Habakuk 1 - Bislama Bible Revised 2012

Fastok

1Ol tok we i stap long buk ya, Hae God i soemaot long Profet Habakuk long wan vison*, blong hem i talemaot.

Habakuk i krae long Hae God from we stret fasin i lus

2Nao Profet Habakuk i talem se, “Hae God. Naoia, long ples blong mifala, ol man oli stap faet, oli stap kilkilim olgeta oli ded. Oltaem, mi stap krae i kam long yu blong yu givhan long mifala. ?Be wetaem bambae yu harem mi, yu tekemaot mifala long ol trabol ya?

3?From wanem yu letem mi mi stap luk ol trabol ya olsem? ?Bambae yu yu stap lukluk ol trabol ya gogo kasem wetaem? Naoia raonabaot long mi, ol man oli stap faet oli stap kilkilim olgeta, mo oli stap spolem olgeta samting. Olbaot long evri ples, ol man oli stap rao, mo oli stap faet.

4Long kot, ol jaj oli no moa stap folem loa, nao loa i no moa gat paoa. Ol man nogud oli stap tanem stret fasin i kam rabis fasin, nao oli stap winim ol stret man.”

Hae God i givim ansa long Profet Habakuk

5 Wok 13.41 Nao Profet Habakuk i talemaot we Hae God i talem se, “Ol man blong mi. Yufala i mas luklukgud long ol kantri ya we oli stap klosap long kantri blong yufala. Bambae yufala i sapraes long ol samting we bambae yufala i luk. Naoia long taem blong yufala, mi bambae mi mekem wan samting we taem yufala i harem nius blong hem, be bambae yufala i no save bilif nating.

62 King 24.2Mi bambae mi letem long ol man Babilonia blong oli holem paoa. Ol man ya, fasin blong olgeta i strong tumas, mo oli no save stap kwaet. Oltaem, oli stap go long evri ples blong faet from graon we i no blong olgeta.

7Olgeta ya oli stap folem tingting blong olgeta nomo, mo oli flas tumas. Oltaem oli stap mekem olgeta man oli fraet we i fraet, we oli seksek tumas from.

8“Ol hos blong olgeta, oli save spid we paoa blong olgeta i strong moa winim anamol ya leped*. Mo oli kros moa winim wael dog we i hanggri tumas, i wantem kakae. Oli stap skrasem graon, from we oli wantem hareap blong go. Ol man blong olgeta we oli stap ron long hos, oli aot longwe we longwe, oli stap resis i kam. Oli sut i kamdaon olsem bigfala pijin ya igel*, we i sut i kamdaon blong holem smol anamol blong i kakae.

9“Taem ol soldia blong olgeta oli stap kam klosap blong faet agens long wan kantri, olgeta man oli fraet, oli stap seksek tumas from. Mo oltaem, ol man we ol enemi ya oli stap holem olgeta, blong oli go wok slef* blong olgeta, oli plante we plante olsem sanbij long solwota.

10Olgeta ya oli no save tinghevi long ol king blong ol kantri ya, mo oli stap laf long ol haeman blong ol king ya. I no gat wan taon nating we stonwol blong hem i naf blong blokem olgeta. Taem oli wantem go insaed long wan taon, oli stap hivimap graon i goraon long stonwol blong hem, nao oli klaem long hem, oli go insaed, oli holem taon ya.

11Oli olsem hariken we i kam wantaem nomo i pas i go. Ol man nogud ya, oli stap trastem paoa blong olgeta nomo se i god blong olgeta.”

Profet Habakuk i krae long Hae God bakegen

12Nao Profet Habakuk i talem se, “Hae God. Yu yu God we yu stap bifo olgeta, mo yu yu God blong mi. Yu yu tabu, mo yu stap oltaem nomo, gogo i no save finis. Hae God, yu yu God blong mi, oltaem yu stap blokemgud mifala, blong mifala i no ded. Yu nomo yu letem blong ol man Babilonia oli holem paoa blong oli kam winim mifala, oli panisim mifala.

13Yu yu tabu we yu tabu. Yu no wantem nating blong luk ol rabis fasin, mo ol samting nogud we ol man oli stap mekem, oli no stret nating long ae blong yu. Be ol man Babilonia ya oli nogud we i nogud, man i no save trastem olgeta nating. ?From wanem yu stap lukluk nomo long olgeta, we yu no panisim olgeta? ?Taem oli stap kilim ol man we fasin blong olgeta i stret lelebet, winim olgeta, be from wanem yu yu stap kwaet?

14“?From wanem yu stap mekem long ol man, olsem we oli fis no oli flae, we oli no gat lida blong i lidim olgeta?

15Ol man Babilonia oli stap kasem ol man long huk, olsem fis, mo oli stap pulum plante long net. Mo taem oli stap pulum olgeta i go, oli stap singsingaot, from we oli glad we i glad.

16Net ya i olsem god blong olgeta, mo oli stap bonem insens* blong mekem wosip long hem, mo oli stap kilim anamol blong mekem sakrefaes long hem. Oli stap mekem olsem, from we oli luk se net ya i stap givhan long olgeta blong oli kasem plante gudgudfala samting.

17“?Bambae ol man ya oli stap faet agens long ol kantri ya blong flatemgud olgeta, gogo kasem wetaem? Oli no gat sore nating.”