1 ! Oltaem, yufala i stap sanem ol man blong yufala oli gokros long solwota, blong oli go pem wit* long ol man Ijip, blong salem long ol narafala man, mo blong mekem bisnes wetem ol man blong ol narafala kantri, be i moa gud yufala i harem nogud, yufala i krae bigwan.
4“ ‘!Ol man Saedon! !Mi luk we yufala i sem bigwan! Solwota i tanem baksaed long yufala, mo i talemaot i klia, we hem i no save yufala. Hem i talem se neva hem i gat bel samtaem, mo neva hem i bonem pikinini blong yufala. Neva hem i stap lukaot long wan boe blong hem, no long wan gel blong hem.
5“ ‘Taem ol man Ijip oli harem nius blong taon ya Taea, olgeta oli sek, mo oli trabol tumas.
6“ ‘!Ol man Fonisia! !I moa gud yufala i harem nogud, yufala i krae bigwan! !I gud yufala i traem ronwe blong go long Spen!
7Taea i wan olfala taon we ol olfala blong yufala bifo oli wokem longtaem finis, mo oltaem, ol man blong hem oli stap harem gud, oli stap glad. ?Be olsem wanem taon ya i kam nogud olsem? Bifo, ol lida blong taon ya oli stap sanem ol man blong olgeta oli gokros long solwota, oli go statem ol niufala ples long ol narafala kantri we i longwe. ?Be naoia olsem wanem?
8Taon ya blong yufala, bifo, hem i stap putumap ol man oli stap rul long ol narafala ples, mo ol man blong hem we oli stap wokem bisnes, ol man oli stap ona moa long olgeta, i winim ol narafala bisnesman. ?Hu ya i mekem plan blong trabol ya i kam kasem yufala?
9Mi mi gat olgeta paoa, mo mi nao mi mekem plan blong samting ya. Mi luk we yufala long taon ya i stap praod tumas long ol samting we yufala i stap mekem, nao mi mekem plan blong tekemaot praod blong yufala, mo blong daonem yufala ya we ol man oli stap ona moa long yufala. Mi mi mekem olsem, blong mekem tingting blong yufala i stap daon olgeta.
10“ ‘!Ol man Taea! Yufala ya we i go stap long niufala ples ya long Spen, yufala i gohed, yufala i digim graon, yufala i planem kakae. Long hom, i no moa gat pasis i stap, blong yufala i go haed long hem.
11Mi mi stretem han blong mi i go kasem narasaed solwota i go, mo mi kafsaedem ol kingdom finis, mi mekem olgeta oli foldaon. Mi mi talem strong se ol taon ya blong ol man Fonisia we oli stap wokem bisnes, ol enemi oli kam, oli flatemgud olgeta.
12!Ol man Saedon! Bifo, yufala i stap harem gud, yufala i stap glad, be gudtaem ya blong yufala i finis. Naoia yufala i stap aninit long han blong ol enemi blong yufala. Mo sipos yufala i stap ronwe, nating we yufala i go kasem Saepras, be bambae yufala i no save stap gud.
13“ ‘I no ol man Asiria we oli mekem Taea i kam ples blong ol wael anamol, ol man Babilonia nomo oli mekem samting ya. Olgeta ya nao oli wokem ol wajhaos* raon long taon ya, blong oli stap long hem, oli sutum ol man insaed, mo oli brekemdaon ol bigfala stonwol blong taon ya. Mo taem olgeta oli finisim wok blong olgeta, taon ya Taea i kam nogud olgeta.
14“ ‘!Ol boskru long sip! Yufala i stap long medel solwota, be i moa gud yufala i harem nogud, yufala i krae bigwan. Taon ya we i hom blong yufala, we yufala i stap dipen long hem, ol enemi oli spolem hem finis.
15“ ‘I gat taem i stap kam, we ol man bambae oli fogetem taon ya blong yufala gogo seventi yia i pas. Taem ya i olsem laef blong wan king, we oli stap makem i stat long taem ya we hem i bon, gogo kasem we hem i ded. Mo taem we ol yia ya i finis, taon ya bambae i girap bakegen, i mekem olsem woman blong rod ya we olfala sing i tokbaot, we i talem se,
16“!O, woman blong rod!
!Sore tumas long yu!
!Ol man oli fogetem yu finis!
Yu go tekem gita blong yu,
yu wokbaot long taon.
I gud yu kilim gita blong yu bakegen,
mo yu sing long ol sing blong yu,
blong pulum ol man oli kam,
oli hivap raon long yu bakegen.”
17“ ‘Taem we ol yia ya i pas, mi bambae mi letem ol man blong taon ya oli gohed bakegen long ol bisnes we oli stap mekem fastaem. Nao taon ya bambae i save mekem bisnes bakegen wetem ol narafala kantri long wol, blong winim mane long olgeta.
18Be ol mane we ol man ya bambae oli winim long ol bisnes ya we bambae oli stap mekem, bambae oli no save hivimap i stap. Ol mane ya bambae i kam tabu, i blong mi, mo olgeta we oli stap mekem wosip long mi, bambae oli yusum mane ya blong pem plante kakae wetem ol gudgudfala klos blong olgeta.’ ”
Who We AreWhat We EelieveWhat We Do
2025 by iamachristian.org,Inc All rights reserved.
