2 Kronikel 33 - Bislama Bible Revised 2012

King Manase blong Juda(2 King 21.1-9)

1Nao long taem we Manase i kam king blong Juda,* hem i gat twelef yia nomo. Hem i rul fifti faef yia long kantri ya, mo hedkwota blong hem i stap long taon ya Jerusalem.*

2Jer 15.4Hem i stap mekem sin agens long Hae God, we i stap folem ol rabis fasin blong ol hiten man ya bifo we Hae God i bin ronemaot olgeta i gowe long kantri ya long taem ya we i tekem ol man blong hem oli kam stap long hem.

3Hem i girap i go wokem ol ples ya bakegen blong mekem wosip long ol narafala god, we papa blong hem King Hesekia i bin brebrekemdaon. Hem i wokem ol olta blong mekem wosip long Bal,* mo i wokem wan aedol blong woman god ya Asera,* mo i stap mekem wosip long ol sta tu.

42 Kron 6.6Hem i wokem ol olta long haos* blong Hae God, mo i stap yusum olgeta blong mekem wosip long ol god ya. Be bifo, Hae God i bin talem se, “Haos blong mi long Jerusalem, bambae i ples blong mekem wosip long mi nomo, gogo i no save finis.”

5Mo hem i wokem ol olta tu blong mekem wosip long ol sta long tufala yad blong haos ya.

6Mo long krik ya Hinom, hem i stap tekem ol pikinini boe blong hem, i stap bonem olgeta long faea blong mekem sakrefaes long ol god ya. Mo oltaem, hem i stap wokem ol fasin blong faenemaot ol samting we bambae i kamtru long fiuja, mo i stap wok wetem ol devel, mo i stap wokem posen, mo i stap go luk ol kleva, mo ol man we oli save toktok wetem ol devel. Hem i stap mekem plante samting we i nogud long fes blong Hae God, nao i mekem Hae God i kros tumas.

71 King 9.3-5; 2 Kron 7.12-18Hem i tekem wan aedol we hem i bin wokem, mo i go putum insaed long haos ya blong Hae God, be Hae God i bin talem finis long King Deved mo long pikinini blong hem King Solomon se, “Yufala ol twelef laen* blong Isrel,* yufala i man blong mi. Mo long olgeta ples blong yufala, mi mi jusumaot taon ya Jerusalem, blong yufala i putum haos blong mi long hem, mo haos ya i ples blong mekem wosip long mi nomo. Oltaem yufala i mas kam long hem blong mekem wosip long mi.

8Mo sipos yufala i obei long olgeta tok blong mi, mo yufala i stap holem Loa* ya blong mi we Moses man blong wok blong mi i bin givim long ol bubu blong yufala bifo, bambae mi mi no save letem ol narafala man oli ronemaot yufala i gowe long kantri ya we mi bin givim long ol bubu blong yufala.”

9Be king ya i stap pulum ol man Jerusalem wetem ol narafala man Juda blong oli mekem ol fasin we i nogud we i nogud. Fasin blong olgeta i nogud moa, i winim ol rabis fasin blong ol hiten man ya bifo we Hae God i bin kilim olgeta long taem ya we hem i tekem ol bubu blong olgeta oli kam stap long kantri ya.

King Manase i tanem tingting blong hem

10Nao Hae God i stap givim tok blong hem long King Manase mo long ol man blong hem blong wonem olgeta, be oli no wantem lesin long hem.

11Nao hem i letem ol komanda blong ol soldia blong Asiria oli kam mekem faet long olgeta, nao oli winim olgeta, oli holem king ya, oli hukum hem long huk, mo oli fasem hem long jen, nao oli pulum hem i go long Babilon.

12Long taem ya, hem i stap harem i nogud tumas, nao hem i tanem tingting blong hem, i mekem tingting blong hem i stap daon. Nao hem i luk long Hae God ya we i God blong hem, mo i krae long hem blong i givhan long hem.

13Mo Hae God i harem prea blong hem, mo i letem hem i kambak long Jerusalem,* i rul bakegen. Nao from samting ya, hem i luksave we Hae God ya, hem i God tru.

14Nao biaen long samting ya, hem i wokem bigfala stonwol ya blong Jerusalem bakegen, mo haf ya blong hem we i pas afsaed long ples ya we nem blong hem “Taon* blong King Deved”, hem i mekem i kam hae moa. Hem i stat wokem wol ya long levelples ya klosap long springwota ya Gihon saed i kam, nao i wokem i go long not go kasem doa ya we nem blong hem Doa blong Fis, gogo i kasem haf ya blong Jerusalem we nem blong hem Ofel. Mo hem i putum ol kapten blong hem wetem ol soldia blong olgeta long ol taon ya long Juda* we oli gat stonwol i goraon long olgeta, blong oli gad long olgeta.

15Mo ol narafala god ya wetem aedol ya, we hem i bin putum olgeta long haos* blong Hae God fastaem, hem i go tekemaot olgeta, i karem olgeta i go afsaed long taon, nao i sakem olgeta. Mo i brekemdaon tu ol olta blong ol narafala god we oli stap long hil ya we haos ya i stap long hem, wetem olgeta we oli stap olbaot long ol narafala ples long taon ya, nao i go sakem olgeta ya tu.

16Mo Olta ya blong Hae God we oli stap bonem sakrefaes long hem bifo, hem i wokemgud bakegen, nao i bonem ol sakrefaes ya long hem we i blong soemaot we hem i fren gud wetem Hae God bakegen, mo ol sakrefaes ya we i blong talem tangkiu long hem. Mo hem i sanem tok i go long olgeta man Juda se, “Yumi ya, yumi laen* blong Isrel,* mo Hae God ya i God blong yumi. Yufala i mas mekem wosip long hem nomo.”

17Nao nating we ol man ya oli stap go mekem sakrefaes long ol narafala ples blong mekem wosip olbaot long Juda, be oltaem oli stap mekem long Hae God nomo.

King Manase i ded(2 King 21.17-18)

18Ol narafala samting we King Manase i mekem, wetem prea we hem i mekem long Hae God, mo ol tok blong ol profet we oli tok long hem long nem blong Hae God ya, we i God blong olgeta evriwan we oli laen* blong Isrel,* oli raetemdaon olgeta evriwan long buk ya we nem blong hem Ol Stori blong ol King blong ol laen blong Isrel.

19Mo bakegen, plante narafala samting we hem i mekem, oli raetemdaon olgeta long buk ya we nem blong hem Ol Stori blong ol Profet. Long buk ya, i gat stori blong prea ya blong hem, wetem ansa we God i givim long hem, mo ol ripot blong ol samting nogud we hem i mekem fastaem, we i no tanem tingting blong hem yet, we hemia ol fasin nogud blong hem, mo nem blong ol ples blong mekem wosip long ol narafala god we hem i wokem, mo stori blong ol aedol blong woman god ya Asera* we hem i wokem, mo blong ol narafala aedol ya we hem i stap mekem wosip long olgeta fastaem.

20Nao hem i ded, mo oli berem hem long yad blong haos blong hem. Nao pikinini blong hem Amon i tekem ples blong hem i kam king.

King Amon blong Juda(2 King 21.19-26)

21Nao long taem ya we Amon i kam king blong Juda,* hem i gat twanti tu yia. Hem i rul tu yia nomo long kantri ya, mo hedkwota blong hem i stap long taon ya Jerusalem.*

22Hem tu i stap mekem sin agens long Hae God, olsem we papa blong hem King Manase i mekem. Hem i stap mekem wosip long ol aedol ya we papa blong hem i bin mekem wosip long olgeta fastaem.

23Be hem i no tanem tingting blong hem blong kambak long Hae God, olsem we papa blong hem i mekem. Hem i stap mekem ol samting we i nogud we i nogud olgeta, i bitim we papa blong hem i bin mekem bifo.

24Nao ol haeman blong hem oli girap oli mekem plan agens long hem, mo oli kilim hem i ded insaed long haos blong hem.

25Be ol man Juda oli kilim ol haeman ya oli ded, nao oli putumap Josaea, pikinini blong hem i tekem ples blong hem i kam king.