1Long taem ya we King Sirus i rul long Pesia, long namba tri yia blong hem, i gat wan tok i kam long Daniel, we narafala nem blong hem Beltesasa. Tok ya, hem i wan trutok be i had we i had blong man i save. Nao hem i kasem mining blong tok ya long wan vison.* Stori blong hem i olsem.
2Daniel i talem se, “Long taem ya, mi stap krae gogo kasem tri wik.
3Mi no kakae gudfala kakae mo mi no kakae mit, mo mi no dring waen. Mo mi no putum oel long bodi blong mi tu.
4“Long yia ya, long fas manis,* long namba twanti fo dei blong hem, mi mi stap stanap long saed blong bigfala reva ya we nem blong hem Taegris Reva.
5Rev 1.13-15; 2.18; 19.12Nao mi luk wan man we i werem gudfala klos we oli wokem long linen,* mo strap blong hem oli wokem long gol we i beswan.
6Bodi blong hem i saen olsem wan flas ston, mo fes blong hem i saen we i saen olsem laetning, mo ae blong hem i laet olsem faea. Tufala han mo tufala leg blong hem oli saen olsem bras we oli saenemgud, mo voes blong hem i olsem noes blong wan bigfala kampani blong ol man.
7“Long taem ya mifala i plante, be mi wan nomo mi luk vison ya. Ol man we oli stap wetem mi oli no luk wan samting, be oli fraet we oli fraet, nao oli ronwe, oli go haed.
8Nao mi wan nomo mi stap long ples ya, mi stap luk vison ya, mo mi sapraes tumas long hem. Mo samting ya i mekem mi mi no moa gat paoa, mo fes blong mi i jenis we man i no save luksave mi.
9Mo taem mi harem voes blong hem, mi foldaon long graon we mi hafded, mo mi stap slip long ples ya we fes blong mi i go long graon.
10Nao man ya i holem mi, i leftemap mi, i mekem mi mi stanap long ni blong mi mo long han blong mi, be mi stap seksek yet.
11“Nao man ya i talem long mi se, ‘Daniel. God i lavem yu tumas. Yu stanap, yu lesin gud long tok ya we bambae mi talem. Hem i sanem mi mi kam blong luk yu.’ Taem hem i tok olsem, nao mi stanap be mi stap seksek yet.
12“Nao hem i talem long mi se, ‘Daniel, yu no fraet. I stat long taem ya we yu mekem tingting blong yu i stap daon blong yu save kasem mining blong ol samting ya, God i harem prea blong yu. Mo mi mi kam olsem ansa blong prea blong yu.
13Rev 12.7Be rabis enjel ya we i stap lukaot long ol man Pesia, hem i stap agens long mi kam kasem twanti wan dei. Nao enjel ya Mikael we hem i wan long olgeta we oli hae moa long ol narafala enjel, hem i kam blong givhan long mi, from we mi wan nomo mi stap long Pesia blong stanap agens long ol king blong ples ya.
14Mi mi kam blong talemaot long yu wanem samting bambae i kamtru long ol man ples blong yu long fiuja, blong yu savegud ol samting ya. Vison ya we yu luk, hem i pija blong ol samting we bambae i kamtru long taem we i stap kam yet.’
15“Taem hem i talem olsem, mi lukluk long graon we mi no moa save toktok.
16Nao man ya i stretem han blong hem i tajem maot blong mi. Nao mi talem long hem se, ‘Masta,* vison ya we mi luk i mekem mi mi slak tumas, mi stap seksek kam kasem naoia.
17Mi mi stap stanap long fes blong yu olsem wan slef* we i stap stanap long fes blong masta blong hem. ?Bambae mi save toktok long yu olsem wanem? Mi mi no moa gat paoa. Kolosap win blong mi i finis nao.’
18“Nao hem i holem mi bakegen, i mekem mi mi harem we mi strong lelebet.
19Nao hem i talem se, ‘God i lavem yu tumas. Pis i stap wetem yu, yu no fraet. Tingting blong yu i mas strong, yu mas stanap strong oltaem.’
“Taem hem i talem olsem, mi mi harem we mi kam strong moa, nao mi talem se, ‘Masta, yu talem long mi wanem samting yu wantem talem. Naoia yu mekem mi mi harem gud bakegen finis.’
20-21“Nao hem i talem long mi se, ‘?Yu yu save from wanem mi kam luk yu? Mi mi kam blong soemaot long yu ol samting ya we oli raetem insaed long buk* ya we nem blong hem Buk blong Trutok. Naoia bambae mi mas gobak blong faet long rabis enjel ya we i stap lukaot long ol man Pesia. Biaen long samting ya, narafala rabis enjel ya we i stap lukaot long ol man Gris bambae i kamtru. Be bambae i no gat man blong givhan long mi, Mikael nomo, enjel ya we i stap lukaot long yufala ol laen* blong Isrel,* hem bambae i givhan long mi.
Who We AreWhat We EelieveWhat We Do
2025 by iamachristian.org,Inc All rights reserved.
