Hagae 2 - Bislama Bible Revised 2012

Niufala haos ya blong Hae God bambae i flas gud

1Long sem yia ya, we i namba tu yia we Darias i king, long namba seven manis*, long namba twanti wan dei blong hem, Hae God i toktok bakegen long Profet Hagae.

2Hem i sanem profet ya blong i go luk Serubabel we i distrikejen* blong Juda*, mo Hae Pris* ya Josua, mo olgeta man, blong i talemaot tok blong hem long olgeta.

3Esra 3.12Nao profet i talem long olgeta ya se, “Hae God i gat olgeta paoa, mo hem i talem se, ‘?Ating i gat sam long yufala long ples ya, we oli save tingbaot yet haos* ya blong mi bifo we i flas we i flas gud? ?Naoia yufala i luk se i olsem wanem? ?Ating yufala i luk se hemia we yufala i stap wokem naoia, bambae i no gudwan olsem hemia blong fastaem?

4Be yufala i no mas harem nogud from samting ya. Mi wantem se yufala evriwan i mas wok, from we mi mi stap wetem yufala.

5Eks 29.45,46Bifo, taem ol olfala bubu blong yufala oli aot long Ijip, mi mi mekem promes* wetem olgeta long taem ya, se oltaem bambae mi stap wetem olgeta, mo wetem olgeta we bambae oli stap kamaot biaen long olgeta. Mo kam kasem tede, mi stap yet wetem yufala. From samting ya i gud yufala i no fraet.

6 Hib 12.26 “ ‘Mi mi Hae God, mi gat olgeta paoa, mo mi talem long yufala, se bambae i no longtaem, mi mekem heven mo wol ya mo solwota, olgeta evriwan i seksek.

7Bambae mi winim olgeta narafala kantri, nao mi tekemaot ol gudgudfala samting blong olgeta, mi karem i kam, mi fulumap haos ya long hem.

8Olgeta silva mo gol we i stap long wol ya oli blong mi.

9Niufala haos ya blong mi bambae i flas we i flas gud, i winim hemia blong fastaem. Yufala i man blong mi, mo bambae mi mekem we yufala i gat plante samting, mo bambae yufala i gat pis. Mi mi Hae God, mi gat olgeta paoa, mo hemia tok blong mi.’ ”

Profet Hagae i toktok wetem ol pris

10Long sem yia ya bakegen, long namba naen manis*, long namba twanti fo dei blong hem, Hae God i toktok bakegen long Profet Hagae, i talem se,

11“Yu go faenemaot long ol pris* se loa i talem olsem wanem.

12Yu askem long olgeta se, ‘?Olsem wanem? ?Sipos wan long yufala i katemaot wan pis mit long mit ya we i blong bonem blong mekem sakrefaes, nao hem i karem mit ya long klos blong hem, mo klos ya i kasem wan bred*, no i kasem kakae we i dan finis, no i kasem waen, no olifoel* no sam narafala samting olsem, bambae samting ya i kam tabu?’ ”

Taem hem i askem kwestin ya long olgeta, oli talem se, “Nogat.”

13 Nam 19.11-22 Nao Hagae i talem se, “Taem wan man i tajem bodi blong wan dedman, yufala i save wantaem se man ya i kam doti long fes blong God. ?Nao sipos man ya i go tajem wan long ol kakae ya, kakae ya bambae i kam doti no olsem wanem?”

Ol pris oli talem se, “Yes, i mas kam doti.”

14Nao Hagae i talemaot we Hae God i talem se, “Hemia nao, i sem mak long yufala ol man blong ples ya, mo long olgeta samting we yufala i stap mekem, mo long olgeta sakrefaes we yufala i stap bonem blong givim i kam long mi. Olgeta evriwan i doti long fes blong mi.”

Hae God i mekem promes long ol man blong hem, se bambae hem i blesem olgeta

15Nao Profet Hagae i talemaot we Hae God i talem se, “Olgeta. ?Ating yufala i no luksave ol samting ya we i stap kasem yufala naoia? Bifo, taem yufala i no stat yet blong wokem haos* blong mi bakegen,

16oltaem, taem yufala i stap go blong tekemaot ol wit* mo bale* long ol garen blong yufala, yufala i stap ting se bambae yufala i kasem tu handred kilo, be yufala i stap kasem wan handred kilo nomo. Mo taem yufala i stap go blong tekem waen long ples blong hem, yufala i stap ting se bambae yufala i kasem wan handred lita, be yufala i stap kasem foti lita nomo.

17Mi mi bin mekem ol ston blong aes* i folfoldaon long ol garen blong yufala, mo mi bin sanem strong win, mo sik blong kakae i kam long ples blong yufala blong spolem olgeta kakae long ol garen blong yufala. Be yufala i no tanem tingting blong yufala nating from ol sin blong yufala blong kambak long mi bakegen.

18Tede i namba twanti fo dei blong namba naen manis*, mo tede yufala i finisim fandesen blong haos ya blong mi. I stat naoia, bambae yufala i save luk wanem we bambae i kam long yufala.

19Nating we ol kakae blong yufala i finis, mo ol rop blong grep*, mo ol figtri*, mo ol grenadin*, mo ol oliftri* blong yufala, oli no karem frut blong olgeta yet, be i stat naoia, bambae mi blesem yufala.”

Hae God i mekem promes blong hem long Serubabel

20Nao long sem dei ya bakegen, Hae God i givim tok blong hem long Profet Hagae blong i go talemaot

21long Serubabel, distrikejen* blong Juda* se, “Serubabel. I no longtaem, mi bambae mi mekem heven mo wol ya, tufala i seksek.

22Olgeta kantri we oli gat king blong olgeta, mi bambae mi spolem olgeta evriwan, mo bambae mi finisim paoa blong olgeta. Ol kat blong faet blong olgeta, mo ol man blong ron long ol kat ya, bambae mi kilim olgeta evriwan i ded. Ol hos blong olgeta, bambae mi kilim olgeta evriwan, mo ol man blong ron long ol hos ya bambae olgeta nomo oli kilkilim olgeta bakegen.

23Be yu Serubabel, long dei ya, bambae mi putumap yu, yu kam man blong wok blong mi, mo bambae mi mekem yu yu rul long nem blong mi. Mi mi jusumaot yu finis blong yu kam man blong mi. Mi mi Hae God, mi gat olgeta paoa, mo hemia tok blong mi.”