Sam 106 - Bislama Bible Revised 2012

Hae God i stap mekem i gud tumas long ol man blong hem, be olgeta oli stap mekem i nogud long hem(Tok i go long ol man.)

1 1 Kron 16.34; 2 Kron 5.13; 7.3; Esra 3.11; Sam 100.5; 107.1; 118.1; 136.1; Jer 33.11 !Yumi presem Hae God!

Yumi mas talem tangkiu long hem,

from we hem i gud,

fasin blong hem blong lavem man,

hem i no save finis.

2?Hu man i naf blong talemaot

ol gudgudfala fasin we hem i mekem?

?Hu man i save presem hem

stret long mak blong gudfala fasin blong hem?

3Olgeta we oli stap obei

long ol tok blong hem,

mo we oltaem oli stap mekem

ol fasin we i stret,

bambae oli save harem gud.

(Tok i go long Hae God.)

4Hae God.

Taem yu kam blong givhan long ol man blong yu,

plis yu tingbaot mi.

Taem yu kam blong sevem olgeta,

plis yu kaontem mi wetem olgeta.

5Yu yu jusumaot olgeta

blong oli man blong yu,

nao oli stap glad from samting ya,

mo oli stap presem yu,

from we nem blong yu i stap long olgeta.

Plis yu letem mi mi luk

gudfala laef blong olgeta,

mo yu letem mi mi joen wetem olgeta

blong presem yu.

(Tok i go long ol man.)

6Yumi ya, yumi man nogud,

yumi mekem i no stret.

Oltaem yumi stap mekem ol rabis fasin

olsem we ol bubu blong yumi bifo oli bin mekem,

yumi man nogud, yumi rabis.

7 Eks 14.10-12 Hae God, hem i hae we i hae.

Bifo long Ijip,

ol bubu ya blong yumi oli no luksave

ol bigbigfala wok blong hem.

Plante taem, hem i stap soemaot long olgeta

we hem i lavem olgeta,

be olgeta oli fogetem samting ya,

nao long Red Si,

oli girap oli agensem hem.

8Be hem i sevem olgeta

olsem we hem i bin promes.

Hemia i blong soemaot

bigfala paoa blong hem.

9 Eks 14.21-31 Hem i tok long Red Si,

nao solwota i seraot,

ples i kam drae,

nao hem i lidim ol man blong hem,

oli wokbaot oli gokros long narasaed.

10Ol enemi blong olgeta oli no laekem olgeta nating,

oli agens long olgeta,

be hem i tekemaot olgeta long han blong ol enemi ya,

i sevem olgeta.

11Solwota i kambak,

i draonem ol enemi ya blong olgeta,

we i no gat wan i stap.

12 Eks 15.1-21 Nao ol man blong hem oli bilif

long ol promes blong hem,

mo oli sing, oli presem hem.

13Be i no longtaem,

olgeta oli fogetem ol samting ya

we hem i mekem,

nao oli no wet fastaem

blong harem tok blong hem,

oli girap oli folem tingting blong olgeta nomo.

14 Nam 11.4-34 Taem oli stap long draeples,

oli hanggri tumas,

nao oli askem kakae long God

blong traem hem.

15Mo hem i givim ol samting long olgeta we oli askem,

be hem i givim wan rabis sik tu long olgeta.

16 Nam 16.1-35 Long draeples ya,

olgeta oli jalus tumas long Moses,

mo long Eron we i pris blong Hae God,

mo i stap wok blong hem.

17Nao graon i open bigwan,

nao Datan mo Abiram wetem grup blong tufala

oli foldaon i go long hol ya,

nao graon i berem olgeta.

18Mo faea i kamdaon long ol man nogud ya

we oli biaen long tufala,

i bonem olgeta oli ded.

19 Eks 32.1-14 Long bigfala hil ya Sinae,

olgeta oli wokem wan pija blong bul long gol,

nao oli stap wosipim pija ya.

20God i hae we i hae,

be olgeta oli lego hem,

blong go mekem wosip long pija blong bul

we kakae blong hem gras.

21God i bin mekem ol bigbigfala wok long Ijip

blong sevem olgeta,

be oli no moa tingbaot hem.

22!Ol wok we hem i mekem long ples ya

i bigfala tumas!

!Ol wok ya we hem i mekem long Red Si,

i samting blong sapraes

we man i seksek from!

23Taem hem i talem

se hem bambae i spolem ol man blong hem,

Moses,

man ya we hem i bin jusumaot

blong i man blong wok blong hem,

hem i agens long tingting ya blong hem,

nao hem i prea i askem long God

blong i no moa kros long olgeta,

i no kam spolem olgeta,

mo God i harem hem.

24 Nam 14.1-35 Be biaen oli no wantem go insaed long gudfala kantri ya

we God i promes finis blong givim long olgeta,

from we oli no bilif long promes ya blong hem

we i talem se bambae i givhan long olgeta.

25Oli stap long haos tapolen blong olgeta,

oli stap tok smosmol

agens long Hae God,

mo oli no save lesin long hem.

26Nao hem i mekem wan strong tok long olgeta.

Hem i talem se,

“Bambae mi kilim yufala long draeples,

27 Lev 26.33 mo bambae mi mekem olgeta

we bambae oli kamaot biaen long yufala

oli stap olbaot wetem ol hiten man,

mo bambae mi letem olgeta oli ded long ol narafala kantri.”

28 Nam 25.1-13 Nao long hil ya Peoro,

ol man ya blong God oli joen

long ol man blong ples ya

we oli stap mekem wosip

long ol god ya Bal.*

Ol god ya oli no gat laef nating,

be olgeta ya oli stap kakae mit blong ol anamol

we ol man Peoro oli stap kilim

blong mekem sakrefaes long hem.

29Ol samting ya we oli mekem

i mekem Hae God i kros tumas long olgeta,

nao wan rabis sik i kasem olgeta.

30Be Finehas i jajem tufala ya

we i stamba blong trabol ya,

i kilim tufala i ded,

nao sik ya finis.

31Gudfala wok ya we hem i mekem

i soemaot we fasin blong hem i stret,

mo stori blong samting ya

bambae i no save lus samtaem.

32 Nam 20.2-13 Long springwota ya Meriba,

olgeta oli mekem Hae God i kros tumas,

nao Moses i kasem trabol

from ol samting ya we oli mekem.

33Olgeta oli mekem

tingting blong Moses i kam nogud,

nao hem i gohed

i sakem toktok long olgeta

we i no tingbaot.

34 Jaj 2.1-3; 3.5,6 Hae God i bin talem long olgeta,

se oli mas kilim ol hiten man

oli ded,

35be oli no mekem olsem,

oli girap oli stap mared long olgeta,

nao oli stap folem ol kastom blong olgeta.

36Olgeta oli stap mekem wosip

long ol narafala god ya,

nao fasin ya i kam olsem wan trap

we i kasemgud olgeta.

37 2 King 17.17 Nao oli stap kilim ol pikinini blong olgeta

blong mekem sakrefaes long ol giaman god ya.

38 Nam 35.33 Ol pikinini ya,

laef blong olgeta i stret nomo

be olgeta oli girap oli stap kilim olgeta

blong mekem sakrefaes long ol god ya,

nao fasin ya i mekem ples blong olgeta

i kam doti long fes blong God.

39Olgeta oli no moa holem promes ya

we oli mekem wetem hem

nao fasin ya we oli stap mekem

i mekem olgeta tu oli doti long fes blong hem.

40 Jaj 2.14-18 Nao from ol samting ya,

Hae God i no glad nating long olgeta,

hem i kros tumas long olgeta.

41Hem i lego olgeta i go long han blong ol hiten man,

we oli enemi blong olgeta,

nao olgeta ya oli rulum olgeta.

42Olgeta ya oli stap spolem olgeta,

oli mekem olgeta oli stap harem nogud,

aninit long han blong olgeta.

43Plante taem,

Hae God i stap sevem ol man blong hem,

be oltaem,

oli stap jusum rod blong olgeta,

we oli stap agensem hem,

nao ol sin blong olgeta

i stap kam plante moa.

44Be taem olgeta oli krae long hem,

hem i harem olgeta,

nao i sore long olgeta

from we oli stap long trabol.

45Fasin blong hem blong lavem man

i bigfala tumas,

nao from we hem i stap lavem olgeta yet,

hem i stap tingbaot promes ya blong hem

we i mekem wetem olgeta bifo,

nao i jenisim tingting blong hem,

i no moa panisim olgeta.

46Hem i mekem olgeta man ya

we oli stap spolem olgeta

oli sore long olgeta.

(Tok i go long Hae God.)

47 1 Kron 16.35,36 Hae God. Yu yu God blong mifala.

Plis yu sevem mifala,

yu tekemaot mifala long han blong ol hiten man ya,

yu tekem mifala i gobak long ples blong mifala.

Nao bambae mifala i save talem tangkiu long yu,

mifala i save presem tabu nem blong yu,

we bambae mifala i harem gud tumas from.

(Tok i go long ol man.)

48!Olgeta laen* blong Isrel*!

!Hae God i God blong yumi!

!Yumi mas presem hem!

!Naoia yumi mas presem hem!

!Mo bambae yumi mas presem hem oltaem,

gogo i no save finis!

!Yufala evriwan i talem se, “Amen”!

!Oltaem yumi mas presem Hae God!