1Nao long taem ya we Jotam i kam king, hem i gat twanti faef yia, mo hem i rul sikistin yia long kantri ya, mo hedkwota blong hem i stap long taon ya Jerusalem.* Mama blong hem Jerusa, we i dota blong Jadok.
2Oltaem king ya i stap mekem ol samting we Hae God i glad long hem, stret olsem we papa blong hem i bin mekem. Be hem i no mekem sin olsem we papa blong hem i bin mekem, we i go insaed long haos* blong Hae God blong bonem insens.* Be ol man blong hem oli stap gohed blong mekem sin olsem bifo.
3Hem nao i wokem doa ya blong haos blong Hae God long saed i go long not, mo i mekem plante wok moa long bigfala stonwol blong Jerusalem long ples ya we nem blong hem Ofel.
4Long ples blong hil long Juda,* hem i bildim ol taon, mo olbaot long bus, hem i wokem ol wajhaos,* mo ol strong ples blong haed long taem blong faet.
5Mo hem i go mekem faet long king blong Amon wetem ol soldia blong hem, mo i winim olgeta. Nao long tri yia, hem i stap fosem olgeta ya blong oli givim plante samting long hem. Evri yia, ol samting we hem i kasem, i gat wan tan fo handred kilo silva we praes blong hem twanti tu milian faef handred taosen vatu,* mo wan taosen tan wit* mo wan taosen tan bale.*
6King ya, Hae God i God blong hem, mo oltaem hem i stap kam strong moa, from we i stap obei long hem.
7Ol narafala samting we hem i mekem long taem ya we hem i stap rul, we hemia ol faet we hem i go mekem mo ol fasin blong hem, oli raetemdaon long buk ya we nem blong hem Ol Stori blong Laef blong ol King blong Isrel mo blong ol King blong Juda.
8Long taem we hem i kam king, hem i gat twanti faef yia, mo hem i rul sikistin yia long kantri ya, mo hedkwota blong hem i stap long taon ya Jerusalem.
9Nao hem i ded, mo oli berem* hem long wan hol long ston long haf ya blong Jerusalem we nem blong hem “Taon* blong King Deved”. Mo pikinini blong hem Ahas i tekem ples blong hem i kam king.
Who We AreWhat We EelieveWhat We Do
2025 by iamachristian.org,Inc All rights reserved.
