1Nao long taem we King Asa i stap rul long Juda,* long namba toti sikis yia blong hem, King Bahasa blong Isrel* i kam long Juda blong mekem faet long olgeta, mo hem i winim taon ya Rama, nao i stat wokem stonwol blong taon ya i kam strong moa, blong mekem taon ya i kam wan strong ples, blong i blokem rod, blong man i no save goaot long Juda, mo man i no save kam insaed tu.
2Nao King Asa i tekem sam long ol silva mo ol gol we i stap long storum blong haos* blong Hae God wetem sam we i stap long haos blong hem, mo i sanem i go long King Benadad blong Siria we i stap long Damaskes. Mo i sanem tok i go long hem se,
3“I gud yumitufala i kam fren olsem we papa blong mi mo papa blong yu, tufala i bin mekem bifo. Ol silva mo ol gol ya, hem i wan smol presen nomo blong yu. Mi mi luk se i gud yu no moa fren wetem King Bahasa blong Isrel bakegen, from we sipos yu yu no moa fren wetem hem, bambae hem i mas tekemaot ol soldia blong hem i gowe long kantri blong mi.”
4Nao King Benadad i agri long tok ya we hem i talem, mo i sanem ol komanda blong hem wetem ol soldia blong hem oli go mekem faet long ol taon long Isrel saed i go long not. Olgeta oli go holem trifala taon ya Ion, mo Dan,* mo Abelbetmahaka, wetem olgeta taon long distrik ya Naftali,* we King Bahasa i stap putumgud ol kakae wetem ol samting blong faet i stap long hem.
5Nao taem King Bahasa i harem nius blong ol samting ya, hem i no moa wok long Rama, hem i lego wok ya i stap, i gobak.
6Nao King Asa i singaot ol man Juda oli kam wanples, mo i sanem olgeta oli go tekem olgeta ston ya wetem ol timba we king ya i bin yusum long Rama, oli karem i kam. Nao oli yusum ol samting ya blong wokem stonwol blong tufala taon ya Geba mo Mispa, tufala i kam strong moa.
Profet Hanani7Nao long taem ya, Profet Hanani i go luk King Asa, i talem long hem se, “!King! Hae God i God blong yu, be yu yu no save luk long hem, yu stap luk long king blong Siria nomo, mo from samting ya, ol soldia ya blong Isrel* oli aot long han blong yu, oli ronwe.
8!Yu luk! Ol man Itiopia wetem ol man Libia oli gat plante soldia tumas wetem plante kat blong faet mo plante soldia we oli ron long hos, be from we yu stap luk long Hae God, hem i mekem yu yu winim olgeta.
9Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta. Yu yu bin mekem i krangke, mo i stat naoia, oltaem nomo bambae i gat faet long kantri blong yu.”
10Tok ya i mekem king i kros tumas long profet ya, nao i talem long ol man blong hem blong oli holem hem, oli fasem hem long jen. Mo i stat long taem ya, hem i stap agens long sam man blong hem, i stap mekem i strong tumas long olgeta, we i spolemgud olgeta.
King Asa i ded(1 King 15.23-24)11Olgeta samting we King Asa i wokem taem hem i stap rul, i stat long stat blong rul blong hem i go kasem en blong hem, oli raetemdaon long buk ya we nem blong hem Ol Stori blong ol King blong Juda mo blong ol King blong Isrel.
12Nao long namba toti naen yia blong hem we hem i king, hem i gat wan strong sik long leg blong hem. Sik ya i mekem we hem i no save wokbaot, be hem i no save luk long Hae God blong i halpem hem, i stap luk long ol dokta nomo.
13Nao long namba foti wan yia blong hem we hem i king, hem i ded,
14nao ol man blong mekemrere bodi blong hem oli tekem pomad wetem ol lif we i gat gudfala smel, oli putum long bodi blong hem, nao oli go berem* hem long wan hol long ston we hem i katemrere i stap, long haf blong taon ya Jerusalem* we nem blong hem “Taon* blong King Deved”. Mo taem oli berem hem finis, oli mekem wan bigfala faea blong ona long hem.
Who We AreWhat We EelieveWhat We Do
2025 by iamachristian.org,Inc All rights reserved.
