Taetas Sotfala stori blong buk ya - Bislama Bible Revised 2012

Sotfala stori blong buk yaTaetas, hem i wan yang man we i no wan laen* blong Isrel*, be hem i kam Kristin, nao i stap folem Pol blong givhan long hem long wok blong talemaot gud nius blong Jisas Kraes. Pol i putum Taetas i stap long aelan ya Krit blong i lukaot long wok blong jos long ples ya, mo hem i raetem leta ya i go long hem blong tokbaot tri samting.Faswan, Pol i talem long Taetas blong tingbaot fasin we ol lida blong jos oli mas folem. Hem i talem olsem, from we plante man Krit, fasin blong olgeta mo laef blong olgeta i no stret. Mo sekenwan, Pol i talemaot rod long Taetas we hem i mas folem blong tijim ol man long ol defren grup insaed long jos. Hemia ol olfala man, mo ol olfala woman, mo ol yang man mo ol slef*. Mo hem i talem se ol olfala woman oli mas tijim ol yangfala woman. Mo laswan, Pol i talemaot long Taetas ol tijing we hem i mas givim long ol man, we i stret blong ol Kristin man oli folem. Oli mas stap gud wetem ol narafala man, mo oli mas fren gud wetem olgeta we oli no stap raorao, mo ol memba blong jos oli no mas seraot.Ol haf blong buk yaFastok 1.1-4

Ol lida blong jos 1.5-16

Wok blong ol naranarafala grup insaed long jos 2.1-15

Toktok blong tijim ol man 3.1-11

Lastok 3.12-15