeta long top blong ol pos ya blong kaliko ya i hang long olgeta. Nao bambae yufala i stanemap ol pos ya insaed long haos ya, blong kaliko ya i save hang long olgeta.
33-34Hib 6.19; 9.3-5Mo bambae yufala i hangem kaliko ya long ol huk ya, blong brekem rum ya long tu haf. Long saed i kam, bambae nem blong hem “Rum we i Tabu”, mo long saed i go, bambae nem blong hem “Rum we i Tabu we i Tabu”. Nao Bokis ya we i Saen blong Promes* blong mi, we tufala flat ston ya we bambae mi givim long yu i stap insaed long hem, bambae yufala i putum i stap long Rum ya we i Tabu we i Tabu. Mo bambae yufala i satem long Lid blong hem, we Lid ya i Ples we mi stap Tekemaot Sin blong yufala.
35Mo bambae yufala i putum Tebol ya blong Bred, mo Ples ya blong Putum Laet, tufala i stap long Rum ya we i Tabu, we Tebol blong Bred bambae i stap klosap long wol saed i go long not, mo Ples blong Putum Laet bambae i stap klosap long wol saed i go long saot.
36“Mo bambae yufala i tekem sam moa gudfala kaliko bakegen we oli wivim long tred ya linen, we oli wokem ol pija olbaot long hem long tred we i blu mo tred we i pepol mo tred we i red, nao yufala i somap wan bigfala kaliko long hem we i blong blokem doa blong Haos Tapolen ya.
37Mo bambae yufala i wokem faef pos bakegen long wud ya kasis, mo yufala i blokem wud blong olgeta long gol, mo yufala i wokem faef spesel stamba blong olgeta long bras, mo yufala i wokem ol huk blong olgeta long gol, nao bambae yufala i hangem kaliko ya long olgeta.”
Who We AreWhat We EelieveWhat We Do
2025 by iamachristian.org,Inc All rights reserved.
