1Nao long taem ya we ol soldia blong Asiria oli stap yet long Juda,* King Hesekia i sik we i sik, we klosap i ded. Nao Profet Aesea i go luk hem, i talemaot long hem we Hae God i talem se, “Hesekia. I gud yu stretem ol bisnes blong yu, from we bambae yu yu ded, yu no save kam oraet bakegen.”
2Nao King i tanem fes blong hem i go long wol blong haos, mo i prea, i talem se,
3“Hae God. Plis yu tingbaot mi. Oltaem mi stap wok blong yu long olgeta paoa blong mi, mo long olgeta tingting blong mi. Oltaem nomo, mi stap traehad blong mekem olgeta samting we yu yu wantem.” Nao hem i stap krae we i krae, from we i harem i nogud tumas.
4Nao Hae God i talem long profet se,
5“Aesea. Yu go luk Hesekia bakegen, yu talemaot long hem we mi mi talem se, ‘Mi mi Hae God, mi God blong olfala bubu ya blong yu bifo, King Deved. Mi mi harem prea blong yu, mo mi luk we yu harem nogud tumas, yu stap krae. Bambae mi mekem yu yu oraet bakegen, mo bambae yu stap gogo kasem fiftin yia bakegen.
6Bambae mi mi tekemaot yu, mo taon ya Jerusalem,* long han blong king blong Asiria, mi sevem yu, mo bambae mi blokemgud taon ya i stap gud.’ ”
21Nao profet i go talem long ol man blong wok blong king, blong oli go tekem sam frut blong figtri,* oli wokem wan plasta long hem, oli putum long boela blong king, blong bambae i kam gud.
22Nao king i askem long hem se, “?Olsem wanem? ?Wanem saen we bambae mi save luk, blong soemaot se bambae mi save go long haos* blong Hae God?”
7Nao profet i talem se, “Hem bambae i givim wan saen long yu, blong soemaot we bambae hem i holem promes blong hem.
8Sado ya we i stap long ol step ya blong haos we King Ahas i bin wokem bifo, bambae Hae God i mekem i kambak ten step.” Nao sado ya i muf arier, i kambak ten step.
Sing blong King Hesekia9Nao biaen, taem we King Hesekia i kam gud bakegen, hem i raetem wan sing blong presem Hae God. Tok blong sing ya i olsem.
10“Hae God.
Mi mi ting
se bambae laef blong mi i finis,
we mi mi yangfala yet,
nao mi go long Hom* blong ol Dedman.
11Mi ting se long wol ya,
bambae mi no moa save luk yu bakegen,
mo mi no moa save luk ol man tu.
12Mo mi harem
se laef blong mi i kam sotfala,
bambae i finis wantaem,
olsem haos tapolen
we man blong hem i tekemaot.
Mi harem
se laef blong mi i olsem pis kaliko
we man i stap wokem,
we wok blong hem i finis,
nao i katemaot long masin,
i rolemap, i karem i go.
13Long naet,
mi stap singaot bigwan,
from we mi stap harem i nogud tumas,
olsem we laeon i stap brekem
ol bun blong mi.
I stat long moning go kasem long naet bakegen,
mi ting se yu stap mekem
laef blong mi i finis.
14Voes blong mi i kam smol,
mi no moa save tok bigwan,
mi stap krae smosmol olsem sotleg.*
Oltaem,
mi stap lukluk i go antap long heven,
gogo ae blong mi i soa.
Nao mi talem se, ‘Hae God,
plis yu tekemaot mi long ol trabol ya.
15?Bambae mi save talem olsem wanem?
!Olgeta samting ya i wok blong yu nomo!
Tingting blong mi i kam nogud,
nao mi no save slip from.
16“ ‘Hae God.
Plis yu tekemaot sik ya blong mi,
yu letem mi mi laef.
Mi bambae mi man blong yu,
we mi man blong yu olwe nomo.
17Nao tingting blong mi bambae i no moa trabol,
i kam kwaet bakegen.’
Be yu nao yu tekemaot mi
long ol bigfala trabol,
yu sevem laef blong mi.
Yu nao yu fogivim mi,
yu tekemaot ol sin blong mi,
mo yu no moa save tingbaot olgeta bakegen.
18Olgeta long Hom* blong ol Dedman
oli no save talem tangkiu long yu,
oli no save presem yu.
Ol dedman oli no save trastem yu,
se oltaem yu yu stap holemstrong promes blong yu.
19Mifala ya we i stap laef,
mifala i prapa man blong presem yu,
olsem we mi mi stap mekem naoia.
Ol papa oli stap talemaot
long ol pikinini blong olgeta,
we oltaem,
yu yu stap holem promes* blong yu.
20Hae God,
yu yu tekemaot sik blong mi,
yu mekem mi mi gud bakegen.
Bambae mifala i kilim gita,
nao mifala i sing blong presem yu.
Bambae mifala i sing blong presem yu
long haos* blong yu,
oltaem long laef blong mifala.”
Who We AreWhat We EelieveWhat We Do
2025 by iamachristian.org,Inc All rights reserved.
