Namba 32 - Bislama Bible Revised 2012

Ol laen ya blong Isrel we oli stap long saed blong Jodan Reva long is(Dutronome 3.12-22)

1Nao long taem ya, ol laen* blong Ruben,* mo ol laen blong Gad* oli gat plante anamol blong olgeta, mo oli luk we ol ples ya long Gilead, raonabaot long taon ya Jasere oli gudfala ples blong fidim anamol.

2Nao oli go luk Moses wetem Hae Pris Eleasara mo ol narafala lida blong olgeta, oli talem long olgeta se,

3-4“Ol taon ya Atarot, mo Dibon, mo Jasere, mo Nimraha, mo Hesbon, mo Eleale, mo Sibma, mo Neboho, mo Beon, Hae God i givhan long yumi blong yumi holem olgeta, mo ol ples raonabaot long olgeta oli gudfala ples blong fidim anamol, mo mifala i gat plante anamol blong mifala.

5Plis yufala i no mekem mifala i gokros long Jodan Reva, yufala i letem mifala i stap long ples ya. I moa gud yufala i givim ol graon ya nomo long mifala, blong mifala i stap long hem, i blong mifala.”

6Nao Moses i talem se, “?Weswe? ?Yufala i wantem stap long ples ya, blong mifala nomo i go mekem faet longwe?

7Fasin ya bambae i mekem tingting blong ol brata ya blong yufala i foldaon, nao bambae mifala i no save gokros long Jodan Reva ya blong go long graon ya we Hae God i makemaot finis se i blong yumi. !Yufala i no save mekem olsem!

8Nam 13.17-33!Hemia sem fasin ya nomo we ol papa blong yufala oli mekem bifo! Taem yumi stap long Kadesbanea, mi mi sanem ol man oli kam insaed long kantri ya Kenan,* blong oli lukluksave ples ya.

9Mo olgeta oli wokbaot gogo oli kasem levelples ya Eskol long medel blong ol hil, mo oli lukluk gud ol ples ya. Be taem oli kambak, oli mekem tingting blong olgeta man i foldaon, nao nating we Hae God i makemaot kantri ya finis se i blong yumi, be yumi no kam insaed long hem.

10Nam 14.26-35Nao long taem ya, Hae God i kros tumas, i tok long mifala,

11i talem se, ‘!Mi mi talem stret long yufala! !Tingting blong yufala i no stap strong long mi nating! Mi mi promes* finis long Ebraham mo Aesak mo Jekob,* se bambae mi givim kantri ya long olgeta we bambae oli kamaot biaen long trifala, be yufala i no trastem mi. Nao from samting ya, yufala we i kamaot long Ijip, we yia blong yufala i kasem twanti i go antap, bambae i no gat wan long yufala i save go insaed long kantri ya.’

12Tok ya i kavremap mifala evriwan long taem ya, Keleb we papa blong hem Jefune, we i laen blong Kenas, mo Josua we papa blong hem Nun, tufala ya nomo i stap we tingting blong tufala i stap strong long Hae God. Nao tufala ya nomo bambae i go insaed long kantri ya.

13Long taem ya, Hae God i kros long mifala evriwan, nao i mekem we yumi stap wokbaot olbaot long draeples ya foti yia, gogo kasem we ol papa ya blong yufala we oli mekem sin long fes blong hem long taem ya oli ded evriwan.

14!Be naoia, yufala i girap, yufala i wantem mekem sem fasin we olgeta ya oli mekem! !Yufala i stret pikinini blong olgeta! !Yufala tu i man nogud! ?Yufala i wantem mekem Hae God i kros long yumi bakegen?

15Sipos yufala i girap, yufala i tanem baksaed long hem naoia, bambae hem i lego yumi bakegen. Bambae yumi evriwan i go lus longwe long draeples, be trabol ya bambae i fol blong yufala nomo.”

16-17Be oli kam klosap moa long Moses, oli talem long hem se, “No, yumi ya, yumi wan kampani nomo, mo bambae mifala i kam wetem yufala. Be fastaem, plis yu letem blong mifala i wokem ol stonwol blong blokem ol anamol blong mifala, mo blong mifala i wokem ol bigfala stonwol i goraon long ol taon ya tu blong blokem ol pikinini blong mifala blong oli stap gud. Nao biaen, bambae mifala i kam wetem yufala, mo bambae mifala i lidim faet ya, gogo kasem we mifala i putum yufala evriwan long kantri ya we bambae i blong yufala. Ol pikinini ya blong mifala bambae oli save stap long ples ya fastaem. Sipos i gat ol stonwol i goraon long ol taon ya, bambae oli save stap gud long olgeta, ol man ples ya bambae oli no save kilim olgeta.

18Bambae mifala i no save kambak long ples ya bakegen, gogo kasem we ol narafala brata ya evriwan oli holem ol graon ya we bambae yufala i makemaot se i blong olgeta.

19Mo bambae mifala i no save holem graon tu long narasaed Jodan Reva ya i go, from we mifala i kasem blong mifala finis long ples ya.”

20Nao Moses i talem se, “Sipos yufala i talem tru se bambae yufala i kam wetem mifala, hemia i min se bambae yufala i mas rere blong faet stret olsem we Hae God i talem.

21Olgeta man blong faet blong yufala oli mas gokros long narasaed Jodan Reva wetem mifala blong mekem faet long ol enemi ya blong Hae God olsem we hem bambae i talem, gogo kasem we hem i winim olgeta,

22i holem kantri ya blong olgeta i blong yumi. Biaen, bambae yufala i save kambak long ples ya bakegen, from we long taem ya, bambae yufala i no moa gat wan samting blong mekem long fes blong Hae God no long fes blong ol brata ya blong yufala. Mo long taem ya, Hae God bambae i talem se ol graon long saed ya i blong yufala.

23Be sipos yufala i no holem promes ya blong yufala, mi mi talem long yufala naoia se yufala i mas lukaot. Sipos yufala i no holem promes ya, bambae yufala i stap mekem sin agens long Hae God ya. Mo yufala i mas save we hem bambae i panisim yufala from sin ya blong yufala.

24Yufala i save go wokem ol stonwol blong ol taon ya blong yufala mo blong ol yad blong ol anamol ya blong yufala, be bambae yufala i mas mekem olgeta samting ya we yufala i promes blong mekem.”

25Nao olgeta oli talem long hem se, “Olfala, bambae mifala i mekem olsem we yu yu talem.

26Ol woman blong mifala mo ol pikinini blong mifala mo ol anamol blong mifala, bambae olgeta oli stap nomo long ples ya long ol taon ya long Gilead.

27Be mifala evriwan i rere blong go mekem faet olsem we Hae God bambae i talem. Bambae mifala i gokros long Jodan Reva ya blong go mekem faet olsem we yu yu talem.”

28 Jos 1.12-15 Nao Moses i talem long hae pris mo Josua, mo ol narafala lida blong olgeta se,

29“Sipos ol brata ya blong yufala oli gokros long Jodan Reva wetem yufala blong go mekem faet olsem we Hae God bambae i talem, nao yufala i winim ol man Kenan ya, bambae yufala i save givim ol graon ya long Gilead i go long olgeta.

30Be sipos oli no go wetem yufala, bambae oli mas kasem graon blong olgeta long Kenan olsem yufala nomo.”

31Nao ol laen blong Gad wetem ol laen blong Ruben oli talem se, “Olfala, bambae mifala i mekem olsem we Hae God i talem.

32Bambae mifala i gokros long reva ya, mifala i go insaed long kantri ya Kenan blong mekem faet olsem we hem bambae i talem, blong bambae mifala i save holem graon ya we yumi stap long hem naoia, i blong mifala.”

33Nao from samting ya, Moses i makemaot olgeta ples ya we King Sihon blong Amoro* mo King Og blong Basan, tufala i king long hem, wetem ol taon blong tufala, mo ol vilej we oli stap raonabaot long olgeta, se bambae oli blong ol laen blong Gad, wetem ol laen blong Ruben, mo haf blong ol laen blong Manase.*

34Nao ol laen blong Gad oli wokemgud bakegen ol bigfala stonwol we oli goraon long ol taon ya Dibon, mo Atarot, mo Aroere,

35mo Atrotsofan, mo Jasere, mo Jogbeha,

36mo Betnimra, mo Betaran. Mo oli wokem ol fenis blong ol anamol blong olgeta tu.

37Mo ol laen blong Ruben oli wokemgud bakegen ol bigfala stonwol we oli goraon long ol taon ya Hesbon, mo Eleale, mo Kiriataem,

38mo Neboho, mo Balmeon we biaen oli jenisim nem blong hem, mo Sibma. Mo taem oli wokemgud ol taon ya bakegen, oli putum ol niufala nem blong olgeta.

39Mo ol laen blong Makiri, we papa blong hem Manase oli go insaed long ples ya Gilead, oli ronemaot ol man Amoro we oli stap long hem, nao oli stap long ples ya.

40Nao Moses i givim ples ya long olgeta, i blong olgeta, mo oli stap olwe long hem.

41Man ya Jaere, we i laen blong Manase, hem i go mekem faet long samfala vilej, mo i winim olgeta, nao i putum nem blong olgeta ya se “Ol vilej blong Jaere”.

42Mo man ya Noba i go mekem faet long taon ya Kenat mo ol vilej we oli stap raonabaot long hem, mo i winim olgeta, nao i putum nem blong hem long taon ya se Noba.