Namba 22 - Bislama Bible Revised 2012

King blong Moab i sanem tok i go long Balam blong i kam luk hem

1Nao ol laen* blong Isrel* oli aot long ples ya, oli wokbaot i go, gogo oli mekem ples blong olgeta long bigfala levelples long Moab, long saed blong Jodan Reva long is, long ples ya we man i save lukluk stret i go long Jeriko.

2-7 Nam 31.8; 2 Pita 2.15,16; Jud 1.11 Nao long taem ya, King Balak we papa blong hem Jiporo, hem i king blong Moab, mo taem hem i harem ol samting ya we ol laen blong Isrel oli mekem long ol laen blong Amoro,* mo i save we olgeta oli plante we plante, hem wetem ol man blong hem oli fraet tumas, oli seksek. Nao olgeta oli go talem long ol lida blong ol man Midian se, “Ol man ya oli plante tumas, bambae i no longtaem oli spolem olgeta samting long ples ya blong yumi, olsem we bul i save flatem olgeta gudfala gras long open ples.”

Nao hem i talem long ol lida blong hem, wetem ol lida blong ol man Midian se, “Yufala i go long kantri ya Amao, long taon ya Petoro, klosap long Yufretes Reva, yufala i singaot man ya Balam we papa blong hem Beo i kam. Bambae yufala i talemaot long hem, we i gat wan bigfala kampani we oli plante we plante, we oli aot long Ijip, oli kam stap klosap long yumi, mo oli kavremap olgeta ples ya finis. Mo yumi fraet se bambae oli tekem olgeta graon blong yumi, from we oli plante winim yumi. Mi mi wantem blong hem i kam givhan long mi, i singaot* trabol i kam long olgeta. Sipos hem i glad blong givhan, maet yumi save winim olgeta, yumi save ronemaot olgeta. Mi mi save we taem hem i blesem ol man, olgeta oli harem gud, mo taem hem i singaot trabol i kam long olgeta, trabol i mas kam kasem olgeta.”

Nao ol lida ya oli tekem sam mane blong go givim long man ya, blong i kam singaot trabol i kam long ol laen blong Isrel, mo oli aot, oli go luk hem, mo oli talemaot tok ya blong king long hem.

8Nao hem i talem long olgeta se, “Ale, yufala i stap. Bambae yumi slip long ples ya. Nao sipos Hae God i talem wan tok long mi long naet, tumora bambae mi save talemaot long yufala.” Mo olgeta oli stap wetem hem long naet ya.

9Nao long naet ya, God i kamtru long hem, i askem long hem se, “?Ol man ya we oli stap wetem yu, oli kam wea?”

10Mo hem i talem se, “Olgeta oli kam long Moab ya. King Balak i sanem olgeta i kam blong talemaot long mi

11we i gat wan bigfala kampani we oli plante we plante, we oli aot long Ijip, oli kam stap klosap long ples blong hem. Olgeta oli kavremap olgeta ples ya, mo hem i wantem blong mi mi givhan long hem, mi go singaot trabol i kam long olgeta, blong hem i save go mekem faet long olgeta blong ronemaot olgeta.”

12Nao God i talem long hem se, “Bambae yu no go wetem olgeta ya, mo yu no mas singaot trabol i kam long ol man ya longwe, from we mi mi stap blesem olgeta.”

13Nao long moning, Balam i girap, i go luk ol man ya, mo i talem long olgeta se, “I moa gud yufala i gohom bakegen. Hae God i blokem mi se mi no save go wetem yufala.”

14Ale, olgeta oli gobak, oli talem se, “King, hem i talem se i no save kam.”

15Nao king i sanem ol narafala lida blong hem we oli hae moa, i winim olgeta we i sanem fastaem, mo oli plante moa, blong oli go bakegen.

16Nao olgeta ya oli go luk Balam, mo oli talem long hem we king i talem se, “Plis yu no letem wan samting i blokem yu, blong yu no kam luk mi.

17Bambae mi mi pem yu we mi mekem yu yu kam rijman, mo sipos yu wantem wan samting bakegen, bambae mi mekem long yu olsem we yu yu talem. Plis yu givhan long mi, yu kam, yu singaot trabol i kam long olgeta ya.”

18Be hem i talem se, “Nating we sipos king i tekemaot olgeta gol mo silva we i stap long haos blong hem, i givim i kam long mi, be Hae God i God blong mi, mo mi bambae mi no save ova long tok blong hem. Nating we wan smol samting nomo, be mi no save brekem tok blong hem.

19Be i moa gud yufala i slip long ples ya tede, olsem we olgeta ya we i kam fastaem oli mekem, blong mi save faenemaot se Hae God i gat narafala samting blong talem long mi no nogat.”

20Nao long naet ya, God i kamtru long Balam bakegen, i talem long hem se, “Olgeta ya oli kam blong singaot yu bakegen blong go wetem olgeta. I gud yu mekemrere, yu go, be bambae yu mekem stret olsem nomo we mi mi talem long yu.”

21Nao long moning, hem i mekemrere dongki blong hem, mo i biaen long olgeta.

God i kros long Balam mo i mekem dongki i toktok

22Nao Balam i sidaon long dongki blong hem, i wokbaot i go, mo tu man blong wok blong hem i stap wokbaot wetem hem. Be God i kros tumas from we hem i go, nao taem hem i stap wokbaot i go, enjel* blong Hae God i kam stanap long rod blong blokem hem.

23Nao enjel ya i holem naef blong faet, i stap stanap long rod, mo taem dongki ya i luk hem, hem i tanem hem, i gowe long rod, i go insaed long wan garen. Be Balam i wipim hem, i mekem i kambak long rod.

24Nao enjel i go stanap long ples we rod i kam smol, we i pas long medel blong tu plantesen grep,* we tufala i gat stonwol i blokem tufala, mo rod i pas long medel blong tufala stonwol ya.

25Mo taem dongki i luk enjel ya bakegen, hem i go wokbaot klosap long stonwol, mo leg blong Balam i pas long stonwol ya. Nao hem i wipim dongki ya bakegen.

26Nao enjel i aot long ples ya bakegen, i go fastaem long tufala, i go stanap long wan ples we rod i kam smol moa, we i no moa gat rum blong dongki i pas.

27Mo taem dongki i luk enjel ya bakegen, hem i ledaon long bel blong hem. Nao Balam i kros gud long dongki ya, i gohed, i wipim hem long wokingstik blong hem.

28Nao Hae God i letem dongki ya i toktok olsem man, nao i talem long Balam se, “?Mi mi mekem wanem samting long yu? Tri taem finis yu yu wipim mi. ?From wanem yu spolem mi olsem?”

29Mo Balam i talem se, “!From we yu stap mekem long mi olsem we mi mi krangke! Sipos mi holem naef blong faet blong mi, naoia nomo bambae mi kilim yu yu ded.”

30Be dongki i talem se, “!Yu luk! !Mi mi dongki blong yu nomo! !Taem yu yu wokbaot, oltaem nomo mi nao mi stap karem yu! ?Be yu save tingbaot we mi mekem olsem long yu samtaem?”

Nao Balam i talem se, “No. I no gat.”

31Nao Hae God i letem Balam i luk enjel ya we i stap stanap long ples ya, i holem naef blong faet blong hem. Nao Balam i nildaon, i bodaon we fes blong hem i godaon, i kasem graon.

32Nao enjel ya i talem se, “!Balam! !Tri taem nao yu yu wipim dongki ya blong yu! ?From wanem yu stap mekem olsem? Mi mi kam blong blokem rod blong yu, from we yu mekem i nogud, yu hareap tumas blong kam.

33Be dongki ya blong yu i luk mi, nao tri taem, hem i gowe long rod. Sipos hem i no gowe olsem, bambae mi mi kilim yu yu ded, mi letem hem nomo i stap.”

34Nao Balam i talem se, “Sore, mi mi mekem i nogud ya. Mi no save we yu yu stap stanap long rod blong blokem mi olsem. Sipos yu ting se i no stret blong mi go, naoia bambae mi gohom bakegen.”

35Be enjel i talem se, “No, yu go wetem ol man ya, be bambae yu talem ol tok ya nomo we mi bambae mi talem long yu.” Nao Balam i biaen long olgeta, i go.

King Balak i mekem welkam long Balam

36Nao taem King Balak i harem we Balam i stap kam, hem i go long taon ya Ara blong mitim hem. Taon ya i stap long Anon Reva, we i mak blong graon blong kantri ya Moab.

37Nao hem i talem long hem se, “?From wanem yu no kam taem mi mi singaot yu fastaem? ?Yu ting se bambae mi no save pem yu?”

38Nao Balam i talem se, “Yes i tru, mi mi no kam fastaem, mi jes kam naoia, be mi no save talem wan samting blong givhan long yu. Mi mi save talem ol tok ya nomo we God i givim long mi.”

39Nao hem i go wetem king ya, tufala i gobak long taon ya Kiriatujot,

40mo long ples ya, king i kilim ol buluk mo sipsip blong hem blong mekem sakrefaes, mo i givim sam mit i go long Balam wetem ol haeman ya we oli stap wetem hem.

Fas tok we God i givim long Balam blong i talemaot long King Balak

41Nao long moning, King Balak i tekem Balam i go antap long hil ya Bamotbal, mo long ples ya, Balam i save luk haf blong ol laen* blong Isrel* ya we oli stap saed i kam.