Job 7 - Bislama Bible Revised 2012

1“Laef blong yumi long wol ya i strong tumas,

i olsem laef blong man

we oli fosem hem i kam soldia.

I olsem laef blong man

we oltaem i stap wok had tumas

long han blong hem,

2no laef blong slef*

we i wantem tumas blong go spel

long sed we i kolkol,

no laef blong wokboe

we oltaem i stap wet

blong kasem pei blong hem.

3Plante manis nao, God i stap mekem

we laef blong mi i blong nating nomo.

Evri naet, hem i stap mekem mi

mi harem nogud nomo.

4Taem mi ledaon blong slip,

be mi no save slip gud,

mi stap tantanem mi

gogo kasem delaet.

Oltaem naet i longfala tumas,

mi wantem tumas blong i delaet kwiktaem.

5Bodi blong mi i fulap long wom,

mo i gat fulap soa olbaot long hem.

Mo wota blong ol soa ya

i stap ron oltaem nomo.

6Laef blong mi i stap go kwiktaem

olsem wota we i ron,

mo tingting blong mi

i no moa stap long wan samting.

Job i prea long God

7“God, yu traem tingbaot mi.

Laef blong mi

i olsem win blong man nomo.

Gudfala taem blong mi i finis nao.

8Yu yu stap luk mi naoia,

be neva bambae yu save luk mi bakegen samtaem.

Sipos yu traem lukaot mi,

be bambae yu no save faenem mi,

bambae mi lus olgeta.

9-10Taem we man i ded,

hem i no save kambak.

Ol man we oli save hem,

i no longtaem, oli fogetem hem.

Hem i olsem klaod

we i lus i go, i finis.

11From samting ya,

tingting blong mi i trabol tumas,

i kam nogud olgeta.

Bambae mi no save stap kwaet,

mi mas tok.

12“?From wanem yu stap gad long mi olsem?

?Yu ting se mi mi bigfala anamol ya Leviatan*?

13Mi mi ledaon, mi traem spel,

mi traem faenem rod

blong tekemaot sobodi blong mi

blong mi save harem gud,

be nogat.

14Yu yu stap mekem

we mi luk ol vison* mo ol drim

we oli mekem mi

mi fraet we mi fraet,

15gogo mi no moa wantem stap

long laef ya,

mi luk se i moa gud man i jokem nek blong mi mi ded.

16Naoia mi taed finis long laef ya,

mi rere blong lego rop.

!Plis, i naf!

Yu no moa mekem wan samting long mi.

Naoia laef blong mi i blong nating nomo.

17 Sam 8.4; 144.3 “?From wanem yu stap tinghevi long man olsem?

?From wanem yu stap lesin long hem?

18Evri moning,

yu stap lukluk i kam long hem,

mo oltaem long dei,

yu stap traem faenemaot laef blong hem.

19Plis yu tanem fes blong yu

i gowe long mi,

yu givim smol janis long mi

blong mi solemdaon spet blong mi.

20Oltaem yu stap lukluk long ol man.

?Weswe?

?Sin blong mi i mekem yu

yu harem nogud?

?From wanem yu mekem mi

mi kam olsem mak

blong yu stap praktis blong sutum?

!Ating mi mi wan bigfala problem long yu!

21?From wanem yu no save fogivim mi

from ol sin blong mi?

?From wanem yu no save tekemaot

ol rong blong mi?

I no longtaem

bambae mi mi go long beregraon.

Maet yu save lukaot mi,

be mi mi lus finis.”