Jajes 15 - Bislama Bible Revised 2012

1Nao biaen, longtaem lelebet, Samson i tekem wan yang nani, i go blong givim long woman ya blong hem. Long taem ya, i stret taem blong tekemaot kakae long garen.* Nao hem i go, i askem long palika blong hem se, “Mi mi wantem go luk woman blong mi.”

Be palika blong hem i no save letem blong hem i kam insaed.

2Hem i talem long hem se, “!Tru! Mi mi ting se yufala i no moa laekem hem nating, taswe mi letem wan fren blong yufala i tekem hem. Be i gat sista blong hem i stap we i naes moa. Yufala i save tekem hem, yufala i mared long hem.”

3Nao Samson i talem se, “!Olgeta! Naoia bambae mi mekem wan samting long yufala, mo i nogud bambae yufala i talem se i fol blong mi.”

4Nao hem i go holem tri handred wael dog, i fasemtaet olgeta tutu long tel blong olgeta, mo i fasem ol drae lif long ples ya we i taetem.

5Nao i laetem ol lif ya, mo i lego ol dog ya oli resis i go olbaot long ol garen wit* blong ol man Filistia. Nao faea ya i bonem olgeta wit blong olgeta, olgeta we oli tekemaot finis, wetem olgeta we oli no tekemaot yet. Mo i bonem tu ol plantesen blong grep mo ol plantesen blong olif* blong olgeta.

6Nao taem ol man Filistia oli stap asaskem long olgeta se, “?Hu ya i mekem ol samting ya?” oli faenemaot se Samson i mekem, from we palika blong hem i tekemaot woman blong hem i givim i go long fren ya blong hem. Nao olgeta oli go bonem woman ya wetem papa blong hem tufala i ded.

7Nao Samson i talem long olgeta se, “Oraet, naoia yufala i mekem olsem bakegen, be mi mi promes se bambae mi no save spel, gogo mi mekem wan samting blong givimbak samting ya we yufala i mekem.”

8Nao hem i girap, i go mekem faet long olgeta we i meksave olgeta, mo i kilim plante long olgeta oli ded. Mo biaen, hem i go long Etam, i go haed long wan hol blong ston long wan klif long ples ya.

Samson i kilim ol man Filistia bakegen

9Nao ol man Filistia oli kam blong mekem faet long taon ya Lehi, long distrik ya Juda,* mo oli putumap ol haos tapolen blong olgeta long ples ya.

10Nao ol laen* blong Juda long ples ya oli askem long olgeta se, “?Yufala i kam blong mekem faet long mifala from wanem?”

Mo olgeta oli talem se, “Mifala i kam blong tekem Samson i go long kalabus. Bambae mifala i mas givim panis long hem long sem fasin we hem i givim long mifala.”

11Nao tri taosen man Juda oli go long Etam, long ples ya we Samson i stap haed long hem long hol ya blong ston, nao oli talem long hem se, “?Wanem samting ya we yu yu mekem long yumi? ?Yu no save we yumi stap long han blong ol man Filistia ya?”

Be hem i talem se, “No, be ol samting ya we mi mi stap mekem long olgeta, hemia sem samting nomo we olgeta oli stap mekem long mi.”

12Nao oli talem long hem se, “Mifala i kam blong fasem yu, blong tekem yu yu go long olgeta.”

Be hem i talem long olgeta se, “Oraet, be fastaem yufala i mas mekem wan strong promes long mi, se bambae yufala i no save kilim mi mi ded.”

13Nao oli talem long hem se, “No, mifala i no save kilim yu. Bambae mifala i fasem yu nomo, mifala i tekem yu yu go long olgeta.” Nao oli fasem hem long tu rop we tufala i niuwan nomo. Nao oli tekemaot hem long ples ya we i stap haed long hem, oli tekem hem i go long ol man Filistia.

14Nao taem oli kasem Lehi, ol man Filistia oli resis i kam long hem, we oli stap singsingaot bigwan long hem. Nao wantaem nomo, Spirit blong Hae God i kam long hem, i mekem hem i strong. Nao hem i brekem tufala rop ya we oli fasem han blong hem long hem, olsem rop we i drae nogud finis.

15Nao hem i luk wan bun blong maot blong dongki we i jes ded, i pikimap, mo i kilim wan taosen man long hem oli ded evriwan.

16Nao hem i sing, i talem se,

“Long bun blong maot blong dongki,

mi mi kilim wan taosen man.

Long bun blong maot blong dongki,

mi hivimap olgeta olbaot.”

17Nao biaen, hem i sakem bun ya. Mo ples we hem i mekem ol samting ya long hem, oli putum nem blong hem se Ramatlehi, we i min se “Hil blong Bun blong Maot”.

18Nao Samson i tosta we i tosta, mo i krae i go long Hae God, i talem se, “!Hae God! ?Yu yu mekem we mi mi winim ol man Filistia ya finis, be olsem wanem nao? !Mi mi tosta we mi tosta, we bambae mi ded from! !Yu luk! !Ol man Filistia ya oli no man blong yu, be sipos yu no mekem wan samting, bambae oli kam holem mi ya!”

19Nao long Lehi, i gat wan hol, mo Hae God i mekem we graon long botom blong hol ya i brok, mo wan springwota i kamaot long hem. Nao Samson i dring wota ya, mo i harem gud bakegen. Nao oli putum nem blong springwota ya se Enakore, we i min se “Springwota blong man we i krae”. Mo springwota ya i stap yet long Lehi, kam kasem tede.

20Samson ya, hem i lidim ol laen blong Isrel* twanti yia, long taem ya we olgeta oli stap long han blong ol man Filistia.