Jenesis 43 - Bislama Bible Revised 2012

Ol brata blong Josef oli gobak long Ijip bakegen, mo Benjamin i go wetem olgeta

1Nao hadtaem ya blong kasem kakae i kam strong moa long Kenan,*

2mo taem Jekob* wetem ol pikinini blong hem oli finisim olgeta kakae ya we ol pikinini blong hem oli pem long Ijip, hem i talem long olgeta se, “I gud yufala i gobak, yufala i pem smol kakae blong yumi bakegen.”

3Be Juda* i talem long hem se, “Papa, man ya longwe i tok strong long mifala, i talem se nekis taem, sipos brata blong mifala i no kam wetem mifala, hem i no wantem luk fes blong mifala bakegen.

4Sipos yu save letem brata blong mifala i go wetem mifala, bambae mifala i save go blong pem kakae blong yu.

5Be sipos yu no save letem, bambae mifala i no save go, from we man ya i talem se, ‘Nekis taem, sipos brata blong yufala i no kam wetem yufala, mi no wantem luk fes blong yufala bakegen long ples ya.’ ”

6Nao Jekob i talem se, “?From wanem yufala i talemaot long man ya we yufala i gat narafala brata i stap? !Samting ya i mekem mi mi trabol tumas!”

7Be oli talem se, “No, be hem i stap askem plante kwestin long mifala long ol bisnes blong mifala wetem ol famle blong mifala. Hem i askem se, ‘?Papa blong yufala i stap yet? ?Yufala i gat narafala brata blong yufala bakegen?’ Mifala i harem se mifala i mas ansa long ol kwestin blong hem. Mifala i no save se bambae hem i talem long mifala se, ‘Bambae yufala i tekem brata ya blong yufala i kam.’ ?Olsem wanem bambae mifala i save samting ya?”

8Nao Juda i talem long hem se, “Yu putum boe ya long han blong mi, nao bambae mifala i aot naoia nomo. Nao bambae i no gat wan long yumi we bambae i ded long hanggri.

9Mi mi promes se mi bambae mi lukaot long hem, mo i bisnes blong mi blong mi tekem hem i kambak gud long ples ya. Mo sipos hem i no kambak gud long yu, mi bambae mi karem panis blong samting ya olwe nomo, gogo mi ded.

10Ol toktok ya i stap blokem mifala tumas ya. Sipos mifala i no stap lusum taem olsem, ating mifala i mekem tu trip finis.”

11Nao papa blong olgeta i talem se, “Sipos i mas olsem, i moa gud yufala i fulumap ol nambawan samting blong ples ya long ol bag blong yufala, blong yufala i save givim presen long haeman ya longwe. I gud yufala i tekem smol senta, wetem smol hani* mo ol lif ya blong putum long kakae we i gat gudfala tes, mo ol frut blong pistasio* mo ol frut blong amon.*

12Mo yufala i mas karem mane ya blong las trip tu i gobak, wetem narafala mane bakegen blong trip ya. Lastaem, oli givimbak mane blong yufala, oli putum insaed long ol bag blong yufala, be hem i mas gobak bakegen long olgeta longwe. Maet samting ya we oli mekem lastaem i mastik blong olgeta nomo.

13Yufala i tekem brata blong yufala, yufala i aot naoia, yufala i gobak long man ya longwe.

14God i gat olgeta paoa, mo prea blong mi we hem bambae i mekem man ya i kaen long yufala, nao bambae hem i letem yufala i tekem narafala brata ya blong yufala, wetem Benjamin,* tufala i aot long ples blong hem, tufala i kambak. Mi mi no save talem wan samting. Sipos mi mas lusum tufala pikinini ya blong mi, be bambae i mas olsem.”

15Nao ol brata ya oli tekem ol samting ya, wetem mane blong las trip, mo sam narafala mane bakegen, nao oli aot, mo Benjamin i go wetem olgeta. Nao taem oli gotru long Ijip, oli go luk Josef bakegen.

16Mo taem hem i luk lasbon ya we i stap wetem olgeta, hem i talem long slef ya we i bos blong olgeta samting insaed long haos blong hem se, “Yu tekem ol man ya oli go long haos blong mi. Long medel dei, bambae oli kakae wetem mi. Mo yu go kilim wan buluk, yu mekem i rere blong mifala i kakae.”

17Nao slef ya i mekem olsem we hem i talem, i tekem olgeta oli go long haos blong hem.

18Be taem hem i stap tekem olgeta i go, olgeta oli fraet, nao oli stap taltalem se, “Oli stap tekem yumi i go long haos ya from bisnes blong mane ya we oli putum insaed long ol bag blong yumi bifo. Bambae oli girap, oli holem yumi, oli tekemaot ol dongki blong yumi, nao bambae oli mekem yumi kam slef blong olgeta.”

19Nao taem oli go kasem doa blong haos blong Josef, oli talem long slef blong hem se,

20“Masta, mifala i gat wan samting blong talem long yu. Mifala i kam long ples ya wan taem finis blong pem kakae.

21-22Mo taem mifala i stap gobak, mifala i mekem ples blong slip long naet, nao mifala i openem ol bag blong mifala, mo mifala evriwan i luk we ol mane blong mifala i stap antap long kakae, insaed long ol bag blong mifala. Mifala i no save se hu i putum ol mane ya i gobak long ol bag blong mifala. Olgeta mane evriwan blong mifala i stap, nao mifala i karem i kambak blong givim i gobak long yu. Mo mifala i karem ol narafala mane bakegen blong pem kakae long trip ya.”

23Be slef ya i talem se, “Tingting blong yufala i no trabol. Yufala i no fraet. Mane ya bifo, mi mi tekem finis. God ya blong yufala, we i God blong papa blong yufala, hem i presen long yufala long gudfala samting ya we i stap long ol bag blong yufala.” Nao hem i tekem Simeon* i kam joen wetem olgeta bakegen.

24Nao hem i tekem olgeta oli go insaed long haos, mo i tekem wota i kam blong oli save wasem* leg blong olgeta, mo i givim kakae long ol dongki blong olgeta.

25Nao taem oli harem nius se bambae oli kakae wetem Josef long medel dei, oli go tekemaot ol presen ya we oli karem i kam, oli mekemrere olgeta, blong givim i go long hem taem hem i kamtru long haos.

26Nao long medel dei, taem Josef i kamhom, oli go tekem ol presen ya i kam insaed, nao oli bodaon long fes blong hem, we fes blong olgeta i godaon i kasem graon, mo oli givim ol presen ya long hem.

27Nao hem i askem long olgeta se, “?Yufala i oraet? Mo bifo, yufala i stap tokbaot olfala papa blong yufala. ?Olsem wanem long hem? ?Hem i oraet?”

28Mo olgeta oli talem se, “Masta, olfala blong mifala, hem i ona long yu. Hem i stap. Hem i strong yet.” Nao oli bodaon bakegen, oli ona long hem.

29Nao taem hem i luk lasbon ya, we i stret brata blong hem, we tufala i wan mama, hem i talem se, “?O, ating hemia i lasbon brata blong yufala, we yufala i stap tokbaot long mi lastaem?” Mo hem i talem long lasbon ya se, “Pikinini blong mi, prea blong mi we God bambae i givim gudfala laef long yu.”

30Nao wantaem nomo, Josef i girap, i go afsaed, from we taem hem i luk brata blong hem, hem i glad we i glad, we i wantem krae from. Nao hem i go long rum blong hem, i krae.

31Biaen, hem i wasem fes blong hem, i mekem tingting blong hem i kam kwaet, nao i kam insaed bakegen, i singaot ol stued blong oli tekem kakae i kam.

32Hem i sidaon long wan tebol, mo ol brata blong hem oli sidaon long narafala tebol. Mo ol haeman blong ples ya we oli stap kakae wetem hem oli sidaon long narafala tebol bakegen, from we i tabu long olgeta blong oli kakae wanples wetem ol Hibru.*

33Nao man ya blong wok i mekem olgeta brata ya oli sidaon long tebol we oli stap lukluk i kam long Josef, we fasbon i stap long wan en blong tebol, mo oli stap long laen olsem we oli bon, gogo lasbon i stap long nara en blong hem. Mo taem oli luk fasin ya we man ya i mekem olgeta oli laenap olsem blong oli sidaon, oli sapraes tumas, oli stap lukluk olgeta.

34Nao ol stued oli stap tekemaot kakae long tebol blong Josef, oli kam givim long olgeta. Mo ol kakae we oli stap karem i kam blong givim long lasbon ya, hem i naf blong faef man. Nao long fasin ya, oli kakae wetem Josef, mo oli dring gogo oli harem gud.