Ol Proveb 6 - Bislama Bible Revised 2012

Sam narafala tok blong wekemap man

1Pikinini blong mi. Sipos wan man i gat kaon, nao yu yu promes blong pemaot ol kaon blong hem,

2promes ya blong yu i olsem wan trap we yu yu wokem, we bambae i holem yu bakegen.

3Sipos yu mekem olsem, yu yu stap long paoa blong man ya finis, be i gat rod i stap we i save tekemaot yu long bisnes ya. Kwiktaem nomo, yu mas hareap blong go luk man ya, mo yu mas krae long hem blong i letem yu yu go fri.

4Yu no mas slip, mo yu no mas tektaem. Yu mas go naoia nomo.

5Yu mas kamaot long trap ya, yu ronwe, olsem we faol i kamaot long trap, no anamol ya dia* i resis blong ronwe long man we i wantem kilim hem i ded.

6I moa gud ol lesman oli lanem fasin blong anis.

7Ol anis oli no gat lida, no jif, no gavman blong olgeta,

8be long gudtaem, oli stap putumgud kakae blong olgeta i stap rere, blong oli save kakae long hadtaem.

9?Be lesman bambae i save slip long bed blong hem gogo kasem wetaem? ?Wetaem bambae hem i girap i go wok?

10Prov 24.33,34Oltaem hem i stap talem se, “Bambae mi jes ledaon smol nomo blong stretem baksaed blong mi, mi spel lelebet.”

11Be long fasin ya, bambae hem i save kam puaman, nao hadlaef ya blong puaman bambae i holem hem, olsem we man blong stil i kam, i holemtaet hem, we bambae i no save aot bakegen.

12Ol man nogud we oli no save mekem wan gud samting, fasin blong olgeta, oltaem nomo oli stap giaman olbaot long ol man.

13Olgeta oli stap satem ae blong olgeta long ol man, mo oli stap toktok long han blong olgeta blong trikim olgeta,

14mo long krangke fasin blong olgeta, oltaem oli stap mekem plan blong wokem ol rabis samting nomo. Oltaem nomo, ol man olsem oli stap mekem trabol long evri ples.

15Mo from samting ya, bigfala trabol bambae i kam long olgeta, we bambae oli sek nomo long hem, mo bambae oli karekil, nao oli ded from.

16-19I gat sam fasin blong man i stap, we oli nogud olgeta long fes blong Hae God, we hem i no laekem olgeta nating. Ol fasin ya, i gat

fasin blong praod,

mo fasin blong giaman,

mo fasin blong kilim man we i no mekem samting nogud,

mo fasin blong mekem ol rabis plan,

mo fasin blong go kwik blong mekem ol samting nogud,

mo fasin blong giaman insaed long kot,

mo fasin blong mekem ol fren oli harem nogud, oli seraot.

Ol fasin ya, Hae God i no wantem luk olgeta nating.

Tok blong wekemap man blong i no go slip wetem woman blong narafala man

20Pikinini blong mi. Yu mas mekem olsem we mi wetem mama blong yu i stap talem long yu, mo yu no mas fogetem ol samting ya we mitufala i stap tijim yu long hem.

21Oltaem yu mas holem tok ya blong mitufala long tingting blong yu,

22nao taem yu stap wokbaot, bambae hem i stap lidim yu. Long dei, bambae hem i stap soemaot rod long yu, mo long naet, bambae i stap lukaot gud long yu.

23Hem i olsem laet we i stap saen, mo i save tijim yu long stret fasin, blong yu folem oltaem long laef blong yu.

24Hem i save blokem yu blong yu no go klosap long woman nogud, mo i save holem yu, blong toktok blong woman blong narafala man we i traem switim yu, bambae i no save pulum yu, blong mekem yu yu foldaon.

25Yu no mas letem we fes blong woman we i naes tumas i spolem tingting blong yu, no we fasin blong woman we i stap toktok long yu long ae blong hem, i holem yu olsem wan trap.

26Sipos man i go slip wetem woman blong rod, bambae hem i lusum smol mane nomo, olsem praes blong wan bred, be fasin ya we man i go slip wetem woman blong narafala man, hem i save mekem man ya i lusum evri samting we hem i gat.

27?Olsem wanem? ?Yu ting se yu save holem faea long jes blong yu, we klos blong yu i no save bon?

28?No yu ting se yu save wokbaot long sakol faea we i laet, we i no save bonem leg blong yu? !Nogat!

29Mo long sem fasin, sipos man i go slip wetem woman blong narafala man, bambae hem i mas kasem trabol we bambae i harem nogud tumas from.

30Sipos man blong stil i stap stilim kakae from we hem i hanggri tumas, ol man oli no save tingting nogud tumas long hem,

31be sipos oli kasem hem, bambae hem i mas givim jenis blong ol kakae ya seven taem. Bambae hem i mas givim evri samting we hem i gat blong stretem samting ya.

32Be man we i go slip wetem woman blong narafala man, hem i no gat hed nating. Fasin ya i blong spolem hem nomo,

33mo bambae ol man oli no moa save ona long hem. Bambae oli kilim hem, mo oli mekem hem i sem bigwan, we nem blong hem bambae i nogud oltaem nomo long fes blong olgeta.

34Man i save kros, be sipos narafala man i kam slip wetem woman blong hem, bambae hem i kros moa i bitim mak, mo bambae hem i save kilim man ya, we i no gat sore.

35Sipos man ya i traem givim mane long hem, bambae hem i no save tekem, mo sipos i givim plante presen long hem, be ol samting ya i no save mekem kros blong hem i finis.