Jeremaea 33 - Bislama Bible Revised 2012

Wan narafala promes

1Nao taem we Profet Jeremaea i stap kalabus yet long yad ya blong haos blong king, Hae God i givim tok blong hem long hem bakegen.

2Nao profet i talem long ol laen* blong Isrel* se, “Olgeta. Hae God i mekem wol ya, mo hem i putum long stret ples blong hem, mo nem ya ‘Hae God’ i soemaot fasin blong hem. Hem i talem long mi se,

3‘Jeremaea. Sipos yu singaot i kam long mi, bambae mi harem yu, mo bambae mi talemaot ol gudgudfala samting long yu, we ol man oli no save faenemaot, mo we yu yu no save olgeta nating.

4Mi mi Hae God, mi God blong yufala ol laen blong Isrel, mo mi talem long yu, se olgeta haos ya long Jerusalem,* wetem haos blong king blong yufala, ol man Babilonia we oli stap hivap raon long taon ya, blong blokem yufala i stap insaed, bambae oli kam spolem olgeta evriwan.

5Sam long yufala bambae oli go faet agens long olgeta, be bambae olgeta ya oli kilim olgeta, mo bambae oli sakem ol dedbodi blong olgeta i go long ol haos blong yufala, gogo ol haos ya oli fulap gud. Mi mi kros long yufala we mi kros we mi kros, mo bambae mi yusum olgeta ya blong kilim ol man blong yufala oli ded. Mi mi tanem baksaed finis long taon ya blong yufala, from ol rabis fasin ya we yufala i stap mekem.

6Be long taem we i stap kam, bambae mi mekem taon ya i kam gud bakegen. Bambae mi mekem we ol man blong hem oli kam strong bakegen, mo we ples blong olgeta i stap gud, i gat pis oltaem.

7Long taem ya, bambae mi mi mekem ol man blong tufala kantri ya Juda* mo Isrel oli kam rijman, mo bambae mi mekem olgeta ples long tufala kantri ya oli kam gud bakegen olsem fastaem.

8Bambae mi fogivim ol man ya from ol sin we oli mekem, we oli girap, oli agens long mi, oli gowe long mi, mo bambae mi tekemaot ol sin ya blong olgeta, mi mekem olgeta oli klin bakegen.

9Long taem ya, taon ya bambae i mekem mi mi harem gud, mi stap glad oltaem long hem, mo bambae i mekem we ol man blong ol narafala kantri long wol ya oli stap ona gud long mi. Sipos olgeta oli harem nius blong ol gudgudfala samting we bambae mi mekem long ol man blong taon ya, mo we bambae mi mekem olgeta oli kam rijman, bambae olgeta oli fraet we oli seksek from.

10“ ‘Olgeta. Yufala i stap talem se, “!Kantri ya blong yumi i kam nogud olgeta! I no moa gat man i stap long hem, mo i no gat anamol tu.” Mo tok blong yufala i tru tumas. Ol taon ya long Juda mo ol big rod long Jerusalem oli stap nating, oli emti nomo. Be i gat taem i stap kam we olgeta we oli stap kamaot biaen long yufala bambae oli save harem noes blong ol man long ol ples ya bakegen.

111 Kron 16.34; 2 Kron 5.13; 7.3; Esra 3.11; Sam 100.5; 106.1; 107.1; 118.1; 136.1Bambae oli save harem ol man oli stap singsingaot, from we oli harem gud tumas, oli glad we i glad, mo oli save harem ol man we oli stap singsing long lafet blong mared. Mo oli save harem ol man we oli stap karem sakrefaes i kam long haos* blong mi, we oli stap singsing blong talem tangkiu long mi se,

“!Hae God i gat olgeta paoa!

Yumi talem tangkiu long hem,

from we hem i gud tumas.

Oltaem bambae hem i lavem yumi,

gogo i no save finis.”

Bambae mi mi mekem kantri ya blong yufala i kam gudfala bakegen olsem fastaem. Mi mi Hae God, mo hemia tok blong mi.

12“ ‘Mi mi gat olgeta paoa, mo kantri ya we naoia yufala i stap talem se i kam nogud olgeta, we i no moa gat man i stap long hem, mo i no gat anamol tu, bambae mi mi mekem i gat ol gudgudfala gras long hem bakegen, we ol man blong lukaot long sipsip bambae oli save tekem ol sipsip blong olgeta i kam long hem, blong oli kakae.

13Ol man blong lukaot long sipsip we oli stap long ol taon long ples blong hil, mo long ol taon long botom blong ol hil, mo long ol taon long haf blong Juda long saot, mo long distrik ya Benjamin,* mo long ol vilej raonabaot long Jerusalem, mo long ol taon blong Juda bambae oli save harem gud from we oli save lukaot gud long ol sipsip blong olgeta, mo oli save kaontem olgeta bakegen, blong makem olgeta. Mi mi Hae God, mo hemia tok blong mi.

14 Jer 23.5,6 “ ‘I gat taem i stap kam, we bambae mi mi mekem ol gudgudfala samting ya we mi promes long ol man Isrel mo ol man Juda bifo finis, se bambae mi mekem.

15Long taem ya, bambae mi mi jusumaot wan man we i kamaot biaen long King Deved ya bifo. Man ya bambae i wan stret man, mo mi bambae mi putumap hem i kam king, nao long evri haf blong kantri ya, hem bambae i mekem i stret nomo, mo i jajem ol man long fasin we i stret gud.

16Ol man Jerusalem wetem ol narafala man Juda, bambae mi mi sevem olgeta, mi mekem olgeta oli stap gud. Nao olgeta bambae oli save talem nem blong taon ya, se “Hae God i Mekem Yumi Kam Stret Man long Fes blong Hem.”

172 Saml 7.12-16; 1 King 2.4; 1 Kron 17.11-14Mi mi Hae God, mo mi promes long yufala, se oltaem nomo, bambae i gat wan laen blong King Deved we i save kam king.

18Nam 3.5-10Mo mi promes tu se oltaem nomo, bambae i gat ol pris we oli laen blong Livae,* we oli save mekem ol wok blong mi, mo oli save kilim anamol blong mekem sakrefaes long mi, mo oli save givim presen long mi long ol kakae blong garen,* mo oli save mekem ol narafala sakrefaes tu.’ ”

19Bakegen, profet i talemaot we Hae God i talem long hem se,

20“Jeremaea. Mi mi mekem promes finis wetem dei mo naet, se oltaem nomo, dei bambae i kam long stret taem blong hem, mo naet bambae i kam long stret taem blong hem. Mo promes ya bambae i no save foldaon samtaem.

21Mo long sem fasin, mi mekem promes wetem King Deved, man ya blong wok blong mi bifo, se oltaem nomo, wan long olgeta we i stap kamaot biaen long hem bambae i kam king. Bakegen, ol pris* blong mi oli laen long Livae, mo bifo, mi mi mekem promes wetem olgeta tu, se oltaem nomo bambae oli stap mekem ol wok blong mi long haos blong mi. Mo tufala promes ya, bambae tufala i no save foldaon samtaem.

22Bambae mi mekem ol laen blong Deved mo ol laen blong Livae oli kam plante. Bambae olgeta oli kam plante we plante, olsem ol sta long skae, mo sanbij daon long solwota, we man i no save kaontem.

23-24“?Olsem wanem? ?Yu yu harem ol tok ya we ol man blong ol narafala kantri oli stap talem? Olgeta oli talem se, ‘Fastaem Hae God i jusumaot ol man Isrel mo ol man Juda blong oli man blong hem, be naoia, hem i tanem baksaed long olgeta finis.’ From tingting ya, olgeta oli stap lukluk nogud long yufala, mo oli no moa save tingbaot yufala se yufala i wan strong kantri.

25Be mi mi Hae God, mo mi mekem promes finis wetem dei mo naet, mo mi putum ol loa finis blong holem skae mo wol.

26Bambae mi mi holem ol tok ya olwe, mo long sem fasin, bambae mi holem promes we mi mekem wetem ol laen blong Jekob* bifo, mo promes we mi mekem wetem King Deved. Ebraham, wetem pikinini blong hem Aesak, mo smol bubu blong hem Jekob, we yufala i laen blong trifala, trifala ya i stamba blong yufala, mo yufala i man blong mi. Mo bambae mi mi jusumaot wan man we i laen blong King Deved, blong mi putumap hem i kam king blong ol man blong mi. Bambae mi mi gat sore long ol man blong mi, mo long taem we i stap kam, bambae mi mekem olgeta oli kam rijman bakegen, we oli gat plante samting blong olgeta.”