Esta 8 - Bislama Bible Revised 2012

King i letem ol laen blong Isrel oli mekemrere blong faet

1Nao long sem dei ya, olgeta samting blong Haman, enemi ya blong ol laen* blong Isrel,* king i givim olgeta evriwan i go long kwin. Mo kwin i talemaot long king we hem i wan sista blong Modekae, nao i stat long taem ya, king i givim raet long Modekae blong i save kam luk hem long haos blong hem olsem we hem i wantem.

2Mo king i tekem ring blong hem we i gat spesel mak blong hem long hem, i givim long Modekae blong hem i yusum. Ring ya, king i bin givim long Haman fastaem. Mo kwin i putum Modekae blong i stap lukaot long olgeta samting ya we i blong Haman fastaem.

3Nao kwin i luk we plan blong Haman blong kilim olgeta i ded, i stap yet, nao i nildaon long fes blong king, i stap krae, nao i askem bakegen long hem blong i mekem wan samting blong blokem plan ya.

4Nao king i holem wokingstik ya blong hem, we oli wokem long gol, i poenem kwin long hem, nao kwin i stanap, i talem se,

5“King, sipos i tru we yu yu lavem mi tumas, plis yu sore long mi. Leta ya we Haman i sanem i go long ol man, i talem long olgeta, se oli mas holem olgeta man ples blong mi we oli stap olbaot long ol kantri ya we yu yu stap rul long hem, oli mas kilim olgeta evriwan i ded. Plis yu mekem wan niufala tok blong blokem tok ya blong hem, yu sanem i go long ol man blong yu.

6King, sipos plan ya i gohed, nao ol man oli go kilim ol man ples blong mi mo ol laen blong mi oli ded, hemia bambae i nogud tumas long mi. I moa gud mi tu mi ded wetem olgeta.”

7Long taem ya, Modekae tu i stap, nao king i talem long tufala se, “Yutufala i save. Mi mi hangem Haman finis from plan ya blong hem we i mekem agens long ol man ples blong yutufala, mo yu, kwin, mi givim olgeta samting blong hem finis long yu.

8Be tok blong mi we oli raetemdaon mo i gat mak blong mi i stap long hem, nao i goaot finis long nem blong mi, i no gat man i save tekemaot. Be yutufala i save raetem wan leta i go long ol man ples blong yutufala, yutufala i save talem wanem tok long olgeta we yutufala i wantem. Bambae yutufala i raetem long nem blong mi, nao yutufala i putum mak blong mi long hem, mo yutufala i sanem i goaot long nem blong mi.”

9Nao long namba tri manis blong yia ya, long manis ya Sivan,* long namba twanti tri dei blong hem, Modekae i singaot ol sekretari blong king oli kam, nao oli raetem wan leta long nem blong king. Leta ya i blong go long olgeta laen blong Isrel, wetem ol distrikejen* mo ol minista mo ol haeman blong king long ol wan handred twanti seven provins blong hem, i stat long kantri ya India long is, i go kasem kantri ya Itiopia long wes. Nao hem i gohed i stap toktok, mo olgeta oli stap raetemdaon ol tok blong hem, mo oli tanem tok ya i go long ol lanwis blong evri provins, mo oli raetem long ol fasin blong raet blong ol lanwis ya wanwan, mo oli tanem tu i go long lanwis ya Hibru* we i lanwis blong ol laen blong Isrel, mo oli raetem long fasin blong raet blong olgeta.

10Nao Modekae i talem long olgeta blong oli raetem ol leta ya long nem blong King Sekses, mo hem i putum mak blong king long olgeta. Nao ol man blong ron long hos oli tekem ol hos blong king we oli save ron strong, oli karem ol leta ya i go long evri ples.

11-12Leta ya i talemaot long olgeta laen blong Isrel long evri taon, we king i talem se long dei ya we Haman i putum blong ol man bambae oli kam kilim olgeta i ded, bambae olgeta oli save kam wanples blong mekemrere blong faet blong sevem laef blong olgeta. Leta ya i talem se, “Long yia ya, long namba twelef manis, long manis ya Adara,* long namba totin dei blong hem, bambae yufala i save stap rere blong mekem faet. I nomata weples yufala i stap, long ol provins ya we mi mi stap rul long hem, be sipos i gat ol man we oli tekem ol samting blong faet, oli kam blong kilim yufala, bambae yufala i save go faet long olgeta. Long dei ya, bambae yufala i gat raet blong kilim olgeta oli ded, wetem ol woman blong olgeta mo ol pikinini blong olgeta, gogo olgeta oli ded evriwan, mo bambae yufala i save tekemaot olgeta samting we i blong olgeta, oli blong yufala. Hemia nao tok blong mi, we i kam long yufala evriwan, long olgeta provins we mi mi stap rul long hem.”

13Leta ya i talem long ol haeman blong king, blong oli talemaot tok ya long olgeta man long ol provins, se long dei ya, ol laen blong Isrel bambae oli save mekemrere blong faet long ol enemi blong olgeta.

14Nao ol man blong ron long hos, oli karem ol leta ya, oli resis long ol hos blong king, oli spid i go blong givimaot tok ya olsem we king i talem, mo long bigfala taon ya Susa ol man oli talemaot tok ya, blong olgeta man i harem.

15Nao Modekae i putum ol spesel klos blong king we i blu mo i waet, mo i putum wan longfala kot tu we i pepol, mo i putum wan hat blong king we i flas gud, we oli wokem long gol. Mo olgeta man long evri ples long taon ya oli stap singsingaot bigwan, from we oli glad we oli glad.

16Nao ol laen blong Isrel oli harem gud bakegen, oli glad we oli glad, from we oli haremsave se oli win finis.

17Long olgeta provins mo long olgeta taon we oli talemaot tok ya blong king, ol laen blong Isrel oli holede, nao oli stap mekem lafet we oli glad we oli glad. Mo taem samting ya i hapen, plante narafala man oli kam laen blong Isrel, from we oli fraet long olgeta.