Josua 4 - Bislama Bible Revised 2012

Oli hivimap ol ston blong mekem memori blong ol samting we i kamtru

1Nao taem ol laen* blong Isrel* oli gokros long Jodan Reva finis, Hae God i talem long Josua se,

2“Yu singaot ol twelef man ya we yufala i jusumaot olgeta wanwan long ol twelef laen blong yufala.

3Mo yu talem long olgeta blong oli go karemaot twelef bigfala ston, stret long ples ya we ol pris* oli stap stanap long hem. Oli mas karem ol ston ya i kam, mo oli mas putum olgeta long ples ya we bambae yufala i stap long hem long naet ya.”

4Nao Josua i singaot ol twelef man ya we hem i makemaot olgeta finis,

5-6mo i talem long olgeta se, “Yufala i go long krik ya, stret long fored blong Bokis ya we ol pris oli stap karem, yufala i tekem twelef bigfala ston, yufala i karem i kam. I mas gat twelef ston blong makem ol twelef laen ya blong yumi. Hae God i God blong yumi, mo ol ston ya bambae i mekem memori blong ol samting ya we hem i mekem long yumi. Mo samtaem, sipos ol pikinini blong yumi oli askem se, ‘?Ol ston ya i blong wanem?’

7bambae yumi save talem long olgeta se, ‘Hemia i memori blong taem ya we ol pris oli karem Bokis ya we i Saen blong Promes* blong Hae God, oli kam blong gokros long Jodan Reva, nao wota ya i no moa ron. Ol ston ya bambae oli save stap oltaem blong mekem olgeta we bambae oli stap kamaot biaen long yumi, oli stap tingbaot ol samting we i kamtru long taem ya blong yumi, gogo i no save finis.’ ”

8Nao ol twelef man ya oli mekem stret olsem we Hae God i talem long Josua, mo hem i talemaot long olgeta. Oli go karemaot twelef ston long medel blong krik ya, oli karem i kam, we ol ston ya wanwan i makem ol twelef laen blong olgeta. Oli karem ol ston ya i kam long ples we bambae oli putumap ol haos tapolen blong olgeta long hem, mo oli putum olgeta long ples ya.

9Mo Josua i go hivimap twelef ston tu stret long medel blong krik ya, long ples we ol pris we oli karem Bokis ya oli stap stanap long hem. (Mo hip blong ston ya i stap yet long ples ya, kam kasem tede.)

10Ol pris ya oli stap stanap long medel blong krik ya, gogo kasem taem we ol man oli finisim evri samting we Hae God i talem long Josua blong i talemaot long olgeta blong oli mekem. Hemia nao olgeta samting we Moses i bin talemaot long Josua.

Olgeta man ya oli hareap blong gokros long krik ya.

11-18 Olgeta we oli laen blong Ruben,* wetem olgeta we oli laen blong Gad* mo haf ya blong olgeta we oli laen blong Manase* oli karem ol samting blong faet blong olgeta, oli go fastaem, mo ol narafala man ya oli biaen long olgeta. Oli mekem ol samting ya, stret olsem we Moses i talem bifo. Namba blong olgeta ya, i gat samwe long foti taosen man we oli karem ol samting blong faet oli pas long fes blong Hae God, nao oli go stap long bigfala levelples ya klosap long Jeriko. Ol bigfala samting ya we Hae God i mekem long medel blong olgeta long taem ya i stap soemaot we Josua i wan haeman. Nao oltaem long laef blong hem, ol man ya oli stap ona gud long hem, stret olsem we oli stap ona long Moses bifo.

Nao Hae God i talem long Josua, blong hem i talem long ol pris ya we oli stap karem Bokis ya, blong oli kamaot long krik ya. Nao hem i mekem olsem, mo taem olgeta oli kamaot, oli kam stanap long saed blong krik ya, nao wota ya i stat ron bigwan bakegen olsem fastaem, we i kavremap olgeta ples klosap long hem. Mo taem olgeta man ya oli stap evriwan long narasaed, ol pris we oli stap karem Bokis ya oli wokbaot i go fastaem long olgeta, ol man oli biaen long olgeta.

19Taem ya we olgeta oli gokros long Jodan Reva, hemia long namba ten dei blong manis* Abib,* we i fas manis blong yia. Oli go, nao oli putumap ol haos tapolen blong olgeta long Gilgal long saed blong Jeriko long is.

20Taem oli stap long ples ya, Josua i hivimap ol twelef ston ya we oli karemaot long Jodan Reva.

21Hem i talem long olgeta se, “Samtaem, sipos olgeta we bambae oli kamaot biaen long yumi oli askem long ol papa blong olgeta se, ‘?Ol ston ya i blong wanem?’

22bambae oli save talem long olgeta se, ‘Hemia i memori blong makem taem ya we ol bubu blong yumi oli kamkros long Jodan Reva long drae graon nomo.

23Hae God i God blong yumi, mo hem i mekem Jodan Reva i drae blong mekem rod blong olgeta, nao i holem i stap olsem gogo olgeta evriwan i kamkros long saed ya. Hem i mekem stret olsem we i mekem Red Si ya i drae bifo, nao ol olfala blong yumi oli kamkros long hem.

24From ol samting ya we hem i mekem, olgeta man long wol bambae oli save we paoa blong hem i bigwan tumas, mo bambae yumi save ona long hem oltaem, gogo i no save finis!’ ”