1 Kronikel 12 - Bislama Bible Revised 2012

Ol laen blong Benjamin we oli joen long Deved fastaem, taem we hem i no kam king yet

1Nao long taem ya we Deved i ronwe long King Sol, i go stap long Jiklag, i gat plante man we oli nambawan soldia, we oli savegud fasin blong faet, oli go joen wetem hem.

2Olgeta ya oli laen* blong Benjamin,* we King Sol tu i laen blong hem. Olgeta ya oli save sut gud long bonara, mo oli save sakem ston long sling long lefhan mo raethan blong olgeta.

3Ahiesa wetem brata blong hem Joas, we tufala i man Gibea, we papa blong tufala Semaha, tufala i lida blong olgeta. Mo nem blong ol narawan i gat Jesiel mo Pelet, we papa blong tufala Asmavet, mo Beraka mo Jehu, we tufala i man Anatot,

4mo Jismaea, we i man Gibeon, we hem i wan soldia we ol man oli savegud hem, mo hem i wan lida blong ol toti man ya blong king. Mo i gat Jeremaea, mo Jahasiel, mo Johanan, mo Josabad, we oli man Gederaha.

5Mo i gat Elusae mo Jerimot, mo Bealia, mo Semaria, mo Sefatia, we oli man Harif.

6Mo i gat Elkana, mo Jisia, mo Asarel, mo Joesa, mo Jasobeam, we oli laen blong Kora.

7Mo i gat Joelaha, mo Sebadia, we tufala i man Gedoro, we papa blong tufala Jeroham.

Ol laen blong Gad we oli joen long Deved fastaem taem we hem i no kam king yet

8Mo i gat ol laen* blong Gad,* oli kam joen long ol soldia blong Deved, long taem ya we oli stap long strong ples blong haed blong olgeta long draeples. Olgeta ya oli strong man blong faet we ol man oli savegud nem blong olgeta, mo oli savegud fasin blong yusum sil* mo spia. Fes blong olgeta i strong olsem fes blong laeon, mo oli save muv kwik olsem ol wael dia* long ples blong hil.

9Mo nem blong ol lida blong olgeta, i stat long man we i hae moa i godaon i olsem. I gat Eja, we i namba wan long olgeta, mo, i gat Obadaea, mo Eliab,

10mo Mismanaha, mo Jeremaea,

11mo Atae, mo Eliel,

12mo Johanan, mo Elsabad,

13mo Jeremaea, mo Makbanae.

14Sam long olgeta ya oli kapten blong wan taosen man, mo sam oli kapten blong wan handred man.

15Mo wan taem, long fas manis blong yia, long taem we Jodan Reva i stap ron bigwan, i kavremap olgeta ples long ples ya, ol man ya oli kamkros long reva ya, oli mekem faet long ol man we oli stap long ol levelples klosap long reva saed i kam long wes, mo saed i go long is, nao oli ronemaot olgeta oli go olbaot.

Sam laen blong Benjamin mo sam laen blong Juda we oli wantem joen long Deved

16Nao wan taem, wan kampani blong ol laen* blong Benjamin,* wetem wan kampani blong ol laen blong Juda* oli kam blong luk Deved long sefples ya we hem i stap long hem.

17Nao hem i goaot, i mitim olgeta, mo i talem se, “!Olgeta! Sipos yufala i fren blong mi we yufala i kam blong givhan long mi, mi mi glad blong tekem yufala i joen wetem mifala. Be yufala i mas save. Mi mi no bin mekem wan samting nating blong spolem yufala, mo sipos yufala i kam blong putum mi long han blong ol enemi blong mi, God blong ol bubu blong yumi bambae i save samting ya, mo hem bambae i panisim yufala from.”

18Nao Spirit blong God i kam long Amasae, i holem hem. Man ya i wan long olgeta we biaen i kam komanda blong ol toti man ya blong king, mo hem i singaot bigwan se, “!Deved, pikinini blong Jese! !Mifala i man blong yu! !God i stap wetem yu! !Prea blong mifala, we yu wetem oli man blong yu bambae yufala i win!” Nao Deved i tekem olgeta, i putumap olgeta oli kapten blong ol soldia blong hem.

Ol laen blong Manase we oli joen long Deved fastaem long taem we hem i no king yet

19Long taem ya we Deved i joen wetem ol king blong ol man Filistia blong go mekem faet long King Sol, i gat sam laen* blong Manase* we oli go joen wetem hem. Be ol king ya oli fraet se bambae hem i giaman long olgeta, i putum olgeta long han blong king blong hem, nao oli sanem hem i gobak long Jiklag, mo from samting ya, hem i no mekem wan samting blong givhan long olgeta.

20Ol laen blong Manase ya, nem blong olgeta i olsem.

I gat Adnaha, mo Josabad, mo Jediael, mo Mikael, mo Josabad, mo Elihu, mo Jiletae.

Fastaem, olgeta ya oli lida blong ol soldia long laen blong olgeta, mo olgeta wanwan oli kapten blong wan taosen man,

21be oli kam joen long Deved, mo oli kam kapten blong ol soldia blong hem from we olgeta evriwan oli nambawan soldia. Mo biaen, oli kam kapten blong ol soldia blong Isrel*.

22Mo klosap evri dei nomo, ol man oli stap kam joen long Deved, mo oli stap mekem we ol soldia blong hem oli kam plante we plante moa.

Lis blong ol soldia blong Deved

23Nao long taem ya we Deved i stap long taon ya Hebron, plante soldia we oli savegud fasin blong faet oli stap go blong joen long ol soldia blong hem, blong halpem hem blong i kam king, i tekem ples blong King Sol, olsem we Hae God i bin promes long hem. Namba blong olgeta ya i olsem.

24Long laen* blong Juda,* i gat sikis taosen eit handred man, we oli stap karem sil* mo spia.

25Mo long laen blong Simeon,* i gat seven taosen wan handred man we oli tren gud blong faet.

26Mo long laen blong Livae,* i gat fo taosen sikis handred man.

27Mo wetem olgeta ya, i gat pris ya Jehoeada, we i lida blong tri taosen seven handred man

28mo pris ya Jadok, we i wan strong man blong faet, wetem twanti tu famle blong hem.

29Mo long laen blong Benjamin,* i gat tri taosen man. Be King Sol tu i wan long olgeta long laen ya, mo bighaf blong olgeta oli stap strong long saed blong hem, mo oli stap ona gud long hem.

30Mo long laen blong Efrem,* i gat twanti taosen eit handred man we oli go joen long Deved, we long laen blong olgeta, ol man oli savegud olgeta.

31Mo long olgeta long laen blong Manase* long saed blong Jodan Reva long wes, i gat eitin taosen man we ol laen ya oli jusumaot olgeta blong oli go givhan long Deved blong i kam king.

32Mo long laen blong Isakara,* i gat tu handred lida wetem ol man blong olgeta. Ol lida ya oli savegud ol samting ya we ol laen blong Isrel* oli mas mekem mo oli savegud tu raet taem blong mekem ol samting ya.

33Mo long laen blong Sebulun,* i gat fifti taosen man oli go joen long Deved, we ol man oli trastemgud olgeta mo we oli stap rere oltaem blong faet, mo oli lanemgud fasin blong yusum ol samting blong faet.

34Mo long laen blong Naftali,* i gat wan taosen lida wetem toti seven taosen man we oli stap karem sil mo spia.

35Mo long laen blong Dan,* i gat twanti eit taosen sikis handred man we oli tren gud blong faet.

36Mo long laen blong Asere,* i gat foti taosen man we oli stap rere oltaem blong faet.

37Mo long narasaed Jodan Reva long is, i gat ol laen blong Ruben,* mo ol laen blong Gad,* mo ol laen blong Manase, mo long trifala laen ya, i gat wan handred twanti taosen man we oli lanemgud fasin blong yusum ol samting blong faet.

38Olgeta soldia ya oli stap rere oltaem blong faet, mo oli go hivap long Hebron we tingting blong olgeta i strong se Deved i mas kam king blong olgeta laen blong Isrel. Mo ol narafala laen blong Isrel tu oli karem sem tingting ya nomo.

39Ol soldia ya oli stap tri dei wetem Deved long ples ya, mo oli stap mekem lafet long ol kakae mo dring we ol famle blong olgeta oli mekemrere blong olgeta.

40Mo ol man blong ol ples raonabaot go kasem ol ples long trifala distrik ya Isakara mo Sebulun mo Naftali olwe long not, olgeta evriwan oli karem kakae i kam. Olgeta ya oli hivimap ol kakae ya long ol dongki mo ol kamel mo ol hafkas* dongki mo ol buluk blong olgeta, nao oli karem i kam. Oli karem flaoa, mo frut blong figtri,* mo frut blong grep we i sandrae, mo olifoel,* mo oli karem ol buluk wetem ol sipsip tu blong oli kilim blong kakae. Oli mekem olgeta samting ya blong soemaot we olgeta evriwan long kantri ya oli glad we oli glad tumas.