1Nao Hae God i talem long Moses se, “Moses. Bambae mi givim wan panis moa long king ya wetem ol man blong hem, we hemia bambae i laswan. Nao biaen, bambae hem i letem yufala i go, mo long taem ya, bambae hem i ronemaot yufala we i no moa wantem luk yufala bakegen samtaem.
2Naoia yu go talem long ol man blong yu, blong oli go asaskem long ol man Ijip raonabaot long olgeta, blong oli givim ol samting ya long olgeta we oli wokem long silva no long gol.”
3Nao long taem ya, Hae God i mekem we ol man Ijip oli stap tinghevi tumas long ol laen* blong Isrel.* Mo ol haeman blong king wetem ol narafala man Ijip oli stap tinghevi tumas long Moses, oli luk hem, se hem i wan nambawan lida tru.
4Nao Moses i go talem long king se, “Hae God i talem se, ‘Long medel naet, mi bambae mi pastru long Ijip,
5nao ol fasbon pikinini boe blong yufala bambae oli ded evriwan. Samting ya bambae i stat long fasbon pikinini boe blong yu we yu stap tingting se hem bambae i tekem ples blong yu, i kam king, i go kasem ol fasbon pikinini boe blong ol woman ya we oli stap wok slef* long yufala, we wok blong olgeta i blong granem wit* i kam flaoa. Mo olgeta fasbon pikinini man blong ol anamol blong yufala tu bambae oli ded.
6Bambae yufala evriwan i krae we i krae, we neva ol man oli harem olsem bifo, mo bambae oli no save harem bakegen olsem samtaem.
7Be bambae i no gat wan samting nating i kam mekem trabol long ol laen blong Isrel wetem ol anamol blong olgeta, bambae oli stap gud nomo. Nao taem yufala i luk ol samting ya, bambae yufala i save we mi mi Hae God, mo mi stap mekem i narafala long yufala, mo i narafala long olgeta.’ ”
8Nao Moses i talem bakegen se, “King. Long taem ya, ol haeman blong yu bambae oli kam bodaon long fes blong mi, mo bambae oli askem long mi blong mi tekem ol man ya blong mi, mifala i aot. Mo biaen, bambae mifala i aot, mifala i go.” Nao hem i kros tumas, i aot long haos blong king i go.
9Nao Hae God i talem long hem bakegen se, “Bambae king i no save lesin long tok blong yu yet. Bambae mi mekem hem i mekemhed olsem, blong bambae mi save mekem plante merikel moa yet long kantri ya.”
10Long taem ya, Moses mo Eron, tufala i bin mekem ol merikel ya long fes blong king, be Hae God i stap mekem king ya i mekemhed, nao king i no save letem ol laen blong Isrel oli goaot long kantri blong hem.
Who We AreWhat We EelieveWhat We Do
2025 by iamachristian.org,Inc All rights reserved.
