Jeremaea 8 - Bislama Bible Revised 2012

1“Long taem ya, ol bun blong ol king blong yufala, mo blong ol haeman blong yufala, mo blong ol pris, mo blong ol profet, mo blong ol narafala man Jerusalem, bambae ol enemi oli tekemaot olgeta evriwan long beregraon.

2Bambae oli stap olbaot long graon olsem ol doti blong buluk, from we bambae i no moa gat man i stap, blong i save go pikimap olgeta, blong berem olgeta bakegen. Ol bun ya bambae oli stap olbaot nomo long open ples long fes blong san, mo mun, mo ol sta. Ol samting ya nao, ol man ya oli bin laekem olgeta tumas, mo oli bin mekem wok blong olgeta, oli bin stap biaen long olgeta, mo oli bin lukluk long olgeta blong kasem advaes long olgeta, mo oli bin mekem wosip long olgeta.

3Mo ol man nogud blong yufala, we oli stap olbaot long ol ples we mi ronemaot olgeta i go long hem, bambae oli no moa wantem stap laef, oli wantem ded nomo. Mi mi Hae God, mi gat olgeta paoa, mo hemia tok blong mi.”

Ol man oli mas kasem panis from sin blong olgeta

4Nao Hae God i talem long Profet Jeremaea se, “Jeremaea. Yu go talemaot long ol man blong mi, we mi mi talem se, ‘Sipos man i foldaon, be hem i save girap bakegen. Mo sipos man i mestem rod, be hem i save tanemraon blong faenem rod blong hem bakegen.

5?Be from wanem yufala i gowe long mi, nao yufala i no wantem kambak long mi bakegen? Oltaem, yufala i stap holemtaet ol aedol ya blong yufala, nao from samting ya, yufala i no wantem kambak long mi.

6Oltaem, mi mi stap lesin gud long yufala, be yufala i stap giaman nomo, yufala i no save talem trutok nating. I no gat wan long yufala we i save tingting se from wanem hem i stap mekem ol samting nogud. Mo i no gat wan long yufala nating, we i tanem tingting blong hem, from ol samting nogud ya we hem i stap mekem. Oltaem nomo, yufala evriwan i stap gohed blong mekem ol rabis fasin. Yufala i olsem hos, we i spid i go long faet.

7Ol pijin ya stok,* mo sotleg,* mo swif,* mo tras,* nating we oli pijin nomo, be oli savegud stret taem blong oli ronwe long koltaem, blong go long narafala ples. Be yufala, yufala i no save nating ol loa blong mi, we mi mi stap rulum yufala long hem.

8I no stret nating we yufala i stap talem se yufala i waes, yufala i save ol loa blong mi. !Yufala i luk! Ol man we oli stap raetemdaon ol loa ya, oli man blong giaman. Taem oli stap raetemdaon, oli stap jenisim bakegen.

9Ol waesman ya blong yufala oli tanem baksaed long ol tok blong mi finis. Olgeta oli sem bigwan, mo oli lusum rod blong olgeta. Waes ya blong olgeta i nogud, i no save givhan long olgeta nating.

10Nao from we oli tanem baksaed long ol tok blong mi, bambae mi givim ol graon blong olgeta i go long ol enemi we oli kam winim olgeta, mo ol woman blong olgeta, bambae mi letem ol narafala man oli tekemaot olgeta. Bambae mi mekem olsem, from we olgeta evriwan, nating we oli haeman no oli no haeman, be oli stap winim mane long fasin we i no stret. Mo ol profet wetem ol pris tu oli stap ravem ol man.

11Esik 13.10I olsem we yufala i gat ol bigbigfala soa, mo olgeta ya oli stap taltalem long yufala, se evri samting i oraet nomo, be evri samting i no oraet nating.

12Jer 6.12-15“ ‘Ol man blong mi. Yufala i stap mekem ol samting nogud, be yufala i no save sem nating, mo neva fes blong yufala i kam nogud from fasin ya. Nao from samting ya, taem mi panisim yufala, bambae yufala evriwan i ded, olsem olgeta ya we oli ded finis. Mi mi Hae God, mo hemia tok blong mi.’ ”

13Mo profet i talemaot we Hae God i talem se, “Mi mi wantem tumas blong tekem yufala i kam wanples, olsem we man i tekemaot ol kakae long garen blong hem, i putumgud long haos. Be yufala i olsem rop blong grep* we i no gat frut long hem, yufala i olsem figtri* we i no karem kakae, mo ol lif blong hem oli drae finis. Nao from samting ya, mi bambae mi mekem ol man blong narafala kantri oli kam holem ples blong yufala.”

14Nao ol man blong God oli stap taltalem long olgeta se, “?From wanem yumi stap sidaon nating olsem? Yufala i kam, yumi ronwe, yumi go haed long ol taon ya we i gat ol stonwol i goraon long olgeta, blong yumi ded long ol ples ya. Hae God i God blong yumi, mo hem i jajem yumi finis, se yumi mas ded. Hem i givim posen long yumi blong yumi dring, from we yumi mekem i nogud long fes blong hem.

15Yumi stap lukaot pis, be i no gat, mo yumi wantem we ol sik blong yumi oli finis, be bigfala trabol nomo i kam kasem yumi, nao yumi fraet we i fraet.

16Ol enemi blong yumi oli stap finis long taon ya Dan. Yumi stap harem ol noes blong ol hos blong olgeta we oli stap pulum win, mo taem ol hos blong olgeta oli stap singsingaot, graon i seksek long olgeta ples blong yumi. Ol enemi blong yumi oli kam finis long ples blong yumi, blong spolem olgeta graon blong yumi wetem evri samting long hem. Mo oli kam blong spolem bigfala taon ya blong yumi, wetem olgeta man we oli stap long hem.”

17Nao profet i talemaot we Hae God i talem se, “!Yufala i mas lukaot! Bambae mi sanem ol posen snek i kam long yufala, mo i no gat man i save trikim olgeta blong oli stap kwaet oli no kakae man. Bambae oli mas kakae yufala. Mi mi Hae God, mo hemia tok blong mi.”

Profet Jeremaea i sore tumas from ol man blong hem

18Nao Profet Jeremaea i harem nogud tumas, i talem se,

“Mi mi sore we mi sore tumas.

Naoia, i no moa gat wan samting

we i save mekem mi mi harem gud bakegen.

19Long olgeta ples olbaot long kantri ya,

mi mi stap harem ol man blong mi

oli stap singaot se,

‘?Weswe?

?Hae God i no moa stap

long bigfala hil ya Saeon*?

?Hem i King blong ples ya,

be hem i no moa stap?’

“Mo mi harem we Hae God i talem se,

‘?Be from wanem yufala i stap mekem wosip

long ol aedol blong yufala,

mo yufala i stap bodaon long ol narafala god

we oli no save givhan nating

long yufala?

Fasin ya nao i mekem mi mi kros we mi kros.’

20“Nao mi harem we ol man oli talem se,

‘Taem blong tekemaot kakae long garen i pas,

mo draetaem i finis,

be Hae God i no sevem yumi yet.’

21“Nao mi mi talem se,

‘Naoia mi mi harem nogud tumas,

from we ol enemi oli spolemgud ol man blong mi.

Mi mi harem nogud tumas,

mi stap krae.

22I gat plante meresin long Gilead,

mo i gat ol dokta tu long ples ya.

?Be from wanem ol soa blong ol man blong mi

oli no finis?