Aesea 62 - Bislama Bible Revised 2012

1“Bambae mi mi mas tok strong

blong leftemap tingting blong yufala.

Bambae mi no save stap kwaet,

gogo kasem taem ya

we Hae God bambae i sevem yumi,

i mekem we yumi kam stret man long fes blong hem,

nao stret fasin ya blong yumi

bambae i saen olsem bigfala laet,

mo fasin ya we hem i sevem yumi,

bambae i saen olsem waelken we man i laetem blong wokbaot long naet.

2Ol man blong ol narafala kantri

bambae oli luk we hem i mekem

we yumi kam stret man,

mo ol king blong olgeta bambae oli luk

we yumi kasem hae nem.

Bambae yumi karem wan niufala nem,

we hem nomo bambae i givim long yumi.

3Bambae Hae God i leftemap yumi

blong ol man oli save luk yumi,

olsem we yumi wan spesel hat blong king,

we i flas we i flas.

4Bambae ol man oli no moa save tokbaot yumi,

se Hae God i lego yumi.

Bambae oli no moa save makem

kantri blong yumi long woman

we man blong hem i ronwe long hem.

Niufala tok blong makem yumi,

bambae oli talem

se Hae God i glad long yumi.

Mo bambae oli save makem

kantri blong yumi long woman

we mared blong hem i ron gud,

from we Hae God

bambae i glad long yumi,

nao bambae i stap lukaot gud

long kantri blong yumi,

olsem we hem i man blong yumi.

5Hem i mekem yumi fastaem,

mo bambae hem i tekem yumi,

olsem we yumi woman blong hem.

Bambae hem i tekem yumi,

olsem we yang boe i tekem yang gel

we i no save man yet,

i kam woman blong hem.

Mo olsem we yang man ya bambae i glad tumas

long woman blong hem,

God blong yumi bambae i glad tumas long yumi.

6“Mi mi putum ol wajman oli stap olbaot

long bigfala stonwol blong taon ya,

mo long dei mo long naet,

olgeta oli no mas spel.

Hae God i mekem ol promes long yumi finis,

mo oltaem, oli mas prea long hem,

blong hem i stap tingbaot ol promes ya.

7Oli no mas lego fasin ya,

gogo hem i stanemap taon ya blong yumi bakegen,

i mekem i kam wan taon

we olgeta man long wol

bambae oli leftemap nem blong hem.

8Hae God i mekem wan strong promes finis,

mo bambae hem i wok long paoa blong hem,

blong mekem promes ya blong hem i kamtru.

Hem i talem se,

‘Ol kakae blong garen blong yufala,

ol enemi blong yufala

bambae oli no moa save kakae,

mo ol niufala waen blong yufala,

ol man blong ol narafala kantri

bambae oli no moa save dring.

9Yufala ya we i tekemaot kakae

long garen blong yufala,

bambae yufala i save kakae ol kakae ya,

mo bambae yufala i presem mi from.

Yufala we i lukaot long ol plantesen blong grep,

mo we yufala i karem ol frut blong olgeta i kam,

bambae yufala i save dring waen ya

long yad blong haos* blong mi.’

10Mo profet i gohed, i talem se,

“!Yufala i kamaot long taon ya!

!Yufala i mas go wokem wan rod

blong ol man ples blong yumi

we bambae oli wokbaot long hem

blong kamhom bakegen!

!Rod ya i mas wan bigwan,

we i stret gud,

mo i no mas gat ol ston long hem!

Mo yufala i mas putumap wan saen,

blong ol man blong ol narafala kantri

bambae oli save luk.

11 Aes 40.10; Rev 22.12 Hem i stap talem

long olgeta man long wol se,

‘Yufala i go talemaot

long ol man Jerusalem,

we mi bambae mi kam sevem olgeta.

Bambae mi mi tekem ol man

we mi sevem olgeta finis,

oli kam wetem mi,

oli kambak bakegen long ples blong olgeta.’

12Long taem ya,

bambae ol man oli save tokbaot yumi se,

‘Olgeta ya oli tabu,

oli man blong Hae God.’

Mo bambae oli save makem yumi se,

‘Olgeta ya, Hae God i sevem olgeta,

i mekem olgeta oli fri.’

Bambae oli save makem taon blong yumi se,

‘Taon ya, Hae God i laekem tumas.’

Mo bambae oli save talem nem blong hem se,

‘Taon ya,

Hae God i No Save Lego.’ ”