Esikel 47 - Bislama Bible Revised 2012

Reva we i kamaot long haos blong Hae God i ron i go

1 Sek 14.8; Jon 7.38; Rev 22.1 Nao man ya i tekem mi, mitufala i gobak long doa blong haos* blong Hae God. Mo mi luk wan wota i stap ron, i kamaot aninit long doa ya, i ron i go long is, long ples ya we haos blong Hae God i lukluk i go long hem. Wota ya i ron, i kamaot aninit long haos blong Hae God saed i go long saot, i ron i pas long saed blong olta saed i go long saot.

2Nao man ya i tekem mi, mitufala i aot long haos blong Hae God, mitufala i pas long doa ya long saed i go long not, mitufala i aot long bigfala yad blong haos ya, nao mitufala i goraon long doa ya we i lukluk i go long is. Mo mi luk we wota ya i ron, i kamaot long saed blong doa ya, saed i go long saot.

3Nao hem i tekem longfala rula ya blong hem, i makem reva ya, i stat long ples ya, i folem i godaon long saed i go long is, i go kasem faef handred meta, nao i tekem mi, mitufala i wokbaot i gokros long reva ya long ples ya. Long ples ya, wota i no dip, i kavremap leg blong mi daon nomo.

4Nao taem mitufala i stap folem reva i go, hem i makem narafala faef handred meta bakegen, nao hem i tekem mi mi gokros long ples ya, mo long ples ya, wota i kam antap kasem ni blong mi. Nao i stat long ples ya i go daon, hem i makem narafala faef handred meta bakegen, mo i tekem mi mi gokros long ples ya, mo wota i kam antap kasem ples blong strap blong mi.

5Nao hem i makem faef handred meta bakegen, mo long ples ya, wota i kam dip we i dip tumas, we mi no save wokbaot blong gokros long hem. Hem i kam wan bigfala reva, we i stret blong man i swim nomo blong gokros long hem.

6Nao man ya i talem long mi se, “Man blong wol ya. Yu makemgud ol samting ya.”

Nao hem i tekem mi mi gobak long saed blong reva ya bakegen,

7mo taem mi kasem ples ya, mi luk we i gat plante tri i stap long tufala saed blong reva ya.

8Nao hem i talem long mi se, “Wota ya bambae i ron i gotru long kantri ya, i go long saed i go long is, i godaon long levelples ya klosap long Jodan Reva, mo bambae i go kasem Ded Si. Mo taem i ron i go long Ded Si, bambae i mekem Ded Si ya i no moa solwota, i kam gudfala freswota.

9Mo long olgeta ples we reva ya i ron i go long hem, bambae i gat ol naranarafala anamol mo fis long hem. Reva ya bambae i mekem Ded Si i kam freswota, mo long olgeta ples we i ron i go long hem, bambae i mekem olgeta samting oli laef.

10I stat long ol springwota ya long Enkedi, i go kasem ol springwota long Eneglaem, bambae ol man blong pulum fis oli stap long sanbij, oli putumaot ol net blong olgeta, blong oli drae long san. Long ples ya, bambae i gat ol naranarafala fis i stap, olsem we i gat long Mediterenian Si.

11Be solwota long ol swom mo long ol hol blong graon olbaot long so, bambae oli no save kam freswota. Bambae oli stap olsem nomo, blong ol man oli save kasem sol long olgeta.

12Rev 22.2Long reva ya, bambae ol naranarafala tri oli stap gru long tufala saed blong hem, blong givim kakae long ol man. Mo neva bambae lif blong olgeta i save drae, bambae oli stap karem frut oltaem nomo. Long evri manis, bambae oli stap karem frut, from we reva ya we i kamaot long haos blong Hae God i stap givim wota long olgeta. Ol tri ya, ol frut blong olgeta i gud blong kakae, mo ol lif blong olgeta, bambae ol man oli save yusum blong mekem ol sik man oli gud bakegen.”

Ol mak blong graon blong kantri ya Isrel

13Hae God i Masta blong yumi, mo hem i talem se, “Ol mak blong ol graon ya we bambae yufala i seraot long ol twelef laen* blong Isrel,* bambae i olsem. Tufala laen blong Josef we hem i pikinini blong Isrel, bambae oli gat tu pis graon.

14Mi mekem wan strong promes* long ol bubu blong yufala, se bambae mi givim graon ya long olgeta blong oli holem i blong olgeta. Naoia i gud yufala i seraot graon ya long yufala, we bambae yufala evriwan i gat ol pis we oli sem mak nomo.

15“Ol mak blong graon long kantri blong yufala i olsem. Mak blong graon ya long saed i go long not i stat long Mediterenian Si, i ron i go long is kasem taon ya Hetlon, mo i go kasem ples ya we rod i gotru long ol hil long Hamat, nao i go kasem taon ya Jedad.

16Nao i go kasem tufala taon ya Berota mo Sibraem, we tufala i stap long mak we i seraot graon blong taon ya Damaskes mo graon blong taon ya Hamat. Mo mak blong kantri blong yufala i gohed, i go kasem taon ya Tikon, we i stap klosap long mak blong graon blong distrik ya Haoran.

17Hemia i min se mak blong graon ya long saed i go long not i stat long Mediterenian Si, i ron i go long taon ya Enon long saed i go long is, we mak blong graon blong Damaskes mo mak blong graon blong Hamat i stap klosap long hem long saed i go long not. Hemia nao ol mak blong graon long saed i go long not.

18“Mo mak blong graon ya long saed i go long is, i stat long wan ples long mak we i seraot graon blong Damaskes mo distrik ya Haoran, nao i ron i go folem Jodan Reva, we reva ya i mak blong graon blong yufala long saed i go long is, mo graon blong Gilead i stap narasaed reva ya i go. Nao mak ya i go kasem Tama long Ded Si. Hemia nao ol mak blong graon long saed i go long is.

19“Nao mak blong graon ya long saed i go long saot i stat long Tama, i ron i go long saotwes, i pas long draeples i go kasem Kadesmeriba, we i gat wota long hem blong mekem ol samting i gru. Nao mak i ron i go long notwes, i folem mak blong graon blong ol man Ijip, gogo kasem Mediterenian Si. Hemia nao ol mak blong graon long saed i go long saot.

20“Mo Mediterenian Si, hem i mak blong graon long saed i go long wes, mo mak ya i ron i go long not i go kasem wan ples long rod we i gotru long ol hil long Hamat, long saed i go long wes. Hemia nao ol mak blong graon long saed i go long wes.

21“Bambae yufala i mas seraot graon ya long ol laen blong yufala,

22we bambae i blong yufala oltaem nomo. Mo ol man blong ol narafala kantri we oli stap wetem yufala, mo we oli gat ol pikinini we oli bon long ples ya, bambae oli mas gat graon wetem yufala tu. Bambae yufala i mas lukluk long olgeta ya, olsem we oli laen blong yufala nomo, mo bambae yufala i mas yusum ol spesel ston* ya blong faenemaot se wanem graon bambae i go long olgeta.

23Olgeta ya bambae oli mas kasem graon blong olgeta wetem yufala, long ol ples we oli stap long hem. Mi mi Hae God, mi Masta blong yufala, mo hemia tok blong mi.”