1Nao ol man Filistia oli kam mekem faet long ol laen* blong Isrel* long hil ya Gilboa, nao oli kilim plante long olgeta oli ded, mo ol narafala oli ronronwe.
2Be ol man Filistia oli ronem King Sol wetem ol pikinini blong hem gogo oli kasem olgeta, nao oli kilim tri pikinini blong hem oli ded. Nem blong trifala ya, i gat Jonatan, mo Abinadab mo Malkisua.
3Nao faet i kam strong tumas long ples ya we king i stap long hem. Ol ara blong ol enemi oli stap kasem hem, mo hem i karekil.
4Nao hem i talem long yang man ya we i stap karem ol samting blong faet blong hem se, “Yu pulumaot naef blong faet blong yu, yu stikim mi mi ded. Ol man ya oli hiten man. I nogud bambae oli stap tok flas blong jikim mi from we oli winim mi.” Be yangfala ya i fraet tumas, i no save mekem samting ya. Nao king i pulumaot naef blong faet blong hem, i holem, i foldaon antap long hem, i stikim hem i ded.
5Mo taem yangfala ya i luk we king i ded, hem tu i pulumaot naef blong hem, i foldaon antap long hem, i ded wetem hem.
6Long fasin ya, King Sol wetem trifala pikinini ya blong hem oli ded long sem dei nomo, mo hemia nao en blong rul blong hem.
7Mo taem ol laen blong Isrel we oli stap long bigfala levelples ya Jisrehel, long medel blong ol hil oli harem we ol soldia blong olgeta oli ronronwe, mo we king wetem trifala pikinini ya blong hem oli ded, olgeta oli no moa tingbaot ol taon blong olgeta, oli girap, oli ronronwe. Nao ol man Filistia oli kam stap long ol taon ya.
8Nao long nekis dei, ol man Filistia oli kam blong tektekemaot olting blong ol man ya we oli ded long faet, mo oli faenem bodi blong king, wetem bodi blong trifala pikinini ya blong hem oli stap long hil ya.
9Nao oli katemaot hed blong king mo oli tekemaot ol klos blong faet blong hem, oli givim long sam man blong oli karem, oli goraon long olgeta ples long Filistia, oli talemaot nius ya long ol god blong olgeta mo long ol man ples blong olgeta.
10Nao oli putum ol samting ya blong faet blong hem insaed long wan haos blong prea blong olgeta, mo oli hangem hed blong hem insaed long haos blong prea blong god ya Dagon.
11Be taem ol laen blong Isrel blong taon ya Jabes long Gilead, oli harem we ol man Filistia oli wokem fasin ya long king blong olgeta,
12ol strong man blong olgeta we oli no save fraet nating oli go tekemaot bodi blong hem, wetem bodi blong trifala pikinini ya blong hem, oli karem olgeta i kam long Jabes, oli go berem ol bun blong olgeta aninit long wan oktri* long ples ya. Nao oli livim kakae, oli no kakae gogo kasem seven dei.
13-14 1 Saml 13.8-14; 15.1-24; Lev 19.31; 20.6; 1 Saml 28.7,8 King Sol i ded from we hem i no putum tingting blong hem i stap strong long Hae God, mo i no obei long ol tok blong hem. Hem i no luk long Hae God blong faenemaot rod long hem, be hem i girap, i go luk wan kleva blong faenemaot rod long ol devel blong ol dedman. Nao Hae God i kilim hem i ded, mo i putumap Deved, we papa blong hem Jese, blong i tekem ples blong hem i kam king.
Who We AreWhat We EelieveWhat We Do
2025 by iamachristian.org,Inc All rights reserved.
