Dutronome Sotfala stori blong buk ya - Bislama Bible Revised 2012

Sotfala stori blong buk yaTaem Hae God i tekem ol laen* blong Isrel* oli kamaot long Ijip, olgeta oli stap wokbaot foti yia long draeples from we oli mekem sin agens long hem, nao oli kamtru long kantri ya Moab, long bigfala levelples daon long saed blong Jodan Reva long is, mo oli rere blong go insaed long kantri ya Kenan* we Hae God i promes* blong givim long olgeta. Nao long ples ya, Moses we i lida blong olgeta, hem i givim ol las toktok blong hem long olgeta, mo buk ya i talemaot ol tok blong hem. Nem blong buk ya, OL LOA BLONG HAE GOD BAKEGEN, we sotfala nem blong hem DUTRONOME, mo ol haf blong tok blong hem i olsem.Fastaem, hem i tokbaot ol bigbigfala samting we Hae God i mekem long olgeta long ol foti yia we i pas, mo i tok strong long olgeta, i talem se from ol samting ya, tingting blong olgeta i mas stap strong long Hae God nomo, mo oli mas obei long hem.Mo nekiswan, hem i tokbaot Tenkomanmen we Hae God i givim long olgeta long hil ya Sinae, mo i tok strong long olgeta long faswan long ol loa ya we i talem se olgeta oli mas biaen long Hae God nomo. Mo biaen, hem i gohed blong tokbaot ol narafala loa we Hae God i givim blong oli folem long niufala kantri ya Kenan.Mo nekiswan, hem i tokbaot promes we olgeta oli mekem wetem Hae God, mo long taem ya we oli rere blong go insaed long niufala kantri ya, hem i singaot olgeta blong oli mekem promes ya wetem Hae God i kam niuwan bakegen.Mo laswan, hem i putumap Josua blong i tekem ples blong hem, i kam lida blong ol laen blong Isrel, nao hem i singim wan sing we i presem Hae God from we oltaem hem i stap holem promes blong hem long olgeta. Mo biaen, hem i blesem ol twelef laen blong Isrel wanwan, mo hem i ded long kantri ya Moab, we olgeta oli no go insaed long kantri ya Kenan yet.Bigfala tingting blong buk ya, hem i soemaot we Hae God i lavem ol laen blong Isrel, mo hem i jusumaot olgeta blong oli kam man blong hem, nao oltaem hem i stap sevem olgeta mo i stap blesem olgeta. Oltaem olgeta oli mas tingbaot samting ya, mo sipos olgeta oli lavem hem mo oli stap obei long hem, bambae oli save stap longtaem long kantri ya we hem i promes blong givim long olgeta.Tok blong japta 6 vas 4 go kasem vas 6 i talem se, “!Olgeta! !Yufala i lesin gud! Hae God i God blong yumi, mo hem wan nomo i God. Mo yufala i mas lavem hem long olgeta tingting blong yufala, mo long olgeta laef blong yufala, mo long olgeta paoa blong yufala. Yufala i no mas fogetem ol tok ya we mi mi stap givim long yufala naoia.” Tok ya i soemaot bigfala tingting blong buk ya, mo long Niutesteman, Jisas* i talem se loa ya i hae moa i winim ol narafala loa we Hae God i givim.Olbaot long buk ya, ol tok we i stap long braket i no rili haf blong stori we Moses i talem.Ol haf blong buk yaFas tok we Moses i talem 1.1—4.49

Seken tok we Moses i talem 5.1—26.19

Tenkomanmen we Hae God i givim 5.1—10.22

Ol narafala loa mo rul we hem i givim 11.1—26.19

Ol samting we oli mas mekemtaem oli go insaed long kantri ya Kenan 27.1—28.68

Olgeta oli mekem promes wetem Hae Godi niuwan bakegen 29.1—30.20

Moses i talem ol las toktok blong hem 31.1—33.29

Moses i ded 34.1-12