Hosea 10 - Bislama Bible Revised 2012

1“Bifo, yufala i olsem wan rop blong grep,* we i stap karem plante frut. Yufala i rijman, be taem yufala i stap kam rij moa, yufala i girap, yufala i go wokem plante olta moa blong ol narafala god ya blong yufala. Graon blong yufala i stap karem plante kakae, be taem yufala i gat plante kakae olsem, ol longlongfala ston ya we yufala i stanemap blong mekem wosip long ol narafala god ya, yufala i go flasem olgeta blong oli kam flas moa.

2Tingting blong yufala i fulap long ol fasin blong giaman, nao from samting ya, bambae yufala i mas kasem panis from ol sin ya we yufala i stap mekem. Bambae i no longtaem, God i brebrekem ol olta ya blong yufala, mo i spolemgud ol longlongfala ston ya blong yufala.

3“I no longtaem bambae yufala i save talem se, ‘Naoia yumi no moa gat king blong yumi, from we yumi no moa ona long Hae God. ?Be sipos yumi gat king, bambae hem i save mekem wanem blong givhan long yumi?’

4Oltaem tok blong yufala i no save stanap. Yufala i stap mekem ol promes wetem ol man, mo yufala i stap saenem ol promes wetem ol king blong ol narafala kantri blong wok wanples wetem olgeta, be oltaem yufala i stap giaman nomo. Stret fasin blong jajem man, yufala i kafsaedem i kam fasin nogud, mo i stap gru olsem rabis gras ya we i stap gru bigwan long garen we man i brebrekem graon blong hem finis.

5“Yufala long taon ya Sameria,* bambae yufala i fraet, from we bambae yufala i lusum bul ya we yufala i wokem long gol, we yufala i stap mekem wosip long hem long Betaven. Taem hem i go lus, bambae yufala i harem nogud, yufala i krae bigwan from. Mo taem ol pris blong hem we oli stap mekem wosip long hem oltaem, oli luk we hem i no moa gat paoa, bambae oli krae bigwan moa.

6Bambae ol man Asiria oli kam tekemaot bul ya, oli karem i go blong givim long king blong olgeta. Nao nem blong yufala bambae i kam nogud, mo bambae yufala i sem tumas, from we yufala i stap folem ol tok ya we ol narafala man oli stap givim long yufala.

7Mo bambae king blong yufala tu i lus wantaem, olsem drae lif we wota i karem i go.

8, we yufala i stap kam mekem wosip long ol narafala god ya long hem, bambae oli kam nogud evriwan. Ol olta blong ol ples ya, ropnil bambae i kavremapgud olgeta. Nao bambae yufala i singaot long ol bigbigfala hil ya se, ‘Yufala i kam kavremap mifala.’ Mo bambae yufala i krae long ol hil se, ‘Yufala i kam haedem mifala.’ ”

9 Jaj 19.1-30 Bakegen, Profet Hosea i talemaot we Hae God i talem se, “Ol laen* blong Isrel.* Bifo, ol bubu blong yufala we oli stap long taon ya Gibea, oli mekem sin agens long mi, be fasin blong olgeta i stap yet long yufala kam kasem tede. ?Yufala i ting se faet bambae i no save kam kasem yufala bakegen, olsem we i kasem olgeta ya long Gibea bifo? !Yufala i krangke!

10Yufala i man nogud, mo mi bambae mi kam mekem faet long yufala, blong panisim yufala. Ol narafala kantri bambae oli joen wanples, oli kam faet agens long yufala, mo long fasin ya, bambae yufala i kasem panis from ol sin ya blong yufala, we i plante tumas.

11“Ol man Isrel. Fastaem, fasin blong ol olfala blong yufala i gudfala tumas. Olgeta i olsem wan woman buluk we man i lanemgud hem, mo oltaem hem i rere blong purumpurumbut long hed blong wit* blong mekem kakae blong hem i kamaot. Be naoia, mi mekem olsem we mi putum yok* long nek blong woman buluk ya, blong fosem hem blong i wok strong moa. Mi mi makem finis, se ol man Juda* bambae oli olsem buluk we i pulum plao blong brebrekem graon fastaem. Mo mi makem yufala, se bambae yufala i olsem buluk we i kam biaen, i pulum narafala aean bakegen blong mekem graon ya i sofsof gud.

12Jer 4.3Mi mi talem long yufala se, ‘Mi mi Hae God, mi God blong yufala, mo yufala i mas lego ol rabis fasin blong yufala, yufala i mas mekem ol fasin we i stret gud. Mo yufala i mas lavem mi, mo tingting blong yufala i mas stap strong long mi, blong yufala i save karem ol gudfala frut long laef blong yufala. Fasin ya i olsem we man i wokem wan niufala garen, we i brebrekem graon blong hem, mo i planem ol gudfala sid long hem, mo biaen, i karem ol gudgudfala frut blong hem. Naoia i taem blong yufala i kambak long mi bakegen, mo sipos yufala i mekem olsem, bambae mi mi blesem yufala.’

13Be yufala i girap, yufala i go mekem ol rabis fasin, olsem we yufala i planem rabis sid. Mo from samting ya, yufala i stap kasem frut blong hem. Mo naoia yufala i stap kakae bakegen frut blong ol giaman toktok blong yufala.

“Taem yufala i luk we yufala i gat plante kat blong faet, mo yufala i gat plante soldia blong yufala, yufala i girap, yufala i stap trastem ol samting ya.

14Nao from we yufala i mekem olsem, bambae faet i mas kasem yufala. Ol enemi blong yufala bambae oli kam spolemgud ol taon ya blong yufala we bigfala stonwol i goraon long olgeta, stret olsem we King Salman i spolemgud taon ya Betarabel. Long taem blong faet ya, oli kilim ol woman wetem ol pikinini blong olgeta, we oli brebrekemgud bodi blong olgeta.

15Ol man Betel. Ol samting we bambae i kasem yufala from ol rabis fasin we yufala i stap mekem, bambae i olsemia nao. Mo wantaem nomo, taem faet i stat, king blong yufala bambae i ded.”