1 Kronikel 5 - Bislama Bible Revised 2012

Ol laen blong Ruben

1-3 Jen 35.22; 49.3,4 Jen 49.8-10 Ruben,* hem i fasbon pikinini blong Isrel* ya bifo, mo stori blong ol laen* blong hem i olsem. Hem i gat fo pikinini boe blong hem, we nem blong olgeta, Hanok, mo Palu, mo Hesron, mo Kami. Ruben, hem i fasbon, be i bin slip wetem woman slef* ya we i wan narafala woman blong papa blong hem, nao from samting ya, papa blong hem i tekemaot raet blong fasbon long hem, i givim i go long Josef. Be biaen, laen blong Juda,* hem i kam strong moa long ol narafala laen ya blong Isrel, mo man we i kam king, we i rul long ol laen ya, hem i kamaot long laen ya blong Juda.

4-6 2 King 15.29 Olgeta we oli kamaot biaen long Joel, nem blong olgeta i olsem. Joel i bonem Semaea, mo Semaea i bonem Gog, mo Gog i bonem Simei, mo Simei i bonem Maeka, mo Maeka i bonem Rehaea, mo Rehaea i bonem Bal, mo Bal i bonem Behera. Behera ya, hem i wan lida blong laen ya, be King Tiglatpilesa blong Asiria i kam mekem faet long hem, i holem hem, nao i karem hem i go long Asiria.

7I gat tri lida blong laen blong Ruben we ol man oli bin raetemdaon nem blong trifala long ol lis blong ol famle blong laen ya. Nem blong trifala ya, Jehiel, mo Sekaraea,

8mo Bela, we papa blong hem Asas, mo bubu blong hem Sema, we Sema i kamaot biaen long Joel. Olgeta we oli kamaot biaen long Joel, oli stap long Aroere, mo graon blong olgeta i stat long ples ya i go kasem Neboho mo Balmeon, saed i go long not.

9Oli gat plante buluk blong olgeta long distrik ya Gilead tu, nao oli tekem ples ya i go kasem bigfala draeples ya saed i go long is. Draeples ya i bigwan tumas, i go kasem Yufretes Reva longwe.

10Mo long taem blong King Sol, olgeta long laen ya oli go mekem faet long ol laen blong Hega long distrik ya Gilead saed i go long is, nao oli kilim olgeta oli ded, mo oli tekem graon ya blong olgeta.

Ol laen blong Gad

11Ol laen* blong Gad,* oli stap long ples ya Basan, long bigfala graon ya we i go finis long graon blong ol laen blong Ruben* saed i go long saot, mo i go kasem taon ya Salkaha saed i go long is.

12Joel, hem i stamba blong wan haf blong laen ya we i strong moa winim ol narafala haf, mo Safam, hem i stamba blong wan narafala haf blong laen ya we hem tu i strong. Janae mo Safat, tufala i stamba blong tu narafala haf blong laen ya we oli stap long Basan,

13mo ol narafala man long laen ya oli seraot long seven haf bakegen, we nem blong ol stamba blong ol haf ya, i gat Mikael, mo Mesulam, mo Seba, mo Jorae, mo Jakan, mo Sia, mo Eba.

14Olgeta ya oli kamaot biaen long Abihael, we i stap makem ol olfala bubu blong hem olsem. Abihael, papa blong hem Huri, mo Huri, papa blong hem Jaroa, mo Jaroa, papa blong hem Gilead, mo Gilead, papa blong hem Mikael, mo Mikael, papa blong hem Jesisae, mo Jesisae, papa blong hem Jado, mo Jado, papa blong hem Bus.

15Biaen, man ya Ahi, hem i kam lida blong olgeta. Ahi ya, papa blong hem Abdiel, mo bubu blong hem Guni.

16Olgeta ya oli stap long ol taon long tufala distrik ya Basan mo Gilead, mo olbaot long ol graon ya long Saron we i gat plante kakae blong sipsip i stap long hem.

17Ol nem blong ol laen ya, ol man oli raetemdaon long taem blong King Jeroboam blong Isrel,* mo long taem blong King Jotam blong Juda*.

Ol soldia blong ol laen blong Isrel long narasaed Jodan Reva long is

18Long laen* blong Ruben,* mo long laen blong Gad,* mo long haf blong laen ya blong Manase* we i stap narasaed Jodan Reva long is, i gat foti fo taosen seven handred sikisti soldia i stap we oli tren gud blong yusum naef blong faet, mo bonara, mo sil* blong blokem ara.

19Wan taem, olgeta ya oli go mekem faet long olgeta we oli kamaot biaen long Hega, we oli laen blong Jeturu, mo ol laen blong Nafis, mo ol laen blong Nodab.

20Ol soldia ya oli trastem God, mo oli prea long hem blong hem i givhan long olgeta. Nao hem i harem prea blong olgeta, mo i givhan long olgeta, nao olgeta oli winim ol laen ya blong Hega wetem ol fren blong olgeta.

21Oli holem fifti taosen kamel wetem tu handred fifti taosen sipsip mo tu taosen dongki blong ol enemi ya blong olgeta, oli karem i kam, mo oli holem wan handred taosen man tu oli kam wok slef* blong olgeta.

22Mo oli kilim plante enemi blong olgeta, from we God i wantem blong oli mekem olsem. Nao oli stap long graon ya, kam kasem taem we ol man Asiria oli kam tekemaot olgeta oli go wok slef long kantri blong olgeta.

Haf blong ol laen blong Manase long narasaed Jodan Reva long is

23Olgeta long haf blong ol laen* ya blong Manase,* we oli stap long narasaed Jodan Reva long is oli mekem ples blong olgeta long distrik ya Basan, i go kasem tufala taon ya Balemon mo Seniri, wetem bigfala hil ya Hemon, saed i go long not, mo oltaem, olgeta oli stap kam plante moa.

24Nem blong olgeta we oli lida blong ol haf blong laen ya i gat Efa, mo Jese, mo Eliel, mo Asriel, mo Jeremaea, mo Hodavia, mo Jadiel. Olgeta ya oli nambawan soldia, we oli stap lidim olgeta long taem blong faet, mo ol man oli savegud olgeta.

Ol man blong trifala laen ya oli go wok slef long Asiria

25Nao ol man blong trifala laen* ya oli no moa holem promes we ol bubu blong olgeta bifo oli bin mekem wetem God blong yumi, oli lego hem, oli stap mekem wosip long ol narafala god blong ol man ya we God i bin ronemaot olgeta oli gowe long graon ya. Fasin ya i olsem woman we i ronwe long man blong hem, i go stap mekem i krangke wetem narafala man.

262 King 15.19; 2 King 15.29; 2 King 17.6Nao God i mekem we King Pul blong Asiria i kam mekem faet long olgeta. King ya, narafala nem blong hem King Tiglatpilesa, mo hem i karemaot olgeta ya, i go putum olgeta oli stap long Asiria long trifala taon ya Halaha mo Haboro mo Hara, mo long saed blong Gosan Reva, nao oli stap wok slef* long ol ples ya kam kasem tede.