Esikel 44 - Bislama Bible Revised 2012

Doa long saed i go long is

1Nao man ya i tekem mi, mitufala i go long bigfala yad blong haos* ya, mitufala i go kasem doa ya saed i go long is, we i blong go afsaed olgeta, be doa ya i sat nomo i stap.

2Nao Hae God i talem long mi se, “Doa ya bambae i stap sat olsem, we neva bambae i open bakegen. Bambae i no gat man i save pas long doa ya bakegen, from we mi Hae God, mi God blong yufala ol laen* blong Isrel,* mi kam insaed long hem finis. Bambae hem i stap sat olsem oltaem nomo.

3King we bambae i rul, hem nomo bambae i save kam sidaon long ples ya blong kakae long fes blong mi. Be bambae hem i kam insaed long doa ya, mo i pas i go afsaed bakegen, long doa blong bigfala rum ya, we i lukluk i go long bigfala yad ya.”

Rul blong go insaed long haos blong Hae God

4Nao man ya i tekem mi, mitufala i gotru long doa ya long saed i go long not, mitufala i go long fran blong haos* blong Hae God. Taem mi mi lukluk i go, mi luk we haos ya i fulap long laet ya we i saen we i saen, we i soemaot we Hae God i stap. Nao mi foldaon we fes blong mi i godaon long graon,

5nao Hae God i talem long mi se, “Man blong wol ya. Mi mi Hae God, mi Masta* blong yufala, mo yu mas lesin gud long olgeta samting we bambae yu harem, mo yu mas tingting gud long ol samting we yu luk. Naoia bambae mi talem long yu ol loa mo ol rul blong haos blong mi. Yu mas makemgud ol man ya we oli gat raet blong go insaed long haos ya, wetem ol man ya we oli no gat raet blong go insaed long hem.

6“Ol laen* blong Isrel* oli stap girap agens long mi, be yu mas talem long olgeta we mi mi talem se ol fasin we oli stap mekem i nogud we i nogud, i bitim mak olgeta, mo oli mas lego ol fasin ya.

7Olgeta oli stap letem ol man ya blong ol narafala kantri we oli no sakomsaes,* mo we oli no obei long mi, oli go insaed long haos blong mi, mo long fasin ya, oli mekem haos ya i no moa tabu. Hemia long taem ya we oli tekem ol gris mo ol blad blong anamol, oli mekem sakrefaes long hem i kam long mi. Ol man blong mi oli brekem promes* we mi mekem wetem olgeta, long ol fasin ya we i nogud we i nogud we oli stap mekem.

8Ol wok blong mekem wosip insaed long haos blong mi oli tabu, be olgeta oli no mekem, oli girap, oli letem ol man blong ol narafala kantri oli mekem ol wok ya.

9“Naoia mi mi talem se ol man blong narafala kantri we oli no sakomsaes, mo oli no obei long mi, bambae oli no save go insaed long haos blong mi. Mo ol man blong narafala kantri we oli stap wetem yufala, olgeta tu oli no save go insaed.”

Ol Livaet oli no moa save kam pris

10Hae God i Masta* blong yumi, mo hem i talem long mi se, “Mi bambae mi panisim ol laen* blong Livae* we oli lego mi, oli go joen wetem ol narafala laen ya blong Isrel,* nao oli stap mekem wosip long ol aedol.

11Wok blong olgeta i blong lukaot long ol doa long haos* blong mi, mo blong mekem ol narafala wok long haos blong mi, mo blong kilim anamol we man i givim blong mekem sakrefaes we i blong bonem i bon evriwan, mo blong kilim ol anamol blong ol narafala sakrefaes, mo blong givhan long ol man.

12Be from we oli lidim ol man blong mi oli go krangke, oli mekem wosip long ol aedol, mo oli lidim olgeta oli mekem sin, mi mi talem strong se olgeta ya oli mas kasem panis.

13Olgeta oli no save mekem ol wok we ol pris* oli stap mekem, mo oli no save go klosap long ol samting we oli tabu, oli blong mi, mo long ol samting we oli tabu we i tabu. Panis ya bambae mi givim long olgeta from ol samting ya we oli mekem we i nogud we i nogud.

14Mi bambae mi mekem olgeta oli stap mekem ol wok ya nomo long haos blong mi, be bambae oli no pris.

Ol man we oli save kam pris mo ol wok blong olgeta

15Hae God i Masta* blong yumi, mo hem i talem se, “Ol pris* ya we oli kamaot biaen long Jadok bifo, we hem i laen long Livae,* taem ol narafala laen* blong Isrel* oli gowe long mi, be tingting blong olgeta i stap strong long mi, nao oli stap gohed blong mekem ol wok blong mi insaed long haos* blong mi, olsem we mi mi wantem. Olgeta ya nao bambae oli stap mekem wok blong mi, mo oli save kam long fes blong mi, blong givim gris mo blad blong ol anamol blong sakrefaes i kam long mi.

16Olgeta ya nomo oli save kam insaed long haos blong mi, mo oli save mekem wok long olta blong mi, mo oli save lidim ol man blong oli mekem wosip long mi.

17Eks 28.39-43; Lev 16.4Sipos oli kam insaed long doa blong yad ya we i insaed olgeta, oli mas putum ol klos ya we oli wokem long linen.* Mo sipos oli stap wok insaed long yad ya, mo insaed long haos blong mi, oli no mas werem ol klos we oli wokem long wul.

18Oli mas fasem hed blong olgeta long kaliko ya, we oli wokem long linen, mo oli mas havem traoses tu, we oli wokem long linen, blong mekem olgeta oli no swet, mo oli no mas putum strap.

19Lev 16.23Nao sipos oli wantem go long bigfala yad ya we ol man oli stap long hem, oli mas tekemaot ol klos ya we oli stap werem long haos blong mi, oli livim long ol tabu rum ya, oli mas putum ol klos blong olgeta bakegen blong go afsaed, blong ol tabu klos ya oli no spolem ol man.

20 Lev 21.5 “Ol pris ya oli no mas katemaot olgeta hea blong hed blong olgeta, mo oli no mas letem hea blong olgeta i gru longfala, oli mas katemgud hea blong olgeta, blong i no kam longfala tumas.

21Lev 10.9Mo sipos oli rere blong kam insaed long yad ya blong haos blong mi, oli no mas dring waen.

22Lev 21.7,13,14Mo pris i no mas mared long woman we man blong hem i divos long hem. Hem i save mared long woman we i laen blong Isrel nomo we i no save man yet, no long wido blong wan pris.

23 Lev 10.10 “Ol pris ya oli mas tijim ol man blong mi blong oli luksave ol samting we oli tabu, mo ol samting we oli no tabu, mo ol samting we oli klin, mo ol samting we oli no klin long fes blong mi.

24Mo sipos ol man oli rao, ol pris ya oli mas folem ol loa blong mi blong jajem ol rao ya. Oli mas holem ol lafet blong mi, olsem we ol loa mo ol rul blong mi oli talem, mo oli mas holem Sabat* dei i tabu.

25 Lev 21.1-4 “Pris i no mas mekem hem i kam doti long fes blong mi, long fasin ya we i tajem dedbodi. Be sipos dedbodi ya i blong papa no mama blong hem, no pikinini blong hem, no brata blong hem, no sista blong hem we i no mared, hem i save tajem.

26Mo taem hem i kam klin finis, hem i mas wet bakegen, gogo kasem seven dei,

27nao biaen, hem i save go insaed long yad ya blong haos blong mi, blong mekem sakrefaes ya we i blong mekem man i klin, blong hem i save wok bakegen long haos blong mi. Mi mi Hae God, mi Masta blong yufala, mo hemia tok blong mi.

28 Nam 18.20 “Ol pris oli holem nem ya pris, from we mi mi givim nem ya long olgeta blong oli mekem wok blong mi. Mo bambae oli pasem wok ya i go long ol pikinini blong olgeta, mo olgeta we bambae oli kamaot biaen long olgeta, gogo i no save finis. Bambae oli no save gat graon long Isrel olsem ol narafala laen blong yufala, mi bambae mi stamba blong evri samting long laef blong olgeta.

29Nam 18.8-19Ol presen blong kakae blong garen, mo ol presen blong tekemaot sin, mo ol spesel sakrefaes blong tekemaot sin blong man we i ravem Hae God, no i ravem narafala man, ol kakae ya i blong olgeta nomo. Mo olgeta presen we ol laen blong Isrel oli givim i kam long mi, hemia tu i blong olgeta.

30Taem ol fas kakae blong garen oli raep, olgeta nao oli mas kasem ol beswan blong olgeta, mo evri samting we ol man oli givim long mi i blong olgeta. Mo oltaem, sipos man i mekem bred, hem i mas givim ol faswan tu long olgeta, nao bambae mi blesem hom blong man ya.

31Lev 22.8Mo ol pris oli no mas kakae pijin no mit blong anamol, we i ded hem wan, no we narafala anamol i kilim i ded.”