Job 25 - Bislama Bible Revised 2012

Bildad i tok

1Nao Bildad i talem se,

2“Job.

God i gat paoa.

Olgeta man oli mas fraet long hem,

mo oli mas ona long hem.

Hem i king.

Hem i stap rul long heven,

mo oltaem, ples ya i gat pis.

3I no gat man i save kaontem ol enjel

we oli stap wok blong hem.

Mo laet blong hem i saenaot,

i go kasem evri ples.

4I no gat man i save kam stret olgeta

long fes blong hem,

mo i no gat man i save kam klin gud

long fes blong hem.

5Yumi luk mun se i saen we i saen,

be long fes blong God,

hem i no saen gud,

mo yumi luk ol sta se oli klin we i klin,

be long fes blong hem,

oli no klin gud.

6?Be olsem wanem long man,

we i olsem maget no flae nomo?

Long fes blong God,

hem i no klin nating.”