Jajes 3 - Bislama Bible Revised 2012

Ol man we oli stap yet long kantri ya

1Nao long taem ya, i gat ol laen* blong Isrel* oli stap, we oli no lanem fasin blong faet, from we oli no bin joen wetem ol olfala blong olgeta we oli go mekem faet long ol man Kenan* bifo. Nao Hae God i letem ol man Kenan oli stap yet long kantri ya, blong hem i save yusum olgeta blong traem ol man ya blong hem.

2Hem i letem olgeta oli stap long kantri ya from wan samting nomo. Oltaem, i gat olgeta we oli stap kamaot biaen long ol man ya blong hem, we oli no go long faet yet, mo hem i wantem lanem olgeta ya long fasin blong faet.

3Olgeta we hem i letem olgeta oli stap yet long kantri ya, i gat ol man Filistia ya we oli stap long ol faef taon blong olgeta, mo i gat ol laen blong Kenan, mo ol laen blong Saedon, mo ol laen blong Hivi* we oli stap olbaot long ol hil long Lebanon, i stat long hil ya Balemon, i go kasem ples ya Hamat, we rod i pastru long ol hil.

4Olgeta ya, Hae God i stap yusum olgeta blong traem ol man ya blong hem, se oli save obei long ol tok we hem i putum, no nogat. Hemia ol tok ya we hem i givim long Moses bifo, blong hem i talemaot long ol olfala bubu blong olgeta.

5Nao ol man ya blong hem oli mekem ples blong olgeta wetem ol laen blong Kenan, mo ol laen blong Het, mo ol laen blong Amoro,* mo ol laen blong Hivi, mo ol laen blong Jebus, mo ol man we oli stap long ol smosmol vilej long ples blong hil.

6Be oltaem, ol laen blong Isrel ya oli girap, oli stap tekem ol gel blong ol narafala laen ya oli mared long olgeta, mo oli letem ol man blong ol narafala laen ya oli stap tekem ol gel blong olgeta oli mared long olgeta. Mo oltaem, oli stap mekem wosip long ol god blong ol narafala man ya.

Otniel i kam lida blong olgeta

7Hae God i God blong ol laen* blong Isrel,* be olgeta oli girap, oli no moa tingbaot hem, oli stap mekem ol fasin we i no stret nating long fes blong hem. Oltaem, olgeta oli stap mekem wosip long ol pija blong god ya Bal,* mo blong woman god ya Asera,*

8mo from samting ya, Hae God i kros tumas long olgeta. Nao hem i putum olgeta long han blong King Kusan Risataem blong kantri ya Mesopotemia. King ya i aot long kantri blong hem, i kam mekem faet long olgeta, i winim olgeta, nao olgeta oli stap long han blong hem eit yia.

9Be biaen, oli krae i go long Hae God blong i kam givhan long olgeta, mo hem i jusumaot wan man blong i tekemaot olgeta long han blong king ya, i sevem olgeta. Man ya, nem blong hem Otniel, mo papa blong hem Kenas we i brata blong Keleb, we Keleb i fasbon long hem.

10Nao Spirit blong Hae God i kam long Otniel, i givim paoa long hem, mo hem i kam lida blong olgeta. Hem i go mekem faet long king ya, wetem ol man blong hem, mo Hae God i mekem hem i win.

11Nao kantri ya i stap kwaet nomo gogo kasem foti yia, we ol man oli no moa mekem faet, nao biaen, Otniel i ded.

Ehud i kam lida blong olgeta

12Nao biaen, ol laen* blong Isrel* oli stap mekem ol fasin we i nogud long fes blong Hae God bakegen. Nao from samting ya, hem i mekem we King Eglon blong kantri ya Moab i stap kam strong moa long olgeta.

13King ya i singaot ol man Amon, wetem ol laen blong Amalek blong oli kam joen long hem, nao olgeta oli kam mekem faet long ol laen blong Isrel ya, mo oli winim olgeta. King ya i holem taon ya Jeriko we i ples blong pamtri,*

14nao ol laen blong Isrel ya oli stap aninit long han blong hem eitin yia.

15Nao olgeta oli krae i go long Hae God bakegen blong i jusumaot wan man, blong i tekemaot olgeta long han blong king ya, i mekem olgeta oli fri. Nao hem i jusumaot wan man, nem blong hem Ehud. Man ya i leftehan, mo papa blong hem Geraha, we i laen blong Benjamin.* Nao olgeta oli sanem hem blong i karem takis blong olgeta, i go givim long King Eglon.

16-17King ya i wan fatfat man, nao Ehud i wokem wan naef blong faet we i sap tu saed, we longfala blong hem i kasem fifti sentemeta, mo i fasemtaet naef ya long raet leg blong hem, insaed long klos blong hem. Nao hem wetem ol man blong hem oli karem takis ya i go, oli givim long king,

18mo biaen, hem i talem long olgeta se, “Yumi gobak long ples blong yumi.”

19-20Be taem oli kam klosap long Gilgal, stret long ol bigfala ston ya we ol man oli katem olgeta oli kam pija blong ol god blong olgeta, hem i tanemraon, i gobak, i go luk king bakegen.

Taem hem i kamtru, king i stap sidaon long kios blong hem we i kolkol gud, antap long ruf* blong haos blong hem, mo Ehud i talem long hem se, “King. Mi mi gat wan tok blong talem long yu, we i blong yu nomo.”

Nao king i talem long ol man blong wok blong hem se, “Yufala evriwan i go afsaed, bambae mitufala nomo i stap.”

Nao taem olgeta oli go afsaed, Ehud i kam klosap long hem, i talem long hem se, “King, mi mi gat wan tok we God i talem long mi blong mi kam talemaot long yu.” Nao king i stanap,

21mo wantaem nomo, Ehud i pulumaot naef blong faet ya long lefhan blong hem, i sperem king ya long bel blong hem.

22Naef ya i go insaed olgeta i kasem handel blong hem wantaem, mo ol gris blong king i kavremapgud we man i no save luk. Ehud i no moa pulumaot naef ya, i livim i stap nomo. Naef ya i gotru long bel blong king ya, we en blong hem i kamaot daon long as blong hem.

23Nao Ehud i go afsaed, i satem tufala doa blong haos ya, i lokem tufala,

24nao i aot i go. Taem ol man blong wok blong king oli kam, oli luk we tufala doa ya i lok, be oli ting se king i stap long klosis.

25Nao oli stap wet longtaem gogo, be hem i no openem doa, nao oli tekem ki, oli openem. Mo taem oli go insaed, oli luk we masta ya blong olgeta i stap slip long floa, we i ded finis.

26Long taem ya we oli stap wet, be Ehud i aot finis, i stap resis i go, nao i go bitim ol ston ya we oli katem blong mekem pija blong ol god blong olgeta, i ronwe i go long distrik ya Efrem,* long ples blong hil, i go kasem taon ya Seira.

27Mo taem hem i kamtru long ples ya, hem i blu pupu blong singaot ol laen blong Isrel ya blong oli go mekem faet. Hem i tekem olgeta oli kamaot long ples blong hil ya,

28nao i talem se, “!Yufala i kam! !Yufala i biaen long mi! Hae God i putum ol man Moab finis long han blong yumi.” Nao olgeta oli biaen long hem, oli godaon, oli blokem ol ples blong krosem Jodan Reva we i blong go long Moab, mo oli blokemgud olgeta we oli no letem nating we wan man Moab i gokros.

29Nao long dei ya, oli kilim klosap ten taosen soldia blong ol man Moab, we oli nambawan man blong faet, mo i no gat wan long olgeta i ronwe long taem ya.

30Long dei ya, ol laen blong Isrel oli winimgud ol man Moab, mo biaen oli stap eiti yia we kantri ya i stap kwaet nomo, i no moa gat faet long ples blong olgeta.

Samgara i kam lida blong olgeta

31Nao biaen, wan narafala lida i kamaot, we nem blong hem Samgara, mo papa blong hem Anat. Hem tu i sevem olgeta, we i kilim sikis handred man Filistia oli ded. Hem i kilim olgeta long wan aean blong stikim buluk blong wok, blong mekem i hareap.