2 King 2 - Bislama Bible Revised 2012

Hae God i tekem Profet Elaeja i go long heven

1Naoia i taem blong Hae God i tekemaot Profet Elaeja i go long heven, mo i sanem wan waelwin blong i kam tekemaot hem. Long taem ya, Profet Elaeja mo Profet Elisa, tufala i lego Gilgal, tufala i stap wokbaot,

2mo taem tufala i stap long rod, Profet Elaeja i talem long Profet Elisa se, “I moa gud yu stap long ples ya. Hae God i talem long mi, se bambae mi go long Betel.”

Be Profet Elisa i talem se, “Hae God i laef, i stap we i stap, mo long fes blong hem, mo long fes blong yu tu, mi mi talem tru long yu, se bambae mi no save livim yu.” Nao tufala i wokbaot bakegen, tufala i go long Betel.

3Nao long ples ya i gat wan kampani blong ol profet i stap, oli kam luk Profet Elisa, oli askem long hem se, “?Yu yu save we Hae God bambae i tekemaot masta ya blong yu i gowe long yu tede?”

Mo hem i talem se, “Yes mi mi save, be i no blong tokbaot.”

4Nao Profet Elaeja i talem long hem se, “I moa gud yu stap long ples ya. Hae God i talem long mi, se bambae mi go long Jeriko.”

Be hem i talem se, “Hae God i laef, i stap we i stap, mo long fes blong hem, mo long fes blong yu tu, mi mi talem tru long yu, se bambae mi no save livim yu.” Nao tufala i wokbaot bakegen, tufala i go long Jeriko.

5Nao long ples ya tu i gat wan kampani blong ol profet i stap, mo oli kam luk Profet Elisa, oli askem long hem se, “?Yu yu save we Hae God bambae i tekemaot masta ya blong yu i gowe long yu tede?”

Mo hem i talem se, “Yes mi mi save, be i no blong tokbaot.”

6Nao Profet Elaeja i talem long hem se, “I moa gud yu stap long ples ya. Hae God i talem long mi, se bambae mi go long Jodan Reva.”

Be hem i talem se, “Hae God i laef, i stap we i stap, mo long fes blong hem, mo long fes blong yu tu, mi mi talem tru long yu, se bambae mi no save livim yu.” Nao tufala i wokbaot bakegen, tufala i go long Jodan,

7mo i gat fifti profet tu oli stap folem tufala i go. Nao long ples ya, tufala i stap long saed blong reva, mo ol profet ya oli stanap longwe lelebet.

8Nao Profet Elaeja i tekemaot kot blong hem, i rolemap, i kilim wota ya long hem, mo wantaem nomo, wota ya i seraot long tu haf, i no moa ron. Nao tufala i wokbaot long drae graon i go kasem narasaed.

9 Dut 21.17 Long ples ya, hem i talem long Profet Elisa se, “Pikinini blong mi, i no longtaem, Hae God bambae i tekemaot mi mi go antap. Sipos i gat sam samting we yu wantem blong mi mekem long yu fastaem, i gud yu talemaot long mi.”

Mo Profet Elisa i talem se, “Plis, yu mekem long mi olsem we mi mi fasbon pikinini blong yu. Mi wantem kasem fulpaoa blong yu, blong bambae mi save tekem ples blong yu.”

10Nao Profet Elaeja i talem long hem se, “Yu yu askem wan strong samting ya, be sipos yu luk mi taem Hae God i tekemaot mi mi gowe long yu, bambae yu save kasem paoa ya. Be sipos yu no luk mi, bambae yu no save kasem.”

11Tufala i stap wokbaot i go, tufala i stap toktok, nao wan faea i kam we i olsem kat blong faet we ol hos i pulum, i pas long medel blong tufala, mo wantaem nomo, waelwin i kam tekemaot Profet Elaeja i go antap long heven.

122 King 13.14Profet Elisa i luk samting ya, nao i singaot i go antap long hem, i talem se, “!Papa blong mi! !Papa blong mi! !Yu yu strong man blong givhan long kantri ya blong yumi!” Nao hem i no moa luk hem bakegen.

Hem i harem i nogud tumas from we Profet Elaeja i gowe long hem, nao i tekemaot kot blong hem i terem long tu pis blong soemaot we hem i sore tumas.

13Nao hem i pikimap kot ya blong Profet Elaeja we i foldaon taem hem i stap go antap, mo i kambak, i stanap long saed blong Jodan Reva.

14Nao hem i kilim wota ya long kot ya, i talem se, “Hae God. Yu yu God blong Profet Elaeja. !Plis yu kam givhan long mi!” Mo taem hem i kilim wota ya, wantaem nomo wota ya i seraot long tu haf, i no moa ron, mo hem i wokbaot long drae graon, i kam kasem narasaed bakegen.

15Long taem ya, ol fifti profet ya blong Jeriko oli stap luk hem, nao oli talem se, “!Ei! !Paoa blong Profet Elaeja i kam long man ya finis!” Nao oli go mitim hem, oli bodaon long fes blong hem,

16oli talem se, “Mifala fifti, we mifala evriwan i strong blong wokbaot. I gud mifala i go lukaot masta ya blong yu. Maet Spirit blong Hae God i karem hem, i go livim hem i stap long wan bigfala hil no long wan bigfala krik samples.”

Be hem i talem se, “No, yufala i no go.”

17Nao oli stap askem long hem, gogo hem i sem long olgeta, i letem olgeta i go. Nao oli go lukaot Profet Elaeja long evri ples gogo kasem tri dei, be oli no faenem hem.

18Nao oli kambak long Profet Elisa, we i stap wet long olgeta long Jeriko, mo hem i talem long olgeta se, “!Yu luk! !Mi mi talem finis long yufala, se yufala i no go, be yufala i no harem!”

Tu merikel we Profet Elisa i mekem

19Nao ol man Jeriko oli kam luk Profet Elisa, oli talem long hem se, “Profet, yu save, ples ya i wan gudfala taon, be wota ya blong hem i nogud. Taem ol woman mo ol anamol we oli gat bel oli dring, hem i mekem olgeta oli bonem pikinini we i no taem blong olgeta yet, nao ol pikinini ya oli stap ded.”

20Nao hem i talem long olgeta se, “Yufala i tekem wan niufala besin, yufala i fulumap sol long hem, yufala i tekem i kam long mi.” Nao oli tekem i kam long hem,

21mo hem i go long springwota ya, i kafsaedem sol ya i go long hem. Nao hem i talem se, “Tok blong Hae God i olsem. Hem i talem se, ‘Mi mi Hae God, mo naoia, long fasin ya, mi mekem wota ya i klin. Bambae hem i no moa save mekem man i ded, mo bambae i no moa mekem ol woman mo ol anamol oli lusum ol pikinini blong olgeta.’ ”

22Mo wota ya i stap klin, i stat long taem ya i kam kasem tede, olsem we profet ya i talemaot.

23Nao hem i aot long Jeriko, i stap go antap long Betel, mo long rod, hem i mitim sam yangfala we oli aot long taon ya, oli stap kam. Olgeta ya oli stap jikim hem, oli stap singaot i go long hem se, “!Ei, bolhed! ?Yu stap mekem wanem long ples ya?”

24Nao hem i tanemraon, i lukluk strong long olgeta, mo i singaot* trabol i kam long olgeta long nem blong Hae God. Nao wantaem nomo, tu woman bea i kamaot long bus, tufala i kam kilim foti tu long olgeta oli ded, we tufala i tereterem olgeta long ol smosmol pis.

25Nao hem i wokbaot i go long bigfala hil ya Kamel, mo biaen i kambak long Sameria.*