2 King 13 - Bislama Bible Revised 2012

King Jehoahas blong Isrel

1Nao long taem ya we King Joas, we papa blong hem King Ahasia i stap rul long Juda,* long namba twanti tri yia blong hem, Jehoahas we papa blong hem King Jehu, hem i kam king blong Isrel.* Hem i rul seventin yia long kantri ya, mo hedkwota blong hem i stap long taon ya Sameria.*

2Be king ya tu i stap mekem sin agens long Hae God mo neva hem i lego ol rabis fasin ya blong hem. Hem i stap lidim ol man Isrel blong oli mekem sin long sem fasin ya nomo we King Jeroboam, we papa blong hem Nebat, hem i bin mekem.

3Nao from samting ya, Hae God i kros long olgeta, mo i letem King Hasael blong Siria i stap kam mekem faet long olgeta plante taem, we i stap winim olgeta oltaem nomo.

Mo biaen, taem hem i ded, pikinini blong hem King Benadad i kam king, mo Hae God i letem hem tu i mekem sem fasin.

4Nao King Jehoahas i prea long Hae God blong i givhan long olgeta, mo from we Hae God i luksave fasin blong king ya blong Siria we i stap mekem i strong tumas long olgeta, hem i harem prea blong hem.

5Hem i putumap wan lida blong olgeta, mo lida ya i tekemaot olgeta long paoa blong ol man Siria, i mekem olgeta oli fri, we oli gat pis bakegen olsem bifo.

6Be olgeta oli no tanem tingting blong olgeta, oli no lego ol sin ya we King Jeroboam i lidim ol bubu blong olgeta bifo blong oli mekem, oli stap gohed blong mekem ol sin ya, mo oli letem pija blong woman god ya Asera* i stap yet long Sameria.

7Nao long taem ya, King Jehoahas i no moa gat plante man blong faet, from we king blong Siria ya i bin kilim olgeta oli ded, we i spolemgud olgeta. Hem i gat fifti man nomo blong faet we oli stap ron long hos, wetem ten kat nomo blong faet mo ten taosen soldia nomo.

8Ol narafala samting we King Jehoahas i mekem, wetem ol strong samting we hem i mekem long taem blong faet, ol man oli raetemdaon long buk ya we nem blong hem Ol Stori blong Laef blong ol King blong Isrel.

9Mo taem hem i ded, oli berem hem long Sameria, mo pikinini blong hem Jehoas i tekem ples blong hem, i kam king.

King Jehoas blong Isrel

10Nao long taem ya we King Joas i stap rul long Juda,* long namba toti seven yia blong hem, Jehoas, we papa blong hem King Jehoahas, hem i kam king blong Isrel.* Hem i rul sikistin yia long kantri ya, mo hedkwota blong hem i stap long taon ya Sameria.*

11Be hem tu i stap mekem sin agens long Hae God, mo neva hem i lego ol rabis fasin ya. Hem i stap lidim ol man Isrel blong oli mekem sin long sem fasin ya nomo we King Jeroboam bifo, we papa blong hem Nebat, hem i bin mekem.

12Ol narafala samting we King Jehoas ya i mekem, wetem ol strong samting we hem i mekem long taem ya we King Amajia blong Juda i kam mekem faet long hem, ol man oli raetemdaon long buk ya we nem blong hem Ol Stori blong Laef blong ol King blong Isrel.

13Mo taem hem i ded, oli berem hem long Sameria, long beregraon blong ol king, mo pikinini blong hem Jeroboam Namba Tu i tekem ples blong hem, i kam king.

Profet Elisa i ded

14 2 King 2.12 Nao long taem ya, Profet Elisa i kasem wan sik we biaen hem i ded from, mo taem hem i stap slip long bed, King Jehoas blong Isrel* i kam visitim hem, i krae long hem, we i krae we i krae. Hem i talem se, “!Papa blong mi! !Papa blong mi! !Yu yu wan strong man blong givhan long kantri ya blong yumi!”

15Nao profet i talem long hem se, “Yu go tekem bonara wetem ol ara i kam.” Ale, hem i go tekem i kam,

16-17nao profet i talem long hem blong i taetem rop blong hem. King i mekem olsem, nao profet i talem long hem se, “Yu go openem windo ya long saed i go long is.” King i go openem, nao profet i kam putum han blong hem long han blong king, mo i talem long hem se, “Ale, yu sut.” King i sut, nao wantaem nomo, profet ya i singaot bigwan se, “!Yu yu ara blong Hae God! !Hem bambae i yusum yu blong winim ol man Siria! Bambae yu go mekem faet long olgeta long ples ya Afek, mo bambae yu faet, gogo yu winim olgeta.”

18Nao profet i talem long hem se, “Yu tekem ol narafala ara ya, yu kilim graon long hem.” Mo hem i tekem ol ara ya, i kilim graon long hem tri taem, nao i finis.

19Be samting ya i mekem profet i kros, nao i talem long hem se, “Sipos yu kilim graon ya faef taem no sikis taem, bambae yu save winimgud olgeta, be naoia, bambae yu winim olgeta tri taem nomo.”

20Nao biaen, Profet Elisa i ded, mo oli berem* hem long hol long ston.

Nao long taem ya, evri yia, ol man Moab oli stap mekem kampani, mo oli stap kam long kantri ya Isrel blong mekem faet long olgeta, mo blong stilim olting blong olgeta.

21Mo wan taem, ol man oli karem wan dedman blong go berem hem long hol long ston, nao oli luk wan kampani blong ol man Moab ya i stap kam, nao oli sakem hem i go insaed long hol ya long ston we oli bin putum bodi blong Profet Elisa long hem bifo, mo oli ronwe. Mo taem bodi blong dedman ya i kasem ol bun blong profet ya, wantaem nomo dedman ya i laef bakegen, i girap, i stanap.

Ol man Isrel oli go mekem faet long ol man Siria

22Nao long taem ya we King Jehoahas i stap rul long Isrel,* oltaem King Hasael blong Siria i stap mekem i strong tumas long olgeta.

23Be Hae God i kaen long olgeta, mo i gat sore long olgeta. Hem i no save letem blong ol man Siria ya oli kam flatemgud olgeta, oltaem hem i stap halpem olgeta from promes* ya blong hem we i bin mekem bifo wetem Ebraham mo Aesak mo Jekob.* Neva hem i fogetem ol man blong hem.

24Nao taem King Hasael i ded, pikinini blong hem Benadad i tekem ples blong hem, i kam king.

25Nao King Jehoas blong Isrel i go mekem faet long hem tri taem. Hem i winim hem long ol faet ya, mo i holem ol taon ya bakegen we king ya i bin tekemaot long han blong papa blong hem, King Jehoahas.