1Nao taem Profet Samuel i kam olfala, hem i putumap tufala pikinini blong hem blong tufala i lidim ol laen* blong Isrel,* mo blong tufala i stretem ol trabol blong olgeta.
2Fasbon, nem blong hem Joel, mo sekenbon, nem blong hem Abia. Nao tufala i mekem hedkwota blong tufala long Bereseba.
3Be tufala i no folem fasin blong papa blong tufala. Tufala i wantem winim mane nomo, nao oltaem, sipos man i wantem pem tufala blong tufala i haedem ol rong blong hem, tufala i glad blong tekem mane blong hem. Nao from fasin ya, oltaem tufala i no jajem ol man long stret fasin.
4Nao ol lida blong ol laen blong Isrel oli kam wanples, mo oli go luk Profet Samuel long Rama,
5Dut 17.14oli talem long hem se, “Profet. Naoia yu yu kam olfala, be tufala pikinini ya blong yu, oltaem tufala i no folem fasin blong yu nating. From samting ya, mifala i wantem blong yu yu putumap wan king blong mifala, blong i rul long mifala, nao bambae mifala i gat king olsem we ol narafala kantri oli gat.”
6Be hem i no glad nating long tok ya blong olgeta, nao i go prea long Hae God from.
7Be Hae God i talem long hem se, “No, yu folem tingting blong olgeta. I no yu we olgeta oli no wantem, be mi ya. Oli no wantem blong mi mi King blong olgeta.
8I stat bifo olgeta, long taem ya we mi mi tekemaot ol olfala bubu blong yufala long Ijip, be oltaem, olgeta oli stap tanem baksaed long mi, oli stap folem ol narafala god, mo oli stap mekem wosip long olgeta. Mo naoia, ol man oli mekem sem samting nomo long yu we ol bubu ya blong yufala oli stap mekem long mi bifo.
9Yu go, yu mekem olsem we oli wantem, be fastaem, yu mas talemaotgud long olgeta, ol fasin we ol king blong olgeta bambae oli folem blong rul long olgeta.”
10Ale, hem i go luk olgeta ya bakegen, nao i talemaot ol samting ya long olgeta we Hae God i talem long hem.
11Hem i talem se, “Olgeta. Yufala i wantem wan king be i gud yufala i save. Fasin blong hem bambae i olsem. Bambae hem i mekem ol pikinini blong yufala oli kam soldia blong hem. Sam long olgeta bambae oli wok long ol kat blong faet we hos i pulum, sam bambae oli kam soldia blong ron long hos, mo sam bambae oli stap ron i go fastaem long ol kat blong faet ya.
12Bambae hem i mekem samfala oli kam kapten blong taosen man, mo samfala bambae oli kam kapten blong fifti man. Ol pikinini blong yufala bambae oli stap wokem ol garen blong hem, mo bambae oli stap tekemaot ol kakae long ol garen ya, oli karem i kam. Bambae oli stap wokem ol samting blong faet blong hem, wetem ol samting blong ol kat blong faet blong hem.
13Mo ol gel blong yufala, sam bambae oli stap wokem senta blong hem, mo sam bambae oli stap kuk blong hem, mo sam bambae oli stap wokem bred* blong hem.
14Ol nambawan samting blong yufala, olsem ol garen blong yufala, mo ol plantesen blong olif blong yufala, mo ol plantesen blong grep* blong yufala, we yufala i stap mekem waen long frut blong hem, be bambae hem i tekemaot olgeta long han blong yufala, i givim long ol haeman blong hem.
15Mo long evri ten hed blong kakae blong yufala bambae wan i blong hem. Mo long evri ten botel waen we yufala i kasem long garen blong yufala, bambae wan i blong hem. Nao bambae hem i stap givim ol samting ya long ol haeman blong hem, mo long ol narafala man blong wok blong hem.
16Bambae hem i tekemaot ol man blong wok blong yufala, wetem ol woman blong wok blong yufala, mo ol nambawan buluk wetem ol nambawan dongki blong yufala, blong oli go wok blong hem.
17Bambae hem i stap kaontem ol anamol blong yufala blong makem, se wan i blong hem, naen i blong yufala, wan i blong hem, naen i blong yufala, mo bambae yufala i kam slef* blong hem.
18Taem ol samting ya oli kamtru, bambae yufala i save mekem tumas toktok from ol fasin blong king ya we naoia yufala nomo i wantem, be long taem ya, Hae God bambae i no save lesin long yufala.”
19Be ol man ya oli no jenisim tingting blong olgeta nating. Oli talem long hem se, “!Nating! Mifala i wantem wan king,
20blong kantri blong yumi bambae i save kam olsem ol narafala kantri. Hem bambae i rul long yumi, mo bambae i lidim yumi long taem blong faet.”
21Profet i lesin gud long tok ya blong olgeta, nao i go talemaot tok ya long Hae God.
22Nao Hae God i talem long hem se, “Yu go, yu mekem samting ya we oli wantem. Yu putumap wan king blong olgeta.”
Nao Profet Samuel i sanem ol man ya oli gobak long ol ples blong olgeta.
Who We AreWhat We EelieveWhat We Do
2025 by iamachristian.org,Inc All rights reserved.
