Neham 3 - Bislama Bible Revised 2012

Taon ya Nineve i finis olgeta

1Nao long vison* ya Profet Neham i gohed i talem se,

“Ol man Nineve.

!Sore tumas long yufala!

Yufala i man blong giaman,

mo oltaem, yufala i man blong kilim man i ded.

Ples blong yufala i fulap long ol gudgudfala samting

we yufala i tekemaot long ol narafala man

long taem blong faet.

Naoia ol enemi blong yufala oli kam finis

blong tekemaot ol samting ya long yufala bakegen.

2!Yufala i lesin!

Yufala i harem noes blong wip,

mo noes blong kat blong faet,

mo noes blong ol wil blong hem,

mo noes blong ol hos

we oli stap resis.

3Olgeta we oli stap resis long hos

oli stap go fastaem.

Naef blong faet blong olgeta

i saen we i saen,

mo ol spia blong olgeta i saen gud.

Ol dedbodi oli hip i stap,

oli plante tumas,

man i no save kaontem.

Oli stap olbaot,

we ol man oli stap stambol long olgeta.

4“Nineve.

Yu yu olsem woman blong rod stret,

we i naes we i naes.

Hem i fulap long ol fasin blong pulum ae blong man,

be i blong kilim man i ded nomo.

Yu yu stap pulum ol man blong ol narafala kantri

long ol rabis fasin blong yu,

mo yu stap holem olgeta oli kam slef* blong yu,

nao Hae God i stap panisim yu from.

5“Hae God i gat olgeta paoa,

mo hem i talem se,

‘Nineve.

Mi bambae mi panisim yu,

mi tekemaot olgeta samting

we yu yu gat.

Nao bambae mi letem

olgeta ples long wol oli luk yu,

mo bambae oli luk we yu yu sem tumas.

6Mi bambae mi mekem yu yu sem,

blong soemaot we mi no tinghevi long yu nating,

mo bambae mi kavremap yu long ol doti.

Mo taem ol man oli stap lukluk yu,

bambae oli fraet tumas.

7Olgeta man we oli luk yu,

bambae oli sek,

oli tanemraon oli gobak.

Bambae oli stap taltalem se,

“Naoia, Nineve i kam nogud finis.

?Hu bambae i save go krae long hem?”

Mi mi no save faenem wan man nating

blong mekem yu yu harem gud bakegen.’ ”

8Nao profet i talem se, “Nineve. ?Yu yu ting se paoa blong yu i strong moa winim taon ya Tebes, we i kaptel blong Ijip? Bigfala taon ya, Nael Reva i goraon long hem, olsem bigfala stonwol blong hem, mo i blokem hem blong ol enemi oli no spolem hem.

9Taon ya i rulum Itiopia mo Ijip, mo paoa blong hem i strong tumas, we i no gat en blong hem. Mo tufala kantri ya Put mo Libia, tufala tu i fren blong hem.

10Nating we hem i gat paoa olsem, be ol enemi blong hem oli kam tekemaot olgeta man blong hem oli go stap wok slef long narafala kantri. Mo oli kilim ol pikinini blong olgeta, gogo oli ded we oli stap olbaot nomo long ol kona blong ol rod. Mo oli holem ol haeman blong olgeta, oli fasem olgeta long ol jen, oli tekem olgeta i go, nao oli seraot ol man ya blong oli slef blong olgeta.

11“Nineve. Bambae ol enemi blong yu oli mekem sem fasin long yu. Yu tu, bambae yu stap wokbaot olbaot, olsem wan man we i drong, mo bambae yu traem blong ronwe long olgeta.

12Ol strong ples blong haed blong yu we yu trastem olgeta, be oli no strong nating, oli olsem tri we ol frut blong hem oli raep finis. Nao sipos man i seksekem, wantaem nomo bambae ol frut blong hem oli folfoldaon i go stret long maot blong hem.

13Ol soldia blong yu oli olsem ol woman nomo, oli no strong nating. Long kantri blong yu, ol doa* blong ol stonwol blong ol taon blong hem oli open i stap, i no gat wan samting blong blokem ol enemi we oli stap kam blong faet long yu. Ol wud we i gokros long ol doa ya blong lokemgud, faea bambae i bonem olgeta evriwan.

14Naoia, yufala i mas mekemrere ol samting, from we ol enemi blong yufala oli stap kam klosap blong raonem taon blong yufala blong faet agens long yufala. Yufala i go kasem ol wota blong dring blong yufala i stap rere, mo yufala i mekem ol strong ples blong haed blong yufala oli kam strong moa. Mo yufala i tekem red graon, yufala i purumpurumbut long hem blong i kam sofsof, blong wokem ol brikis i rere, mo yufala i mekemrere ol masin blong wokem ol brikis ya.

15Be nating we bambae yufala i mekem ol samting ya, no yufala i mekem sam samting moa blong blokem yufala, be ol enemi blong yufala bambae oli bonem sam long yufala i ded, mo bambae oli kilim ol narafala i ded long naef blong faet. Bambae oli kilim yufala evriwan i ded, olsem we ol lokis* oli flatemgud ol kakae long garen*.

“Yufala i plante tumas olsem ol lokis.

16Ol bisnesman long ples blong yufala oli plante we plante, oli winim ol sta long skae. Be naoia ol man ya oli lus finis. Olgeta evriwan oli flae i go olsem ol lokis.

17Ol haeman blong yufala oli plante tumas oli hip olsem ol lokis we oli stap hivap wanples long stonwol long koltaem. Be taem san i stap kam antap, olgeta i flae i go, we i no gat man i save weples oli go long hem.

18“King blong Asiria. Ol distrikejen* blong yu, olgeta evriwan oli ded. Ol haeman blong yu oli slip we neva bambae oli girap bakegen. Ol man blong yu oli sut wanwan finis i go antap long hil, mo i no gat man blong tekem olgeta i kambak bakegen long ples blong olgeta.

19Ol rabis fasin ya we yu yu stap mekem bifo kam kasem tede, i kasem olgeta man, mo oli stap harem nogud tumas from. Bambae soa blong yu i no save finis, mo i no gat wan samting blong mekem soa ya i kam gud bakegen. Olgeta man we oli harem nius blong ol samting ya, oli harem gud tumas, oli klapem han blong olgeta from.”