Esikel 42 - Bislama Bible Revised 2012

Tufala haos we i stap insaed long yad blong haos blong Hae God

1Nao man ya i tekem mi, mitufala i aot long yad ya we i insaed olgeta, mitufala i kam long bigfala yad ya, nao hem i lidim mi mi go long wan haos we i joen long wol ya we i blokem haos* blong Hae God, saed i go long not. Haos ya, wan saed blong hem i lukluk i go long saot, long ol rum ya long wol blong haos blong Hae God, mo nara saed blong hem i lukluk i go long bigfala yad ya, saed i go long not.

2Haos ya, longfala blong hem i kasem fifti meta, mo bigfala blong hem i kasem twanti faef meta.

3-6Wan saed blong haos ya i lukluk i go long yad ya insaed, we bigfala blong yad ya i go kasem wol blong haos blong God i kasem ten meta, mo nara saed i lukluk i go long bigfala yad ya we i gat ol rod we ol man oli flasem long ol ston we man i save wokbaot long hem. Long ples ya, i gat hil blong go antap long yad ya insaed, mo long hil ya, oli wokem haos ya, we i gat tri stori. Ol stori ya, i no gat ol bigbigfala pos we i holem olgeta, olsem ol narafala haos ya long yad blong haos blong Hae God, ol floa blong olgeta oli sidaon nomo long graon. Nao fas stori ya daon i stap stret long bigfala yad ya, mo nambatu stori long medel i stap insaed lelebet, klosap long yad ya we i insaed olgeta, mo nambatri stori antap i stap insaed moa, long yad ya. Ol rum long stori ya daon, mo long stori ya long medel, oli bigwan, mo ol rum long stori ya antap oli smol lelebet. Oli mekem olsem, from we stori ya antap i go insaed moa, i kasem haf blong yad ya insaed olgeta. Mo long saed blong haos ya long saed i go long not, i gat wan rod we bigfala blong hem i kasem faef meta, mo longfala blong hem i kasem fifti meta, mo long saed ya, i gat ol doa blong go insaed.

7-8Long stori ya daon, wol blong hem long saed i go long bigfala yad i kasem fifti meta. Twanti faef meta blong wol ya i wol nating nomo, i no gat rum insaed, mo narafala haf blong hem we longfala blong hem i kasem twanti faef meta, i gat ol rum insaed long hem. Be longfala blong stori ya antap i kasem fifti meta we ol rum i finisim olgeta.

9-10Mo long en blong haos ya long saed i go long is, we wol blong haos ya i stat long hem, i gat wan doa long hem we i blong go afsaed long bigfala yad ya.

Mo long narasaed haos blong Hae God, long saed i go long saot, i gat wan narafala haos i stap, we i sem mak nomo long haos ya long saed i go long not. Wan saed blong hem i lukluk i go long yad ya insaed, mo nara saed blong hem i lukluk i go long bigfala yad ya daon, long saed i go long saot.

11Nao long fran blong haos ya, i gat wan rod we i sem mak nomo olsem narawan ya, long saed i go long not. Mo haos ya tu, bigfala blong hem mo longfala blong hem i sem mak nomo olsem narawan ya, mo plan blong hem i sem mak, mo ol doa blong hem oli sem mak nomo olsem olgeta ya long saed i go long not.

12Mo long haos ya long saed i go long saot, long en blong hem long saed i go long is, we wol blong haos ya i stat long hem, i gat wan doa long ples ya.

13Nao man ya i talem long mi se, “Tufala haos ya i tabu. Insaed long tufala, ol pris* we oli go stanap long fes blong Hae God oli save tekem ol presen ya we oli tabu we i tabu, oli putum insaed long ol rum ya, from we ol rum ya oli tabu. Hemia ol kakae blong garen blong mekem sakrefaes long hem, mo ol sakrefaes blong tekemaot sin, mo ol spesel sakrefaes blong tekemaot sin blong man we i ravem Hae God, no i ravem narafala man.

14Sipos ol pris oli stap mekem wok blong Hae God long haos blong hem, nao oli wantem go long bigfala yad ya afsaed, oli mas livim ol tabu klos blong olgeta i stap insaed long ol rum ya. Be sipos oli wantem go long bigfala yad ya we ol man oli stap hivap long hem, oli mas putum ol narafala klos.”

Ol mak blong bigfala yad blong haos blong Hae God

15Taem man ya i makem olgeta samting insaed long tufala yad blong haos* blong Hae God finis, hem i tekem mi, mitufala i goaot long doa ya we i lukluk i go long is, nao i makem afsaed blong bigfala wol we i goraon long bigfala yad ya.

16Hem i tekem longfala rula ya, i makem saed ya we i go long is, mo longfala blong hem i kasem tu handred fifti meta.

17-19Mo i makem saed ya i go long not, mo saed ya i go long wes, mo saed ya i go long saot. Evri saed ya, longfala blong olgeta oli sem mak nomo, i kasem tu handred fifti meta.

20Hemia i min se yad ya i skwea, we evri saed blong hem i kasem tu handred fifti meta. Nao bigfala wol ya i seraot ples ya we i tabu mo ples we i no tabu.