Josua Sotfala stori blong buk ya - Bislama Bible Revised 2012

Sotfala stori blong buk yaBuk ya OL STORI BLONG JOSUA, we sotfala nem blong hem JOSUA, hem i tokbaot fasin we ol laen* blong Isrel* oli kam long kantri ya Kenan,* oli holem ol graon ya blong i blong olgeta. Long taem ya, Josua we papa blong hem Nun, hem i tekem ples blong Moses, we i lida blong olgeta fastaem, hem nao i lidim olgeta blong oli kam holem kantri ya.Ol bigfala samting we i stap long buk ya, i gat stori blong taem ya we Josua olgeta oli gokros long Jodan Reva, mo we oli winim Jeriko, mo Eae, mo plante narafala taon blong kantri ya. Mo i tokbaot taem ya we olgeta oli mekem promes bakegen, se bambae oli biaen long Hae God nomo.Wan gudfala tok we i kamaot long buk ya, hemia we Josua i talem stret long ol man blong hem se, “Naoia yufala i mas jusumaot wanem god we yufala i wantem…Be mi, wetem ol famle blong mi, bambae mifala i biaen long Hae God ya nomo.” (24.15)Ol haf blong buk yaJosua olgeta oli winim ol man Kenan 1.1—12.24

Olgeta oli seraot ol graon blong kantri ya 13.1—21.45

Olgeta graon narasaed long Jodan Reva long Is 13.1-33

Olgeta graon narasaed long Jodan Reva long wes 14.1—19.51

Olgeta taon we man i save go haed long hem 20.1-9

Olgeta taon blong ol laen blong Livae 21.1-45

Olgeta blong narasaed Jodan Reva long Isoli gobak long graon blong olgeta 22.1-34

Josua i mekem las toktok blong hem blong talem tata long olgeta 23.1-16

Long taon ya Sekem oli mekem promes bakegen,se bambae oli biaen long Hae God nomo 24.1-33