Aesea 27 - Bislama Bible Revised 2012

1 , bigfala snek ya blong solwota, we i stap tantanem bodi blong hem, i stap glis i go. Mo hem bambae i kilim bigfala anamol ya blong solwota tu i ded.

2“Long taem ya, Hae God bambae i talem se, ‘Plantesen blong rop ya grep* we mi mi planem, hem i karem plante frut. Yufala i mas sing long singsing blong hem.

3Mi mi stap lukaot long hem, mo oltaem mi stap wasem ol rop blong hem. Mi stap gad long hem long dei mo long naet, blong man i no kam spolem.

4Mi mi no moa kros long plantesen ya blong mi. Sipos i gat ol rabis gras mo ol ropnil oli stap long hem, bambae mi go katem olgeta, mo bambae mi bonem olgeta.

5Be sipos ol enemi blong ol man blong mi oli wantem blong mi mi lukaot long olgeta, i moa gud oli kam, oli mekem pis wetem mi. Yes, i moa gud oli mekem pis wetem mi.’ ”

6Nao profet i gohed, i talem se, “!Olgeta! Long taem we bambae i kam, ol laen blong yumi bambae oli gru olsem tri we rus blong hem i godaon, nao i gru i kam bigwan, i karem flaoa, nao frut blong hem bambae i kam fulap olbaot long wol ya.

7“Taem we Hae God i panisim yumi, hem i no mekem i strong tumas long yumi, olsem we i mekem long ol enemi ya we fastaem oli kam mekem i strong tumas long yumi. Mo long taem ya we hem i kilim sam long yumi i ded, hem i no kilim plante long yumi, olsem we i kilim plante long ol enemi ya blong yumi we fastaem oli stap kilim yumi i ded.

8Hem i panisim yumi, long fasin ya we i sanemaot sam long yumi oli gowe long kantri blong yumi. Hem i tekemaot olgeta, olsem we i sanem wan rabis win i kamaot long saed long is, i karem olgeta i go.

9Mo bambae hem i save fogivim yumi, i tekemaot ol sin blong yumi, be fastaem, yumi mas brekemdaon ol ston blong ol olta blong ol narafala god, mo yumi mas smasem olgeta gogo oli kam olsem asis nomo, mo yumi mas tekemaot ol olta blong bonem insens,* mo ol pos ya we i blong mekem wosip long woman god ya Asera.* Yumi mas mekem ol samting ya fastaem, nao biaen, bambae hem i save fogivim yumi.

10“Bigfala taon ya we fastaem stonwol i goraon long hem, bambae stonwol blong hem i brobrok olgeta, mo ples ya bambae i kam ples nating nomo. Taon ya bambae i kam ples blong buluk nomo, we oli stap lukaot kakae long hem, mo oli save kam slip long hem. Bambae oli kakae ol lif blong ol tri,

11nao ol han blong ol tri ya bambae oli kam drae, mo bambae oli stap brobrok olbaot. Ol woman bambae oli kam long ples ya blong pikimap faeawud. Hae God i mekem ol man blong ples ya, be from we oli no luksave wan samting, hem bambae i no save sore long olgeta, mo i no save givhan long olgeta.

12“Long taem ya, hem bambae i go tekemaot ol man blong yumi wanwan, i stat long Yufretes Reva long not, i go kasem mak blong graon blong ol man Ijip long saot. Bambae hem i tekemaot olgeta, olsem we man i tekemaot kakae blong wit,* i livim ol makas blong hem i stap.

13Long taem ya, bambae wan man i blu pupu blong singaot ol laen* ya blong yumi we oli stap afsaed long kantri blong yumi, blong oli aot long Asiria, mo oli aot long Ijip, oli kamhom long ples blong yumi bakegen. Mo taem oli kamhom, bambae oli kam mekem wosip long Hae God bakegen long taon ya Jerusalem,* antap long tabu hil* ya blong hem.”