1 Lev 9.23-24 Nao taem King Solomon i prea finis, wantaem nomo faea i aot long heven, i kamdaon, i bonem ol sakrefaes ya we oli mekem, mo laet ya we i soemaot we Hae God i stap i kam fulap insaed long haos* blong hem, mo i saen we i saen strong tumas.
2Nao from we laet ya i stap saen strong tumas insaed long haos ya, ol pris oli no moa save go insaed long hem.
31 Kron 16.34; 2 Kron 5.13; Esra 3.11; Sam 100.5; 106.1; 107.1; 118.1; 136.1; Jer 33.11Mo taem ol man oli luk we faea i aot long heven i kamdaon, mo we laet ya i stap saenaot long evri ples long haos ya, oli nildaon, oli bodaon we fes blong olgeta i godaon kasem graon, nao oli wosipim Hae God mo oli talem tangkiu long hem. Mo oli talem se,
“Yumi evriwan i presem Hae God,
from we hem i gud tumas.
Oltaem bambae hem i lavem yumi,
gogo i no save finis.”
4Nao king wetem olgeta laen* blong Isrel* oli mekem sakrefaes blong mekem wosip long Hae God.
5-6Oli kilim twanti tu taosen buluk mo wan handred twanti taosen sipsip blong mekem sakrefaes ya we oli bonem haf oli kakae haf, blong oli stap fren gud wetem hem. Nao long wansaed, i gat ol pris oli stap stanap long ples blong olgeta we King Deved i bin makemaot blong olgeta bifo, oli stap blu trampet, mo long narasaed i gat ol Livaet* oli stap stanap, oli stap lukluk i kam long ol pris, oli stap plei long ol instramen we King Deved i bin putumrere blong olgeta bifo, mo oli stap singsing long singsing ya we i talem se,
“!Oltaem bambae Hae God i lavem yumi,
gogo i no save finis!”
Olsem we king ya i bin talem bifo. Mo ol narafala man oli stap stanap, oli stap lukluk. Nao long fasin ya, King Solomon wetem ol man blong hem oli mekem haos ya i tabu, i blong Hae God.
7Nao king i prea blong mekem haf blong bigfala yad ya we i stap stret long fes blong haos ya i tabu, i blong Hae God, from we olta ya we oli wokem long bras, hem i smol tumas, i no naf blong bonem ol sakrefaes ya long hem. Nao long yad ya, oli bonem ol sakrefaes we i blong bonem i bon evriwan, wetem ol kakae blong garen we oli bonem wetem ol sakrefaes ya, mo olgeta gris blong ol sakrefaes ya we oli bonem haf blong anamol mo oli kakae haf blong soemaot we oli stap fren gud wetem Hae God.
8Nao long taem ya, king wetem olgeta laen blong Isrel oli mekem Lafet* ya blong Wokem ol Wansaed* Haos, mo oli stap mekem lafet ya gogo kasem seven dei. Long taem ya, i gat plante man tumas oli kam we oli aot long olgeta ples, i stat long ples ya we rod i gotru long ol hil long Hamat, saed i go long not, i go kasem mak blong graon blong ol man Ijip, saed i go long saot.
9Oli stap mekem prea seven dei blong givim olta ya i go long Hae God, mo oli stap seven dei bakegen blong mekem lafet ya. Mo long namba eit dei blong hem, oli mekem wan bigfala lafet bakegen blong klosem.
10Hemia long manis Etanim,* long namba twanti tu blong hem, mo long nekis dei, king i sanem ol man ya oli gohom. Olgeta evriwan oli luksave we Hae God i mekem i gud tumas long King Deved, mo long King Solomon, mo long olgeta tu, nao oli gohom we oli glad we oli glad tumas, from ol samting ya we Hae God i mekem.
Hae God i kamtru bakegen long King Solomon(1 King 9.1-9)11Biaen long taem we King Solomon i finisim ol wok long haos* blong Hae God mo long haos blong hem, we i finisimgud ol samting we hem i tingbaot blong mekem long tufala,
12Hae God i kamtru long hem long naet, mo i talem long hem se, “Mi mi harem prea blong yu, mo mi mi jusumaot haos ya finis, se hem i ples we oltaem bambae yufala i mas kam long hem, blong mekem ol sakrefaes blong mekem wosip long mi.
13Yufala i man blong mi, mo sipos mi blokem ren i no kam long kantri ya, no mi sanem ol lokis* i kam we oli plante we plante blong spolem ol garen blong yufala, no mi letem wan rabis sik i kam spolem yufala, be hemia i from ol rabis fasin we yufala i stap mekem.
14Nao sipos yufala i tanem tingting blong yufala, mo yufala i lego ol fasin ya, yufala i prea long mi, nating we mi mi stap long heven, be bambae mi harem yufala. Bambae mi fogivim yufala, mi tekemaot ol sin blong yufala, mo bambae mi mekem we kantri ya blong yufala i gat plante kakae bakegen.
15Bambae mi stap lukaot gud long haos ya, mo olgeta prea we bambae yufala i mekem long ples ya, bambae mi rere blong harem olgeta,
16from we mi mi jusumaot haos ya finis, mi mekem i tabu, i ples we nem blong mi bambae i stap long hem oltaem nomo. Oltaem bambae mi stap lukaot gud long hem, mi stap blokemgud hem blong trabol i no kasem hem, gogo i no save finis.
17Sipos yu stap wok blong mi long fasin we i stret gud, olsem we papa blong yu King Deved i bin mekem bifo, mo yu stap obei long ol loa blong mi, mo yu stap mekem olgeta samting we mi talem long yu,
181 King 2.4mi bambae mi holem promes* ya we mi mekem wetem papa blong yu, we mi talem long hem, se oltaem king blong Isrel* bambae i wan long olgeta we bambae oli stap kamaot biaen long hem.
19“Be sipos yu wetem ol man ya blong yu, yufala i no obei long ol loa blong mi mo ol tok ya we mi mi givim long yufala, mo yufala i go mekem wosip long ol narafala god,
20bambae mi mi ronemaot yufala i gowe long kantri ya we mi givim long yufala, mo bambae mi gowe long haos ya tu we mi mekem i tabu, i ples blong mekem wosip long mi. Nao ol man blong ol narafala kantri bambae oli stap laf nogud long hem, oli stap jikim hem, mo bambae oli stap lukluk rabis long hem.
21Haos ya, naoia ol man oli stap ona gud long hem, be sipos mi mi gowe long hem, ol man we oli stap pas long ples ya bambae oli sek gud, oli sapraes tumas long hem. Mo bambae oli stap asaskem se, ‘?Hae God i mekem olsem long kantri ya mo long haos ya blong hem from wanem?’
22Mo bambae ol man oli talem se, ‘No, hem i God blong ol man ya, hem i bin tekem ol bubu blong olgeta bifo oli aot long Ijip oli kam long ples ya. Be naoia olgeta ya oli girap, oli gowe long hem, oli biaen long ol narafala god, mo oli stap mekem wosip long olgeta. Mo from samting ya, hem i letem trabol ya i kam long olgeta.’ ”
Who We AreWhat We EelieveWhat We Do
2025 by iamachristian.org,Inc All rights reserved.
