Ol Proveb 3 - Bislama Bible Revised 2012

Tok blong givhan long ol yang man

1Pikinini blong mi. Yu no mas fogetem ol samting ya we mi mi stap tijim yu long hem. Oltaem yu mas tingbaot ol tok blong mi.

2Sipos yu mekem olsem, bambae yu no save sot long wan samting long laef blong yu, mo bambae yu gat longfala laef.

3Bambae yu no mas lego promes we yu mekem wetem God, we tingting blong yu i stap strong long hem, mo yu no mas lego promes we yu mekem wetem ol fren blong yu, we tingting blong yu i stap strong long olgeta. Oltaem, yu mas holemtaet tufala fasin ya, olsem we yu raetemdaon long tingting blong yu, no yu hangem long nek blong yu, blong tufala i no lus.

4Luk 2.52Sipos yu stap mekem olsem, bambae God i glad long yu, mo ol man tu bambae oli glad long yu.

5I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.

6Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.

7Rom 12.16I nogud yu ting se yu yu wan waes man. Yu mas tinghevi long Hae God, yu mas ona gud long hem, mo yu mas tanem baksaed long ol fasin nogud.

8Sipos yu mekem olsem, fasin ya bambae i olsem gudfala meresin we i save mekem ol soa blong yu i finis, mo i save mekem ol sobodi blong yu i no moa soa.

9Yu mas tekem ol fas kakae blong garen blong yu, wetem ol nambawan samting long ol narafala kakae we yu kasem long hem, yu givim i go long Hae God, blong yu ona long hem.

10Sipos yu mekem olsem, haos blong putumgud kakae blong yu long hem, oltaem bambae i fulap long kakae, mo bambae yu kasem fulap waen, we ol botel blong yu oli no naf blong holem.

11 Job 5.17 Hib 12.5,6 Pikinini blong mi. Sipos Hae God i mekem wan samting blong stretem yu, be yu mas glad blong karem, mo yu mas save we hem i mekem samting ya blong wekemap yu.

12Rev 3.19Ol man we hem i lavem olgeta, oltaem hem i stap stretem olgeta, olsem we papa i stap stretem pikinini blong hem, we i glad tumas long hem.

13Man we i stap kasem save, mo we i stap kam waes, hem bambae i save harem gud,

14from we fasin ya i gud moa, i winim we hem i kasem silva, no gol.

15Waestok i gud moa, i winim ol gudfala ston ya we praes blong olgeta i antap tumas, we ol man oli stap yusum blong flasem ring mo jen long hem, mo i no gat wan samting nating we yu save wantem samtaem, we i gud moa winim hem.

16Hem i save givim longfala laef long yu, mo i save givim plante gudgudfala samting tu long yu, mo i save mekem ol man oli ona long yu.

17Hem i save mekem laef blong yu i ron gud, nao bambae yu stap gud oltaem long laef blong yu.

18Ol man we oli holem waestok oli glad oltaem nomo, mo hem bambae i mekem olgeta oli gat laef.

19Hae God i mekem wol ya

long waes blong hem,

mo long save blong hem,

hem i putum skae long prapa ples blong hem.

20Long waes ya blong hem,

hem i mekem we ol reva i ron,

mo i mekem we ol klaod i givim ren

i kam long wol ya.

21Pikinini blong mi. I gud yu holemstrong waes ya blong yu, mo fasin ya blong yu we yu save luksave mining blong ol samting we i had. Yu mas lukaot gud blong yu no lusum tufala samting ya.

22Bambae tufala fasin ya i givim laef long yu, mo laef ya blong yu bambae i gudwan, we bambae yu glad long hem oltaem.

23Nao bambae yu save wokbaot long rod blong yu, we oltaem bambae yu stap gud nomo, yu no save foldaon.

24Mo long naet, taem yu go long bed blong yu, bambae yu save slip gud, we yu no save fraet.

25Bambae trabol i save kam kwiktaem nomo long ol man nogud, olsem we strong win i save girap wantaem nomo i kam, be yu bambae yu no save trabol long samting ya.

26Hae God bambae i holem yu, blong yu save stap gud oltaem, mo bambae hem i no save letem yu yu foldaon long wan trap.

27Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.

28Sipos wan long olgeta we oli stap raonabaot long yu, i wantem blong yu givhan long hem, mo yu save mekem long taem ya nomo, i nogud yu talem long hem se, “Yu wet, tumora bambae mi kam givhan long yu.”

29Mo i nogud yu mekem plan blong wokem wan samting we i save spolem wan man olsem, from we olgeta ya oli stap trastem yu.

30Sipos man i no mekem wan samting nogud long yu, i nogud yu rao long hem.

31Mo i nogud yu jalus long ol man blong faet we oli stap win, mo i nogud tu blong yu folem fasin blong olgeta,

32from we Hae God i no laekem nating ol man we oli stap mekem ol samting nogud, i agens long olgeta. Hem i trastem ol stret man, mo i stap talemaot tingting blong hem long olgeta.

33Oltaem, hem i stap singaot* trabol i kam long haos blong man nogud, be hem i stap blesem haos blong man we laef blong hem i stret.

34Jem 4.6; 1 Pita 5.5Hem i no save tinghae long ol man we tingting blong olgeta i go antap, be hem i kaen gud long olgeta we tingting blong olgeta i stap daon.

35Ol waes man bambae oli gat gud nem, mo bambae ol man oli stap ona gud long olgeta, be ol man we oli no gat hed, bambae oli stap mekem ol fasin nomo, we bambae oli sem from.